Social Media kha kan lo hmu ve a

Kan ram hruai­tuten Social Media an tawng an tawng ta mai hian Social Media kan hman thiam lohzia a tilang chiang viau mai a, chumi ruala a tih lan chu kan ram hruaitute lakah Social Media hmangtute an lung a awi lo tih a ni. Social Media hi tu ta mah a ni lova, mipui a duh apaing hman theih a ni. Mipuiin an duh loh thu an au chhuah pui hi Sorkarin a lak nat tawh chuan chu sorkar chu mipui zawkin an bei ta tiin kan sawi theih mai awm e.

Chutih lai karah chuan thil chhui chian ngai tak mai pakhat a lo awm ta a, chu chu Social media lama Fake Account tam ta lutuk leh hmaikawr phena awm chunga Minister, Chief Minister te bei ṭhin tam ta lutuk hi a ni.

Ruling Party chauh ni lovin Oppo­sition pawh beih an ni bawk a. ZPM hotupa phei chu ruling Party lam ai pawha beih tawk nasa a ni a, a tawn tawn hian Social Media hriam hrei hmangin kan intin uaih uaih reng mai a ni.

Kan ram hruaitute English thiam loh te kan ṭhalaiten an lo Troll mek bawk a, hetihlai karah hian English thiam leh thiam loh ringawt hi Class tehna a ni lo tih pawh kan ṭhalaite hian an hriat ve a ngai bawk.

Kan Minister English ṭawng fuh hleithei lo te kan thehdarh chuai chuai a, kan Minister an nih miau si avangin ṭhalaite hian mahni mawng kan hlim ve tho tih pawh kan hriat a ngai a ni.

Kan Chief Minister kan beih dan te hian chin tawk nei se, ṭawngkam chhe tin renga beih tur a ni lo a nia.

Chief Minister pawh sawiselna dawng zo turin a Social Media lam reply section (a thu ziak chhanna leh comment zuina lam tihna a ni) hi Off daih tawh lo se, zalen takin awm tlang dial dial ila a ṭha a ni.

Mizo tlem te min in hnial tir vak vaktu Social Media hi do chi pawh a ni lova, hmanruaa hman chi pawh a ni chuang lo, thutak khuka khuk pui chi a ni lem lo.

- Vanlalchhunga (Machhunga)