MAMIT KAN VANGLAI LEH C.D BLOCK-VI

Covid 19 vanga khawi­mah chhuak hlei thei lo a kan leh in chhung sekrek tak ngial pawh khawih peih loh chhuanlama nunhlui ngaih leh lunglen hrikthlak nana Mamit kan vanglai leh C.D. Block tih part VI kan ziak thei a, ka lawm khawp mai.

Mite anga thuril leh ngaihnawm tak han ziak tur hre lem hek suh i. Amah­erawhchu, ka beisei phak hauh loh ṭhian ṭhate leh a hriat pawh min hre fumfe lem lo, lo chhiar fuh hlauhten an lo tuipui ve in, chhunzawm leh zel tur awm se tia min rawn fuihtute erawh chuan ziah zel turte min ngaihtuah tir a. Tun aṭang erawh hi chuan Mamit C.D Block erawh kan bye bye tawh ang. Heng hunlai a kan thil hriat leh tawn te erawh ṭhangtharten a thawnthu hriata an hriat zui atan tal tarlan erawh tum ila.

Mamit Grouping Centre a Asst. Deputy Commi­ssioner rawn awm te an insawn chhuah hnu chuan Pu Lalphunga Sailo chu A.O/ B.D.O ah a rawn awm a. Ani rawn awm chhung hi a rei lem lo na in, amah kha mi danglam tak, ṭhenrual kawm thiam tak a ni a. Mamit District Headquarter pawh hi sawrkarin W.Phaileng a awm tura a tihfel tawh chu Mamit a sawn leh tura theihtawpa beitu a ni. A hun chhung a thil thleng ṭhenkhatte :

1. LOKICHERRA (ZAWLNUAM) C.D BLOCK HAWN NI :

Ram buaiin ziaawm lam a la pan thei meuh lo chungin, India sawrkar chuan hmasawnna lam hawi ṭanin C.D Block thar te a rawn hawn belh zel a. Aizawl West lamah kum 1974 kum tir lamah Lokicherra (Zawlnuam) C.D Block pawh a rawn hawng thar a, a hawng tur hian Pu Lalphunga, BDO/AO Mamit hoin kan thawk thla a. Ram buai la ni bawk nen, tunlai hun anga ropui taka hawn a ni lem lo.

Hmanni lawka Kawrte­thawveng C.D Block Pu Zoramthanga, Chief Minister-in a hawn te kha chu pui tak a ni. Pu C.Lalhnuna, MCS, BDO hmasa ber niin, vawiin thlenga Block changtlung tak ala ni.

2. FAREWELL TO MAMIT C.D BLOCK :

Mamit C.D Block hi kum 1959 a hawn ṭan niin ramhnuai pilril tak ang mai, motor pawh la lut lo, in za (100) pawh la tling ṭha ṭhum lo, Rangva in hlui tak pakhat chauh awmna, Govt. Primary School pakhat leh Private Middle School hawng tir khua, Presbyterian Kohhran Pastor ṭhuthmun, Zadeng lal Pu Thanṭhuama lalna khua a ni a. Tlangdung zet zet a awm, ngawpui chhah takin a hual vel khua a ni a. Ramsa a tamin sava chi tin; Kawlhawk, Vapual thlengin a tam ṭhin khawp mai. Chhuahlam 5 km dawnah Tut lui a awm a, tlak lam 6 km dawnah Teirei lui a awm bawk a. Heng lui aṭang hian Silchar leh Karimganj aṭangin vai Maji hoin lawngin bungrua chi hrang hrang an rawn phur chho ṭhin a. Chungte chu lui hnar lam thlengin chakkhai lamna a ni.

Mamit dai bul, tuna Civil Hospital leh Police Headquarter Project Field thleng khuan ngawpui ṭhiatin Block Office leh Quarter changtlung tak sak zawh, luah fel vek niin Officer leh Staff pawh an kim thawkhat hle. Rambuai avanga zan khat thil thua mei vapah a chan tak vek avangin leh mumal taka sawrkarin Block function chhoh leh a tum mek laiin W.Phaileng ah C.D. Block chu an rawn sawn leh ta si. Staff te hmun dang leh mahni Parent Department lama kir lo te pawh W.Phaileng Block leh Zawlnuam Block lamah te kan insawn darh ta. W.Phaileng Block ah Pu Zirliana, MCS S/o Rev. Khuanga a rawn awm a ni.

3. MAMIT MOTOR KAWNG LAIH ṬAN A NI :

Kum 1972 ah Mizoram chu ram buai la ni chungin Union Territory (U.T) ah hlan kai a ni a. Hetih hun aṭang hi chuan sawrkar pawhin kawng hrang hrangin hmasawnna tur lam kawng hawiin hma a rawn la ṭan a. Chung zingah chuan thingtlang khawlian deuh leh pawimawh deuh, motor la thlen lohna te chu motor thlentir tumin Employment Generation Scheme (EGS) hnuaiah chak takin hma a la ṭan a. Mamit pawh Luangpawl + Dampui lam aṭanga motor lut turin A/O leh V.C ten hma an la ṭan a. A bul ṭan nan khawtlang huapin hnatlang an ko a, hemi ni hian sawrkar hnathawk leh High School naupang zirtirtu thlengin an rawn thawk chhuak a. Project Field, Luangpawl peng, tuna Pu Khuma kawt aṭang khuan lai ṭanin Pu Lalhnuna, VCP in a chek hmasa ber a, hnatlang mipuiin kan lai ṭan ta. Hemi ni hian khawtlang kan phur bawk a, thawk chhuak kan ṭhahnem khawp mai. Chhun thingpui leh ei tur A/O in a buatsaih a, kan lai thui khawp nghe nghe a ni. Hemi hnuah hi chuan Dampui thlengin Pek khengin mipui tan inhlawhna an siam a, hun rei lo te chhungin Dampui khaw thlenga laih zawh a ni ta mai a.

Dampui aṭanga Aisial kawn inkar erawh hi chu a khamin lunghmun a ni a, laih a hau tak khawp mai. Rev. Liandova Bawng lumna an tihlai phei chu Ar-lei dawha siam a ni nghe nghe a. Aisial kawn aṭangin tlak lam hawiin Daplui pawh thla turin a awlsam leh motor kal theih hramna tura zawn leh laih a ni. Mipui kan phurin khawtlang hotuten hma an la chakin, mipuite min chawk phur bawk a, High School zirtirtute pawh Pu H.Ralliana, Headmaster hoin an rawn thawkchhuak a, Pu Lalphunga A/O leh Pu Lalhnuna, VCP te nen Dampui bul Pholeng tlangah Ainawnpari Camp sain zan hnih dawn riakin an rawn thawk chhuak a ni. Anni ho hian kawng laitute hna enpuiin an hlawhte sem pahin Daplui chhuah thlengin an zuk kal a ni.

Mamit ah motor lut ngei se mipuiin an tih em avangin EGS hnuaia kawnglai a inhlawhfa te pawh an tang bawk a, an lai zo thawkhat ta. Pu Lalphunga A/O pawh Aizawl lamah a insawn ta, a endik turin Bawrhsap in Pu W.Chawnglungmuana a rawn tir a. Mamit V/C te nen nithum zet Mamit-Dapchhuah inkar EGS kawng chu an endik hnu chuan Driver Senior leh huaisen deuh tan chuan a kal theih mai ang chu maw, tiin Aizawl lamah a kir leh ta.

Part VII ah ropui takin Mamit ah motor zawn luh a nih thu rawn chhuah leh tum a ni.

- LALHMANGAIHA SAILO

Holy Cross Bakery