Hnathawh hriat loh neinung si
Mizoramah hian tun hmaa kan la hmelhriat ngai miah loh mi neinung tak ni si hi an awm. Kan rinhlelh dan chuan Chiahpuam emaw Khehpuam engmaw eng Puam berah emaw an tel kan ring. Heng mite hi kan dem rawn lai hian kan hruaitu ṭhenkhat eizawnna mumal an neih hriat ni si lova hausate hi i chhui ngam ang u.
Politician tam tak hi eizawnna an neih dang hriat tur a vang a ni. Hausa tawntaw ni thei si an awm a, a mak hle a ni. Vai ṭawnga Crorepati an tih mai ni phak, a hma lawka eizawnna nghet an neih hriat loh an awm ṭhin a, politician an nih hma aṭanga chhui a ṭha.
Zirlai hruaitu ni ṭhin, hnathawh an neih hriat miah loh politics an luh hnua MLA inthlana affidavit ena in hmun lo ram ngah tak, lirthei pawh lo nei ṭhinte hian engtin nge ei an zawn ang aw? tih hi i lo ngaihtuah ve ngai em le? Mizoramah hian zirlai hruaitu nih hi a hlawk nia a lanna chu an rethei zui zawk zawk ngai miah lo.
Zirlai hruaitu lirthei nei thei hnathawh dang hriat tur awm si lo hi sawi tur an awm nual a, chumi hnuah ram hmangaih ber angin an awm leh thiam si a, eizawnna declare ngam loh an neih chuan a ṭha lo ram tan.
Politician hlun kan tihte pawh hi chhui chhui ta ila regular source of income sawi tur nei si lo hian Crorepati an va tam si em!! Sorkarna chelh hma pawha hausa pawisa hmuhna sawi tur awm mumal si lo, sorkar hnua hausakna pung uchuak si te hi kan nei a. Sum siamna politics khel tawk lek politician nei ram kan nih chuan chhuan vanduai tak kan ni dawn a ni.
- Lalngaihawma Varte