SEM SEM DAM DAM EI BIL THI THI

Covid 19 hrilengin a vanglai a thleng kan ti dawn nge kan la pun belh zel dawn hriatthiam a har chho viau mai. Sorkar kan duh khawp lo, Total Lockdown turin kan theihtawpin sorkar kan nawr a, kan hlauh ber kan hripui hmachhawn mek hi nge kan hlauh zawk lei zawh san? Tun dinhmuna a lan dan hi chuan petrol neih lohte, ei tur neih loh ni lovin a chuangliam (stock) neih loh kan hlau ber niin ka hre deuh ṭhin. Covid-19 virus hi a theory-a hlau deuh chauh em ni kan nih?  Petrol pump-ah social distancing awm mumal hlei thei lo a, petrol nghei kan hlauh avanga kan intlar put maite kha inngaihtuah nawn kan ngai e. 

Hmanlai kan pi leh pute chuan 'sem sem dam dam, ei bil thi thi' tih thu chang chawiin a nei zawkten a nei lote hnenah an buh thar leh an thil neih dangte duhsak takin an inpe tawn ṭhin. Tunlai khawvelah erawh a nei fate duh tawkin kan bazar a, kan neihsa reng leh aloa kan awm theih reng pawh stock neih tlem bik hlauvin kan hmanhlel a, lockdown an puang chiah a, kan buai phili ta chiam ṭhin. Ṭhenawm hnaia nei lo zawkte kan bazar kep a nih chuan thuhran. A sapṭawngin 'panic buying' kan tia kan va ngai hrang deuh emaw ni dawn ni! Lockdown an extend thu kan hre chiah a, dawr tê hnaivaia mi a rem rem kan neihsa rengte pawh kan han lei belh ta chiam ṭhin a, sum lama harsa leh lei khawlna tur nei ve lote hi engtin tak awm ve ṭhin ang maw. 

Sorkarin ni 16 August aṭanga 21 August zing dar 4:30 am thleng Aizawl Municipal Area ah Total lockdown puan a ni tih thuchhuah a rawn awm chiah a, ni 4/5 chhung leka kan ei khawp a tam dawn loh teh lul nen, entirnan tel litre 1 pawh hi chhungkaw pangngai chuan kar khat kan tla ṭheuhin a rinawm, ni 4 vel lockdown an puan vang khan pack tam tak lei kher eng nge a ṭulna? Kar khat chhung chuan dal pawh KG 1-in min daih ngei ang!  Dal pack tam tak lo lei bikte chutiang zelin artui leh kan ni tin mamawh dangte pawh lei zawh vek kan tum emaw tih mai turin mi dangte ngaihtuah lek loin kan vai hma pawp pawp mai ṭhin. Ringtu kan nihnate, Mizo tlawmngaihna kan sawi kan sawi ṭhinte hi a taka kan lan chhuahtirna hun tur tak a ni dawn lawm ni? Fiamthua kan sak 

ṭhin, "Mi zawng zawng thi vek se, keimah chauh dam ila," tih hla kha ka hre chhuak zawk mai! A dawt leh chiah khan a rawn hrilhfiah chiang viau, kan mit del leh si se!  A va retheihthlak awm tho siin, a va nuam  dawn chuang lo em.