Lunglei Last Minute
Politics thiam tak tak chu Last Minute-ah an hlauhawm an ti teh chawk a, Lunglei Municipal Council-ah khan inthlan hma zanah khan ipte ak an vak sup sup an ti. Lunglei inthlan ni khan ipte in zen sak te leh GPay pawh a lar an ti.
Zemabawk Local Council By Election-ah pawh khan chutiang chu a awm leh a. Zu in lei sak te pawh a tam an ti a, tun ṭum chu mipui khan Last Minute hmain ngaihdan an siam fel hman an tia lawm. Last Minute hi vote thlak dawn ṭepa voter rilru hruai peng tura pawisa sem an sawina niin keia hriatthiam ve dan chu a ni.
Inthlan dawn hnaiah hian pawisa sem te, therhlo sem te hi a thleng ṭhin an ti a, finfiahna awm lo mahse a rinawmna chu Mizoram khawvela Politics ṭawngkamah hian Last Minute tih hi a awm. "An boruak chu lian hle mahse Last Minute tak takah chuan Veteran Politician chu an hneh leh chuang lo ang," an han ti a. A hma pawha an lâk theih loh mihring Last Minute ah an la thei a nih chuan thil dik lo a nih ngawt loh chuan Voter zawk kha rilru a buai ta thut a nih a ngai a, vote tur meuh chu kan ngaihtuah lawk ṭhin tlangpui a ni mi a nileng lo chuan.
Thil lawmawm kan hmuh chu a ZPM tling tih lam kha a ni loa Last Minute in hna a thawk nep ta kha a ni. He inthlanna hi Mizoram hlimthla ni thei se, kum 2023 inthlan lo awm tur hi a hahdam thlak dawn a ni.
Sal pawh ni lo, ran pawh ni lo kan han in lei tir ringawt hi chu kan inngaihtuah chian a ngai a, pawisa an sem a nih pawhin pawisaa lei theih loh mihring kan nih a ngai. Chief Minister Pu Zoramthanga thusawi Hnam Runa mi YouTube lama ka lo hmuh kha Saski pawisa (A spelling ka hre lo) a hmachhuan zia leh SEDP pawisa hmanga an chet dan tur a sawi khan ka ngaih a ti ṭha lo. Congress khan pawisa an ngah ṭhin thu leh pawisa nei lo zawka ṭanga Congress chet dan an thlir thu te kha a sawi a, tun kuma MNF Candidate chuan pawisa an neih dawn thu a sawia kha thu kha ngaihthlak a va han hrehawm ve le.
Last Minute in a tih buai zawh loh voter kan pun a ngai a ni. MNF, Congress, ZPM te hi an danglamna kan hmu dawn a nih chuan Last Minute lo ngam zawng hian intih siak se. ZPM hian hetiang thil hi an practice ve a nih chuan Kalphung Thar an zawrh hi kan ring dawn lova, Last Minute ti tawp ngam Party hi an awm a hun ta a ni Mizoramah hian.
- Lalmuanpuia