Hausa tawntaw ram hruaitu neih hi a zahthlak

Tunlai chu Social Media a chak bawk a, kan ram kan vei tlang malh malh hle. He Social Media khawvel hian a tarlan tlangpui chu inlawm luh, ram hruaitute thil ṭha tih (damlo kan, chhiat tawhna hmun pan, mitthi in kal, accident hmuna kal, thil hawng etc etc etc) bakah party dang inbeihna thu hriam tak tak a ni. Kan tarlan tlem si thil serious tak chu ram hruaitute hausa uchuak hi a ni.

Kan ram hruaitu zingah hian fet taka teh pawha hausa ngei ngei tur an awm. Sumdawng hausa chhung­kua aṭanga sei lian te, hausa chhungkua ni sa te, sum lakluhna hriat sa pawh an awm. Nimahsela an chhungkaw background en pawha neih nei em em lo, eizawnna ngialnghet an neih ṭhin pawh hriat ni lo tun hnaia hausa thut thut tam ta lutuk hian kan ram hruai­tu­te hi rin a ti harsa tawh a ni.

Mi ṭhenkhat background chu zirlai hruaitu an nih leh chumi hnua an awm dan hriat zui zel, registered goverment contractor an nih pawh hriat si loh chunga hausa tlat si an awm a, hausa satliah aia hausa tawntaw kan ram zim te ah an tam ta lutuk hi vei a ngai.

Minister nih tak avanga hausa em em kan Politician ṭhenkhat hi chuan an eiru a nih si loh chuan dan pelin sorkar zar an zo hle tihna a ni. He kan Zoram zim te ah hian politician hausa thur thur kan neih chhung chu chu mite chu Officer lamin an hlau ngai lovang a, officer eiruk duhten hlauh nei loin an tih phah a, hei hi ram ṭhan mawh bawk chu a ni.

Chief Minister kan neih tawh te pawh hi han chhut ila an family business emaw known source of income lam han en ila heti zat zat hi an nei thei dawn em ni le? Hetiang hian Minister hlui zawng zawng hi teh dawn ila rin aiin kan politician hi an lo hausa rual a, hei hian eiruk kan tih hi a lo kai rual hle tawh zawk tihna a ni thei em le? Tuna Minister ni mekte pawh hi han bih chiang ila, bih chian chuan thil fuh lo kan hmu kan hmu dawn niin a lang a, hetiang thil hi mipui hian i chik teh ang u khai.

Eiru kan tih hian a ziaha ziah bo lam hi chu an ti tawh vak lo. Tunlaia an tih dan tam tak pakhat chu miin contract hna Rs 100 a pe ta a, a pe tu Minister hian Rs 10 a la phawt a, a bang Rs 90 khan hna a thawk ta a, hna in a tuar a, Minister a hausa ta ṭhin a ni. Rs 100 aṭang hian Rs 10 mai kha a lo ni hmel si lova tun lai chuan Rs 20 te, a aia tam te an la an ti a nih chu! Party worker phei chu an ṭam leh zual a, hnathawhna tur pawisa Rs 100 awm aṭangin Rs 40 te, Rs 50 te an la phawt an tih chu. Pawisa hi nuai 100 bi a nih chinah chuan hna petu Minister chan hi a sang ta a ni.

Thil dang leh chu engtirna atan kawngpui laihna tur Compensation ang te pawh hi thuneitu zingah hian kawngpui kalna tur lo hre lawk an awm ta a. Tichuan chu mite chuan a ram neitute hnen aṭangin Rs 20 lekin an lei ta a, compensation an lak meuh chuan Rs 20 kha Rs 100 ah an chan tir chho a, thuneitu lam hausa ṭhang uak uak hi an awm ta a ni.

Lengpui Airport leh Zokhawsang tih aṭang tawh khan hetiang hi prac­tice a lo ni tawh an tia, Vairengte Highway tharah pawh ram neitu tak tak chu thiltithei politician, official leh mi hausa niin a chang tam fal pawh an awm a, an hausa awk awk mai niin an sawi. Hetiang hian Highway compensation chang ni lovin sorkar ram leina tur hrim hrimah hian kal pui a ni a, a neitu hmasa aia hlawk Minister a awm theih a, sorkar official pawh an ni thei a, chu mite chu an chet dan an hausak tawntaw hnu hian a hriat theih a ni.

Duhamna hian chintawk a nei lova, man chhuah lohte pawh hi tuna man chhuah loh mai an ni a, nakinah chuan ṭhangtharten an la hai chhuak leh tho ang. Politician known source of income leh an pawisa neih inphu lo lutuk hian kan ram hi a tichhia a ni. Social Media khawihtute hian hetiang lam hi rawn chhui taima deuh se, party inbeih luai luai aiin ramin a hlawkpui zawk dawn a ni.

- Lalmuanpuia