House-a hming lem inphuah hi

Mizoram Assem­bly House kan ram rorelna in sang berah hming lem mak tak tak kan hotuten an inphuahsaka hei hi a chin tam chi loh khawp mai, ṭhangthar ten an hriat reng dan tur a ni tawh a, thil ṭha lo tak a niin ka hria. Kan rorelna in sang ber hi zahawm taka kan dah a ṭul a ni.

Tun hnaia hming lem inphuah pathum hi han thur chhuak ta ila. Keini aia Assemby Session chik tute chuan thur chhuah tur dang pawh an la hre nual ang.

Dampa Savawm: Dampa bialtu zahawm tak Pu Lalrintluanga Sailo chu House lama an inhnial nasat hnuah ZPM Leader Pu Lalduhawma chuan, 'Dampa Savawm' a ti zauh mai a, hei hi Assembly House chhungah a tawp ta mai lova, Mizoram pumah Social Media ah a darh ta chuai chuai a. Tunah chuan Dampa Savawm tia hriat zui a ni tur hi a political history-ah a chuang dawn a, hetiang hi member zahawm tak intih ve ve atan chuan a mawi lova, chin tam tawh loh tur a ni. Mihring hming pawh ni lo in phuah sak hi a puitling lo a, Chief Minister nih tum tan phei chuan chin loh tawp tur a ni; inzah tawn tur a ni.

Bawhchaka: Aizawl East II Bialtu leh Mizorama Sports Minister awm tawh zawng zawng zinga hnathawk ṭha ber lawr laka mimal taka ka lo dah Pu Robert Romawia Royte chu Pu Zodintluanga'n Minister bawh chak tak tiin a chhaih zauh a. A sawi chhan hi hnathawh lama chak a tih vang ni lovin Social media lama hmeichhe pakhat nena an inbiakna nia an puh leak out bawhzuina zel a ni.

He thil hi chu Social media lamah khan tawp zui tir tur a nih laiin Minister ṭhankin leh Legislator Senior chuan Assembly House-ah luh puiin amah aia Sports Minister chak zawk chhaihna atan a hmang a, hei pawh hi Social Media lamah bawk a punlun a, Minister chak tak kan tih rualin a negative zawng hian a ti chhuak tel ta tlat mai hi ṭawngkam ṭul lo zeh tel vang a ni a, ṭhangthar hriatah chuan thil chin zui tawh loh chi a ni.

Mr 25 Percent: Aizawl West II Bialtu zahawm tak, Revenue leh Rural Development changtu Pu Lalruat­kima chu Assembly House chhungah Pu Zodintluanga bawk niin ka hria, "Mr 25% an ti," tiin sorkar sum che velah ei nei angin amah metion duh chiah si lovin zawhna angin a puh fiam a. In chhaih fiamna ang niin ṭhian infiamna ṭawngkam a an zawk laiin Social Media lamah chuan 25% ei ve zela in puhna lian tak a ni.

He inpuhna pawh hi Social Media ah bawk put darh a ni a, Minister ṭha takin hming mawi lo tak a pu zui kumkhua dawn a, finfiahna awm chuang si lovin hming lem ṭha lo tak a pu reng tawh a ni. Assembly House ṭawngkam hi fimkhur a ṭha a, kan ram roreltu ni ve meuh hi chuan midang va chhaihna a nih pawhin an fimkhur a ngai.

- Zonunsanga