CAA hi Mizo mipui tân hian a fuh dawn lo mang e....
Citizenship Amendment, Bill (CAB) a nih lai khan a hlauhawm dan tûrzia hretute'n an sawi a. MNF Party leh Sorkar pawh khan Mizo mipui rilrem zawng a nih hriain kan Lok Sabha MP te pawh khan MNF Party-in a dodal tlat dawn thu leh Parliament-a a dodal ngei tûr thu kha Social Media lamah kan hmuh kha.
A hnû lawk, Parliament Session-ah, "He CAB hi kan thlawp (support) e" a rawn tih leh tak mai pawh Social Media lamah bawk kan hmuh leh tak kha! Mizoramin an sawi chhuah ve ngei phût tlat an awm chuan, a phût tlattu kha an zawmpui an nih bawk chuan keini Mizo mipui, rei lo tea thu pawimawh tak pawh theihnghilh leh thuai ṭhin hnam kan nihzia hre chianga an game khelhah ngai ila. Mak si kha, a mak leh lo ve! Kha lam kha chu duh tâwk ang aw.
Central dan (Act) lo niin Citizenship (Amendment) Act, 2019 a lo chan hnu hian vawiinah a taka harsatna kan tawh nghâl dan hi kan ngaihtuah thleng phâk em? He dan hian India ram chheh vêl, Pakistan, Bangladesh leh Afghanistan aṭanga hêng rama an hnam leh sakhaw tlêm te India rama an rawn raltlân chuan an tân duhsakna leh remruatsakna bîk siamsak hi an chan bîk theihna tûr dan a ni a. Hêng Muslim ramah hian Hindu te, Kristian te, Budhist te, Sikh te hi hnam tlêm (minority) nimahse, Hindu hi a lian leh India ram pawhin a ngaih pawimawh ber chu an ni ngei ang.
Vawiina Myanmar ram aṭanga kan Mizo hnahthlâk rawn ral tlân, an rama hnam tlêm (minority) ni bawk chu Kristiante hi an ni ngei mai le. Bangladesh te, Afghanistan te leh Pakistan ram ang hian he CAA hian Myanmar ram hi han huam ve se chuan inthlahrung lo leh India Sorkar pawh ring taka au ngam tûr kan nih lai hian CAA dan hian Myanmar ram hi a huam tel tlat lo zu nia!
Dik nia kan hriat leh kan lainatna leh kan inpêkna zawng zawng chu inthlahrung chungin India leh State Sorkar sum pawh beisei ṭha ngam lovin Mizo mipui hi kan awm ta ṭhuap mai a nih hi!
He dan an siam lai khan Myanmar ram telh an duh loh chhan chu keini Tribal lungmáwl tán lo zuk hre phâk lo mah ila, keini aia fing chuan an lo hre kiau a, chu dan hmang chuan hrénga tang ang maiin Mizo hnam hi kan awm ta a ni. Kan ṭanpui duh pawh kan ṭanpui ṭha ngam ta lo tlat mai. Khawi maw lai leh engemaw duh leh thlâkhlelh khelh a, "We fully support..." tih mai mai te nghawng hi kan ram leh hnam tan hian a lo pawi thui thei hlé a nih hi.
Kan ram Politician te hian mipui hriatreng theihna (public memory) tawi leh theihnghilh leh mai mai hnam kan nihzia hre chianga hei hi remchanga an la fo leh an hmang ṭangkai ṭhin hi tâwp tawh se kan duh ta tak zet a ni.
- Ma Liana,
Sihphir Venghlun