HNA THAWH TUR TAM SE

Ram chang­kangah te chuan Sawrkarin hna­thawh tur a siam tam bakah Corpo­ration lian, Semi Govt. Body Com­pany leh Private farm ten nasa taka hma lain, hnathawh tur tam tak an siam chhuak a. Hna a tam chuan thawktu an tam a, thawhchhuah pawh a lo tam leh zel a, reiloteah ram chhung mite ei sen loh an thar chhuak ṭhin. Mi ramte intodelhna chhan ber chu hna thawh tur a tam vang leh hna thawktu an tam vang a ni.

Kan ramah pawh hian thuneitute leh mi thiam zawkten hnathawh tur a lo tam zawk theihna turin hma la zual zel se.

Israel fate pawh Indopui pahnihna hunah khan mi maktaduai ruk lai chu suat chimih ni mahse, an ram te reuh te, ram ro, tuihna tlemna, chhengchhe takah bul ṭan ṭhain, nasa takin hna an thawk a, tunah chuan ram intodelhte zingah an lo awm pha ta a ni.

Mi ramte bul ṭan dan leh hna an thawh nasatzia te ngaihtuah ila, kan ramah hian ram tan engnge kan thawh chhuah ve le tiin ngaihtuah ila. Israel rama zu pemthla te chuan, ‘kan tan hnathawh tur zawn a ngai lo, hna hian min zawng zawk, a zawrhin min rawn zawrh zawk a ni’ an ti. Hnathawh sen loh kan neih ve hun a nghahhlelhawm khawp mai.

Office chhungah hnathawktu an dah tam ang hian, Office pawn lamah Labour Employment tam tak a lo pian chhuah theih nana hmalak te chu a ṭul ngei ang. Kan ṭhalai thiamna sang tak tak neite chuan Mizoramah thawh tur an zawng a, an hmu zo lova, mi ramah hna a lo tam si a, an va thawk ta zawk a ni.

An zirlaia chawm lotu an lehkhabu man leh fee te tumsak ngai lotu ten an thiamna an chhawr ta zawk ṭhin a ni. India pawh hian a mi thiam rual USA a thawk daihte chu lak let a, India rama thawh tir an duh rilru reng an ti.

Kan mithiam rual ram danga hnathawka awmte pawh Mizoramah ngei hian thawh tur neiin thawk zawk sela, kan ram hian hma a sawn phah ngei ang. Mi rama hnathawh experience ṭha tak lo nei tawhte chuan kut hnathawktute hi min hruai sela, an zarah hnathawh sen loh lo piang hlauh sela.

Kan ram tan hian engnge kan thawh chhuah ve theih ang tiin ngaihtuah zawk ṭhin ila, chutiang atan chuan kan ṭhalai mithiamte hian Zoram tan Zoram­ah hian thawh tur zawngin an inring reng a ni.

- H. Neihchungnunga

Durtlang North