HINDUTVA A RAWN THLENG VE TA EM NI?
All India Radio English news hian Hindi-a thusawi lakhchhawn/ tihchhuah an nei fo ṭhin a. English news chu Sapṭawng thiamten an ngaihthlak ṭhin a ni a. Hindi news chu Hindi thiamten an ngaihthlak ṭhin a ni.
Hindi thiam lote ngaihthlak atana English news-a Hindi-a thusawi tihchhuah hi a dik ber lo, tiin thuneitute hnena thlen turin kan Lok Sabha MP pawh open letter ka thawn tawh a, min chhang lem hlei lo va.
Tunhnaiah hian All India Radio Mizo chanchinthar-ah hian Hindi-a thusawi an rawn tichhuak ve ta ṭhin a, a mak ka ti khawp mai. Hindi thiam hi a pawimawhin a ṭangkai a, central sawrkar pawhin tihhmasawn hna a thawk reng tih kan hria. A thei thei chuan thiam pawh kan tum tur a ni.
Amaherawhchu engkim tan hun leh hmun a awm an tih ang hian Hindi thiam lote ngaihthlak atana Mizo Chanchinthar puan huna han tih chhuah hi chu a hun leh hmun niin kan hre ngang lo a ni.
Eng pawh hi INBARHLUIH chu tihdan ṭha a ni lo va. Hindutva hian kan ram a rawn thleng ve ta nge nge em ni? tih zawhna kan han zawt a ni e.
- M Lalmanzuala