MISSIONARY HNARUAK A TAM

Mizo Kristiante hi India ramah hian a vannei ber kan ni hial awm e. India ramah hian ram pawn aṭanga Missionary lo kal hi thil tihtheih loh tawp a ni hial ta. Keini Mizote erawh chu a ram mi kan nih avangin kan zalen a, India ram khawi laiah pawh eng lai pawhin Chanchin Ṭha kan hril thei reng a ni. Tuna kan tih dan Direct Evangelism aia hlawk zawk leh thil ti thei zawka kan thawhna tur a tam em em a ni. Kohhranin a hrana pawisa sen ngai hauh lova hlawk tak sia kan thawh theihna hi kan hmang thiam tawk lo mai zawk a ni. 

“Chanchin Ṭha hril” kan tih hian, “Isua lo ring ve rawh u, Kristianna hi a ṭha a ni,” tih lung lung chauh hi a ni lova. Chuvangin, India ramah hian Chanchin Ṭha hril turin, sum leh pai ngaihtuah ngai hauh lo leh a thawhna tur hmun pawh buaithlaka kan zawn ngai hauh lova duh tawka kan thawh theihna tur hian India sawrkar ber hi a inhawng zau em em a ni. Chumi atan chuan India rama hna sang ber, India ram ropui chelh dingtu ni hial level-a kan thawhna tur atâna inpe thei kan awm phawt chuan India sawrkar hian kan thawh a phal êm êm a ni.

UPSC-in exam a conduct 

ṭhinah hian Mizo ṭhalaite'n kan luah ve theih hnaruak tam tak a awm a. Ka sawi Missionary hna hi tisa thil tak pawhin a hlawh hi a sâng a, khawvel mi lian nihna hial a ni. A qualification pawh a nêp lo : IAS, IPS, IFS etc. val, chumia tling thei mi thiam nih a ngai bawk a ni.

Pathian lehkhabuah pawh hian hmanlai aṭang tawhin sawrkar mi lian zingah Pathian mi, mi ṭangkai leh ropui an lo awm fo tawh a ni. Entir nan Mosia - (Aigupta thiamna zawng zawng zir zo), Josefa, Daniala, Nehemia, Estheri, Mordekaia te ang kha, an hunlaia sawrkar hna lian chelhtute, hmun pawimawha ṭhu an lo ni. Chutiang chu tunlai khawvelah pawh Pathianin mi a la zawng reng a ni.

Kan hriat ṭheuh angin keini Mizote hi Chanchin Ṭha avang liau liauva tun dinhmun hi thleng kan ni. Kan A, Aw, B... te hi Chanchin Ṭha min pek a ni a, chuti a nih chuan kan zirthiamna zawng zawng hi Chanchin Ṭha avang vek a ni. Chu Chanchin Ṭha chu a hre lo hnena hril tur kan nih hi kan hre ṭheuh. Vawi khat chu kum 1962 vel khan Shillong-a zirlai - B.A, M.A zirlaite zingah piantharna a thleng a, chung mi thiamho chuan hun puma Pathian rawngbawl an châk thu leh an harsatna an sawi nak nak hlawm a. An han ngaihtuah a B.A/M.A passed hnuah B.D zir turin kum 3 lai a la ngai si a.

Chu achhapah B.D hlawh chu a tlêm êm êm mai a. College-a an stipend pawh a zah lo a ni si, an buai hlê mai! An hnênah chuan, ti hian ka ti ta a. “India ramah sawrkar hna eng pawh hi Pathian rawngbawlna pawimawh tak a ni thei a ni. Sawrkarah officer hna in thawk thei a, in office kha ring lo mi, sawrkar hnathawk officer dang te dawhkan aia a fai zawk leh sawrkar tana rintlak zawk nih mai kha Chanchin Ṭha hrilna hlu leh ropui a ni e” tiin. Chu chu vawiin thleng hian a la dik reng a ni. Chuvangin, nula leh tlangval - B.A, M.A rualte u, Missionary rilru puin sawrkar hna lian beisei rawh u.

IAS, IPS, IFS etc. missionary ropui leh thawk hlawk ni turin, hetiang mi ni tur hian tun lai ṭhangthar thiamna ṭha tak tak neite hi Pathianin India ram sawrkara a hming pu lut turin a sawm che u a ni. Tunlai hi a hunlai tak a ni leh nghal. Kan mi hmasa IAS, IPS etc. teho an lo upa ta, an hmun luah chauh pawh ni lo, a aia tam zawk Lalpa'n India ram tan hian a mamawh a, India sawrkar hi chutiang tur chuan a buatsaih mek bawk a ni. He hna pawimawh Krista tana hauh ngam turin thiamna, matric-ah distinction-ah passed tir che u in, letter te a hmuhtir che u a ni asin. Ṭhalai duhawmte u, Krista kohna hai der luiin State service in duhtâwk san mai dawn em ni?

Tun aṭang hian inbuatsaih ula, India ram hi Ama thu ngei, Ama dan thu ngei hmangin leh A thupêk hmang hian, Krista tan i la ang u. Tirhkoh Paula pawhin, “Bâwihte u, Krista thû in zâwm angin, rilrua tihtak zetin, hlau leh khur chungin tisaa in pûte thû zawm rawh u; mihring tihlawm tumte ang mai a, an hmuh lai chauhva thawk lovin, Krista bawih niawm rengin, rilru takin Pathian duhzawng ti ula, mihring rawngbawl mai ni lovin, Lalpa rawngbawl in nih zawk avangin, hlim takin thawk ṭhin rawh,” a ti a nih kha (Eph. 6:5-7). Eng hna pawh thawk ila, kan thawh apiang hi Pathian hna, Missionary hna a ni tih hre rana kan thawh hian Chanchin Ṭha hriltu Missionary ropui kan lo ni reng a lawm. Unau duh tak, Pathianin talent a pek che kha a nihna tur leh a nihna ang taka i hlan khân Pathian rawng i bawl a ni asin.

Pathian rawngbawl kan tih pawh hi eng dang a ni lo. Mihringte rawngbawlsak hi a ni. Tunlai hripui leng avanga khawvel pumpui leh India ram ngei pawh kan buai êm êmnaah te hian All India Service/Central service-a kan mizo lo awm mi tlemte te 

ṭangkai zia êm êm hi kan hre 

ṭheuh mai.

Heng All India Service/Central services-a awmte hi missionary ropui te an va ni teh lul em! Mi tam zawk lo awm phei se la chuan tuna mi tangkhangho hian an va thlamuanpui lehzual dawn em! Heng kan buainate hi Pathian hnathawh awmze ṭangkai zawka hriatfiah nan i hmang u. Mihring finna aiin Pathian finna chu a sâng daih si. Buai thlabarna nia kan hriat chu, Pathian chuan a rawngbawl tura min kohna remchang atan tunah hian a hmang hlauh a nih hi.

Ṭhangthar lehkha thiam Pathian rawngbawl châk tam tak in awm tih Pathianin a hria. Chuvangin, tunah hian a rawngbawl turin India rama Chanchin Ṭha hril tur leh a hna ropui ber Missionary ropui atan a ko mek che u a ni. Pathian min kohna hi mihring benga ri lûng lûngin a ni kher lo. Tuna i thinlunga Pathian hmangaihna awm kha a rawngbawl tura a kohna che a ni e. I thiamna, i theihna hmang khan Pathian sâwmna chu chhângin India rama hna sang ber thawk thei turin ṭan han la teh le.

I vanglai hian I siamtu hrereng rawh, Ni ṭha lote a lo thlen hma leh Lawmna reng reng ka nei lo I tihna tur nite a lo thlen hma hian (Thu. 12:01)