ZANGNADAWMNA BAWK MAW HARSATNA SIAMTU?

Ram hmasawnna tiṭhuan­awptu lian tak a ni reng mai - duham uchuak hi a pawi asin. Compensation la uchuak chhiatpui an awm nual tawh. A dik tak chu lak a pawi lo. Dik lo deuh hi ka telh hram zel a.

Issue thar: Mizoram leh Bangladesh inkalpawhna tur, Kawrpuichhuah lei dawhna atan cheng 5,40,586,600 ruahman a ni a. He lei dawh vil tura Sorkar laipuiin a ruat Central PWD hotute chuan, Ministry of Home Affairs lamin sum a pekchhuah hnu-ah lei dawhkai a rem lohna a awm loh thu hriattirna, no objection certificate pek nghal an ni tih an sawi a. Hemi hnu hian hna ṭan nghal mai thei tura an inngaih laiin, a dawhna hmun tura chhungkaw ṭhenkhatin zangnadawmna an phut avangin harsatna an tawk ta a. Central in pawisa an sanction tawh chu an hnuk let leh tawp mai.

Zangna pek hi an hreh a ni lo, mahse document fel lo a tam an ti; a va hahthlak ṭhin em. Kan hotute pawh hian hma lakpui tak tak ni se, hetiang em em hi a thleng lo tur. He ram zim te hi kan enkawl seng lo chu a nih ber mai hi maw.

Hmalakna ṭha: A chunga kan sawi khi a tihfiah nan, hmana PWD hotupa thusawi sawi chhawn ka duh. Thingtlang khaw pakhatah kawng an laih dawnin, pawisa nuai 50 chauh an nei. Compensation an pek chuan an pawisa in a daih dawn si lo. Khawtlang pa ho an ko khawm a, compensation an ngiat loh theih chuan an khuaah motor kawng a lut vat dawn, an ngiat chuan an pawisa in a daih dawn si lo a, an khuaah motor a lut har dawn, ngiat lo mai turin an ngen a, an ngen ang chuan an inrem a, an sum neih pawh an hmang chuang hial. An hman chuang zawng chu ram neitute tlem tlem an sem thei. Tunah chuan an khuaah motor a lut thei tawh.

A sawi zel dan chuan, com­pensation lak tur a awm hian, mi thil ti theiten hma an lo la zung zung a, pawisa an dawn vena tur a nih avangin mipuiah hma an lo lakpui vat vat ṭhin a, mahse kan kal khalh hman hlauh a, hna kan thawk thei chauh a ni a ti.

Ka ṭhianpa, hetiang lama hma la ve ṭhin pakhat hnenah, ngam deuhin, "Compensation a sum lak ve in tum vang hian, hmasawnna in ti ṭhuanawp ve tho asin" ka ti a. Ani chuan, "Mipuiin an chanvo chu an hmu tur alawm, hma an la thiam lova, kan pui mai a ni" a ti. Thu dik ni ve tho siah hian, pawisa dawn ve tur neih vanga, hmasawnna tiṭhuanawp khawpa, mipui hma lakpui chu a awm ve tho hmel.

Hmasawnna tur central aṭanga sum awm tawh, hnuh let a ni tawp mai hi. He kan sorkar pawh hian a chunga Officer thusawi ang khian, a hmuna awm mipuite ko khawmin, inremna siampui dan zawng se, kawng a awm em em ang. He kan ram zim te hi kan enkawl seng lo te hi a ang ṭhin asin. A project a lian a, hmasawnna ropui tak tur a nih tehreng nen.

Kan duhamzia chu maw: Kan ṭhianpa Surveyor in a thil tawn ngei min hrilh a ni. Tuna Highway laih mekah hian compensation buaipuitu pakhat a ni. Ram neitu pakhat chuan a ram survey an neih hma lawkin, thlai a lo phun chawp vel, a hnah vuai lo mah se, ka ṭhianpa chuan a helper a tir ru a, a tawlhthluktir a, an thing phun chawp chu a tawk hlek a, a inphawi nghal ta mai, an man chhuak ṭeuh niin a sawi.

A sawi zel dan chuan, “Com­pensation lak tur a awm tih an hriat hian, mi hausa tam tak chuan, ram neitute hnen aṭangin an ram an lo leisak a. An ram chhunga kawng laih zawha ram la bang chu, a ram neitu hnena pek let leh an intiam a, chutiang chuan ram zau tak tak an lei pawp pawp mai a ni” a ti. Sumdawn nan an lo hmang tihna a nih chu.

Zangnadawmna : Compen­sation hi Mizo ṭawngin zangna­dawmna kan ti. A nate chuan dik takin an chanvo chang rawh se, na ve si lo hian kan in nat chawptir a, sum hmuhna remchangah hman tumin kan phe suau suau mai. Ram hmasawnna tiṭhuanawp khawp hian zangnadawmna kan um a, dik lo taka pass siam chawp vangin mi ṭhenkhat chu jail-te an tan phah.

Vairengte to Aizawl four lines kal ruah tur pawh, compensation avang bawkin tih ṭhuanawpin a awm a nih hi. Zangnadawmna la uchuak, vanduaina tawk an awm nual tawh. I vanduai ve palh ang e aw.

- Lalrinliana Colney