Inthlan luih kher a ṭul em ni?

Biak Inah pawh kan inkhawm theih loh lai hian VC inthlan ngei ngei hi a ngai em ni? tih zawhna hi kan hotute hian an chhan a ṭul a ni. 

March thlà aṭangin kan inkhawm thei tawh lova hei hi hre reng chungin State Elec­tion Commission hian August 27 ah inthlan tur an ti ta si a. Mizorama hri darh huk hi inthlan vang hian a thlen theih avangin kei ak zat hnih hnuai lam hian kan Pute hi ka au che u a ni - VC inthlan hi nakkum kum tir lam­ah tal sawn hlat theih a ni lo maw? In khaw­ngaihna ka ngen a ni. 

VC hi kum khat leh a chanve an term a pawh sei theih an ti tho bawk si a, kum khat pawh chu han pawtsei se chu boruak muanawm zawk hnuai­ah kan inthlan theih beiseinâ sang tak a awm. Tuna kan ram dinhmun dik tak hi hre phak suh mah ila nitin mai Covid-19 positive an hmuh belh zel lai a la ni si a. VC inthlan hi tih luih a nih chuan vote thlaktu hi an tlem dâwn a ni. 

Inthlan (election) ah reng reng an ngaih pawimawh ṭhin chu voters an ni a, chu chu a thlangtute an ni. Vote nei vote thlaktute tana ṭha tur hi zawn hmasak ber tur a ni. 

Kum 2018 MLA election leh nikum MP election dâwn kha chuan Election Commission of India khan mipui (voter)  kha a dah pawimawh em em a, rualbanlo zawng zawngte leh wheelchair hmang te, mitdel te pawhin vote an thlan theih dan tur ruahmanna kha a hranpa liau liau an siam a, voters kha an dah pawimawh a ni.

Mizoram VC inthlan turah hi chuan voters hi an ngai pawi­mawh hlawl lo a ni mai ang chu, kum 65 chin in khung tur tih sorkar thuchhuah a awm reng chungin min intlan luih tir ṭalh tumna lian tak a awm mek a ni. 

Inthlanah reng reng hian vote a tlak tlem chuan ruling party tan advantage lian tak a ni an ti ṭhin a, chu chu an hriat vang pawh a ni thei a, kan ruling party MNF hian August 27 a inthlan sawn hla tur hian eng thu leh hla mah an la nei ve lo niin a lang. 

Ruling party hian August 27 inthlan hi sawn hla turin lo ngen ve ta ang se la, Cong­ress-in an lo ngen tawh bawk nen inthlan hi an sawn hlat ngei a rinawm. Inthlan hi mipui tana him lo chung chung, natna nei sate tana pawn chhuah hlauhawm chung chung, kum upa zawkte tana him lo an ti chung chung hi chu kal pui lui lo se tiin thunei­tute ka ngen e. 

ECI or Supreme Court lamin "August thla ral hmaa VC inthlan neih ngei ngei tur," pawh rawn ti se mipuiin duh lo tur a nih lai hian kan state VC inthlan kal pui tura kan state chhung aṭanga rawtna awm hi sut leh ni rawh se.