KALPHUNG THAR HLIM THLA
Kumin November 2023 thla tawp lamah 9th Mizoram State Legislative Assembly Members 40 kan thlang leh mai dawn. Inthlan a hnai tual tual ang a, mahni awmna political party aṭanga MLA candidate ticket chang lo, vuivai thinrim tlan tåu bakah milar, mithiam, talent nei ṭha, Sorkar milian pensioner, political leader lar ṭhenkhat, pressure group, NGO office bearers chin ṭhenkhat an tlãktlum deuhna tur nia an ngaih political party-ah an zuang lut leh ngei hlawm ang a. Political party te'n member thar an inlawm luh chhawk leh sek bawk ang.
Pawl ngaihdan: Political party te'n pawl ngaihdan (manifesto) an tlangzarh ṭhin a. Kum 2018 Nov. thlaa General Election dawna political party 4-te manifesto kha tawite tein tarlang lawk ila:
BJP : Indian constitution schedule 8th-ah Mizo ṭawng telh turin an intiam a, chu chu general secretary Ram Madhavi khan Aizawl khawpuiah a tlangzarh a nih kha!
ZPM: Chairman, Lalliansawta'n a tlangzarh a. VIP culture tihbo, Chief Minister-in major department enkawl lovin Minister-te hnathawh a enpui ang. BPL chhungkua thi chu sawrkarin Rs. 10,000/- in a ral ṭhin ang. Citizenship Act 1955 behchhanin Village Census a ni ang, Assam nena ramri chingfel tura ṭan lak nghal a ni ang.
INC: An sawrkar phawt chuan pawl 10 leh a chung lamte hnenah a thlawna laptop pek vek an tiam. An manifesto hi CM Lal Thanhawla'n tlangzarhin NLUP pawh an chhunzawm zel tur thu a sawi zui bawk.
MNF: Point hraw pui pui 13 lai bakah tuna an flagship programme Socio Economic Development Policy (SEDP) hnuaia hmalakna tur hrang hrang ruahmante bulṭan thei turin hma lak a ni ang etc.
An manifesto-te khi a ṭha hlawmin kan ram an hmangaih hmel hlawm hle mai! Mahse, INC & MNF khian term 2+1 ve ve ministry an chelh tawh a, mahse, manifesto-a an ziah ṭhat ṭhin dan nena khaikhin chuan an buk a zãng a, mipui beisei an pha ngai lo hle.
Nov 2023 inthlanpui lo awm turah pawh hian manifesto itawn tak tak an tlangzarh leh ang a, ram hruaitu atan an itawm leh hlawm viau ang. An lan itawm ang hehu erawh chu an ni leh lem lovang.
A tlangkawmna: Eng zãwl (level)ah emaw pawh inthlan dawn apiangin political party-te'n ram kaihhruai tum dan ziaka an tlãngzarh bakah politik dawhsan aṭang leh social media hrang hrang hmangin an inpho lang ṭhin. Inthlan result puan hnuah sorkarna chang lo apiangin "an chak loh an pawm thu leh insiamṭhat nan hman an tum thu an sawi ziah a; sorkar a inthlaka insiamṭhat tum khan a ngai bawkin a sukthlek a tidanglam leh ngai hlei lova. Mipui bum hi a nuam phian a ni ang.
LMC inthlan zawh takah khan rin phak bakin ZPM khan hnehna (absolute victory) a chang a. Eptu lama thu tur awm lo lekin political party dang an ãrtelukãwn vek a nih kha! Heti a nih takah chuan ZPM hlangin rorelna an kalpui dawn chu a ni ta a. Nationalism aia nepotism a hluar chuan headquarters lama an pute ãu hla (slogan) "Kalphung thar" (new style) hlim thla a lo lang dawn tihna a ni.
LMC sukthlek dan azirin Nov. 2023 inthlanpuiah hian ZPM hian a chhiatpuiin a thatpui thei a ni tih a hriat theih. Chuvangin, kalphung thar (new style) hlimthla lo lang tur hi Zoram mipuiin an chhiar, an thlir reng e, an awmdan zawng zawng an hai lo, Mizo nunmawi leh sorkar ṭha, LCM-ah hian hmuh an tum dawn Hmuh tur a awm loh erawh chuan ZPM ãu hla (slogan) 'Kalphung thar' tih hi dár ri emaw dãr benthek ri mai mai emaw a lo ni ve ang.
- Dr. C. Lalrampana