SOLID SEAT MIPUI CHHANNA

Hei hi alawm democracy ṭhatna chu, vai ramte anga in thah tawp tawp awm lova inthlanna felfai tak kan la kalpui theite hi a va ropui em. Ram mipui moral pawh a la fim khawp mai. Party ruihchilh lo kan la inphum ṭeuh tih a lang bawk. Chuvangin, party tinte thil ṭha tiha inel lama ke pen chak a ngai tihna a ni mai.

Party ruihchilh lo

Local Council Bye election result-a kan hmuh chian em em chu, Party ruihchilh lo kan inphum ṭeuh tih hi a ni. ITI Veng chu Local council member pakhat thihna avangin Bye election neih a ni. ITI Veng chu ZPM, MLA leh ZPM, AMC bial chhung an ni. Nimahsela, bye election-ah MNF candidate a tling nalh mai. MNF candidate hi khawtlangin mi fela an ngaih rawn, YMA secretary ni lai niin an sawi. MLA leh AMC inthlana ZPM candidate thlang tling tute khan, party an ruih chilh lo tih hriat nan, an veng pa fel chu an thlang tling nalh mai a ni.

Chutiang bawkin, Zemabawk-ah pawh hun laklawhah Local Council member zingah, party danga inlehna a awm avangin, eng party mahin sorkarna an siam thei lova, a veng pumin Local Council Bye election neih a ngai a. Zemabawk hi MNF, MLA bial a nih mai bakah, MLA inthlan khan MNF vote tamna veng a ni an ti. Chutiang ni si chuan, Local Council Bye election-ah, party ruih chilh lo an tamzia tih lan nan, ZPM Local Council candidate ten Congress leh MNF candidate-te vote belh khawm aia tam ( ZPM = 12899, MNF= 8133, CONG = 4115) vote an hmu phak daih mai. Party ruih chilh lo kan la tamzia hei hian a ti lang chiang hle.

Mipui chhanna chu

Local Council Bye Election result a, Solid seat lo lang leh ta hian, mipuiah lungawi lohna a nasa tih a lang chiang hle bawk. LMC inthlan a solid seat kan hmuh kha, Lunglei mipuiten development-in min thlawh khum an tih vang a ni deuh ber a. Lunglei mipuite thik khawpin, MLA bial 5 huam chhunga sum sen aia tam, Chief Minister bial pakhat lekah sum sen a tam zawk a, chu chu Local Council Bye election campaign laia MNF te campaign hlaah pawh Lunglei mipuite thik khawpin he bialah duhsakna in dawng a. A chhanna in pe let dawn lawm ni? tiin an au chiam a nih kha. Mahse mipui chhanna chu, kan lungawi bik chuang lo tih hi a ni tlat mai.

Eng vang nge ni ta ang le? ṭhahnemngai taka an vulh, MLA bial 5 huam chhung aia tam, anmahni bial chauhva suma duhsakna tam zawk dawng siah hian lawm viau awm tak. Engatinge a vulhtute vote lo a, mi dang ang vote chiam mai le. A chhanna chu mipui thinlung a la hrisel tawk a ni kan ti thei ang. Mizo upa ten, sem sem dam dam, eibil thi thi, an lo tih ṭhin kha, kan la nunpui tihna a ni.

Development in khai rual lo hi a tuartu chu mi rethei zawkte an ni tlat si. Zemabawk mipuite hian duhsakna an dawn hi an lawm lo chu a ni bik lo ang, mahse duhsak bik nih ai chuan, hmasawnna inkhai rual hi Zoram mipuite mamawh a ni zawk tiin an vote hmangin an rawn au chhuahpui a ni zawk awm e.

Thil ṭha tihah inel ang u

Delhi Chief Minister chuan an thil tih ṭhat, vote zawn nan an hmang piap piap mai a. Delhi khawpui tana Damdawiin ṭha tam tak hawn belh leh electric bill leh tui bill mi rethei tana free te, school ṭha an dinte chu an chhuang larh mai a. Delhi khawpui a kawng chhawng an siamte chu, estimate aia tlema an siam zawh theih dante chu hmachhuanin, Panjab inthlanah an champion pui nghal a.

Panjab Chief Minister lah chuan an Health Minister Vijai Singla chu a department a hna thawkte hnenah, 1% zel a lo lak thu report a dawng a, Health Minister hnenah an hekna chu a dik leh dik loh a zawt a. A pha ngam si lo va, a ban nghal hmak mai, police in an la man zui. CM chuan "Duh ni ila he thil hi ka puanhnuai thei lutuk. Mahse, chutianga ka tih chuan ka chunga rinna nghattu mipuite min rinna a ti keh chhe vek dawn tih ka hria... eirukna hi cheng khat pawh nise ka ngaizam mai mai dawn lo" a ti e an tih chu.

Delhi CM-in an kawng chhawng siam dan chhuang taka a aupui laiin, keini Airport kawng chhawng siam lah chu a chim dur mai bawk si a, a siamtu lah kan sawisel nuai nuai mai bawk si. Khua hi a la var lo deuh chu a ni.

Insawi mam hi chu a awl, tual thattu ngei pawh a inpha mar thei, insawi mam ngai thil tih aiin, thil ṭha tih chhuan tur hi hnutchhiah zawk ila. Kan thil tih ṭhate Vote zawn nan hman tum ṭheuh tawh zawk ang u.

- Lalrinliana Colney