Ka kir leh dawn
Kawla ni chhuak chhiarin kan thu leh hla rem mawi mawina thiltihtheihna hmachhuanin hringnun harsatna leh manganna kan su kiang ṭhin a nih kha.
Kan pi leh pute hunlai kum 1520 AD sanzawla an awmlai khan ṭampui thingpui ṭâm an tuar a. Kha tih hunlai kha thlang an tlak hunlai a ni a, ṭâm in nasa taka anmahni chipui a suatlai a ni.
Kha tihlai khan an mangan leh lungngaih inhnem nan ṭhuthmun zai an phuah chhuak ta a. Kawng engkimah ziaka dah awm kher lo chinah pawh kan pi leh pute khan thu leh hla kha an bulṭanna leh a tawpnaah an changchawiin an hmachhuan a, an nun peng pakhat an roh em em ṭhin a ni.
Tunlai ṭhangthar lungfing inti pawn lam vantirkoh puan sin, chhung lam rul tur pai kan va tam em. Hleiten an danglo Zoram mawina pholang tur hian chhungril nunze mawi, nelawm leh thu tlawm tak hmanga hmelma thinlung hneh thei an va khat ta pharh em.
Kan ramin lar chakna nun
a hmachhawn mek a,
Kan mizo nun chawimawitu
kan thu leh hla a fam mek,
Raltiang ka han thlir â,
Hnam nun chawi vul tu thuril
kan chhehchawl ê.
Chun chawiloh nauang ṭapin
a hrilh a hai lua
kan nun chawitu kha,
Fam mai tur
kan nunhlui mawitu,
Ka dawn hian
theih chang se aw,
Ka hringnun kallai zawk
ral tir mai ka nuam!
Khawvel changkanna chuan kan nun thuril inthup pholanna remchang vullai a chultir a, kan ram kan hnam changkanna kallai in a ṭhanhnan ta. Kan zozia pholangtu thu mawi leh hla ril te pawh a kal pel ṭan mek a ni. Hai der i tum em ni? Ni love kei chuan ka thei ve lo. Chawi kangin ka dawm ang a, chu fahrah chanchang thuril vultirtu nei tawh lo chu dawi ang dawmin ka kuangkuah ang.
Piallei thuah riat ka zal thleng leh hawilo par ka thliah hma thlengin, chhul chhuak fahrin ang maiin ka vuan dawn a ni.
Thiamna sang atchilhna khawvelah hian kei erawh zawngin chûn leh zua hmangaihna iang ka hlan ang. Kan pi leh pute min hnutchhiah chu fahrah thuril fam tur lainattu nei lo chu ka chawi ang a, "Ka kir leh dawn’’ kan zonun zemawi tarlangtu chu thuril leh hla remmawi te ti par vul a, chawi kang leh turin.
- C.Malsawmkimi