Tunlai politics titikhawchang

1. Inthlan result leh party 2:

Zemabawk LC inthlan result hian tuna Aizawl (politics) dinhmun a reflect chiang viau ang. CM bial, development thlen nasatna ber hial turah heti khawpa MNF an chhia a nih chuan Aizawl bial dang pawh hi ZPM tan bial him vek a ni a tih ngam.

Lunglei MC inthlanah ZPM in an hui fai vek a, an hnehna a sang em em vek bawk. Chumi hnu lawkah Zemabawk LC inthlanah ZPM in an hui fai leh vek a... thla thar tir lamah CADC inthlan lo awm leh tur pawh hi a ngaihnawm leh viau turah ngai ang.

MLA inthlan kuma inthlan tesep dang awm hi party ṭhenkhat tan a pawi thei a, a ṭhen tan a lawmawm thei…insiamṭhatna atan leh hmasawnna atana hmang ṭangkai thiam an vannei ang chu. Politician-te inhnial fona chu local bodies inthlan hian a hnu a general election (MLA inthlanah) awmzia a neih leh neih loh thu hi a ni. Kumin a inthlan 3 pawh hian kum tawp lam inthlanah hian awmzia nei tak maw...

2. Lunglei leh Aizawl Hegemony:

Politics chhiarkawp mawl te a chhut chuan Lunglei khawpui leh Aizawl khawpui a chak chu Mizoram pumah pawh an chak chiang viau ang. Aizawl leh Lunglei a bial a tam hnu (2003 hnu lamah) phei hi chuan khawpui pahnih a seat la tam hi an sorkar zel, a pakhat zawk tala lak tam a ngai ti pawhin a sawi theih. Chuti a nih chuan tun ang trending hi a kal reng chuan MLA inthlanah hian ZPM hi an chak hneh rem rem khawp ang.

ZPM thli tleh kan tih hi Aizawl leh Lunglei-ah a nasa ber a. Kum tawp lam thlenga a tleh phawt chuan khawpui pahnihah hian party dang tan chance a awm lo ang ti zawng pawhin sawi ta ila... mipui lawm loh zawng tak candidate an neih erawh chuan thudang... an in set-hlum khut thei tihna

3. Thilnung pahnih:

Pu Zoramthanga leh Pu Duhawma te inan lohna langsar tak chu - pakhat hian a tuipui ngai leh a sawi ngai, a atchilh ngai a thlah thei lo a, mipui nin khawpin a sawi zing a. Pakhat hi chuan issue based-in thil a sawi ṭhin a, a tuipui ber hriat theih loh khawpin a tui kual a, a fukna zar a thlak mai hreh lo.

Thusawi an thiam dun em em a, kum 40 dawn kal ta chhung khan thu pawh an sawi tam dun a, an thusawi a la ngaihnawm dun em em reng. An thusawi thiamna hi patent tlak a ni, (an DNA hi clone theih ni se, dah ṭha ila, ṭhangthar zel pawhin an mamawh ang). Thusawi thiam hi political leader te tan quality pawimawh tak a ni. (Anni pahnih hian an thusawi tam tak hi an umpha lo nasa ve tho a... chu chuan an moral integrity a hril bawk ang... sawi zui ru)

Pu Duhoma hian Pu Zorama nena tunhmaa an inkawmngeih ṭhin thu min hrilh tawh a, an titi dun tak tak phei chu ṭawng an inchuh nasa ṭhin viau a ni awm e. MNF a an awm dun lai a an zinnaah hotel room pakhata an riah dun ṭum phei chuan an titi tui lutuk a, an tlaivar thak an ti. Justina hian chumi ṭuma an titi a ngaihthlak chakzia a sawi fo mai... anni pahnih titi ngat chu ngaihthlak chakawm deuh asin.

3. I zin tam a sawt

Pu Duhoma hi MNF GS a nih lai te kha chuan a zin kual nasa a, an party tawtawrawt a ni ṭhin. ZNP ah kha chuan inthlan kum a campaign rusum thlak hun lai vela a zin kual bak kha a reh vang vang ṭhin a. A zun a uai leh an party tuipuitute kha NLUP leh MIP thli tleh karah khawhar takin an lo awm ṭhin a, kum 5 hnu inthlan dawnah a rawn hrut kual leh chauh ṭhin a. Hma pawh an sawn hleithei lo reng bawk a. Zep thu a awm lo ZNP ah khan inthlan kumah mi lawk tak tak an lut ṭhin a, mahse, inthlan zawh hnu lawkah an kal bo leh ṭhin a nih kha.

ZPM an nih hnu hi chuan zin kual pawimawhzia a hre ta nge, a bial aia hla a kal kual nasa ta hle mai. Hripui kian hnu aṭang phei chuan Pu Sapa nen hian an zin kual nasa khawp mai. A ṭul bawk a... Chumi rah chu an tel tih a chiang, khaw tinah, a chengker deuhah pawh ZPM ruh tak tak an awm zel tawh.

4. MNF vs ZPM

Tunlai a MNF leh ZPM inan lohna langsar tak chu MNF hian mipui hmaa thusawi tur an vân ta khawp mai. CM leh minister/ MLA ten thu ṭha deuh an sawi pawhin mipui an chhaih kawlh zel chu a nih ber hi. Social media leh Toonlaini lamin an lo bei let hrep zel a. MNF hian public darling an nei lo hi an tuar, sorkar thiltih ṭhat leh hmalakna ṭha tak tak pawh an puangzar hleithei lo a nih hi.

ZPM chu atua pawh mai hi public darling an ni zel mai a, an sawi sual leh khap dik loh pawh an hmu mam vek mai zel. Assembly session a an MLA ten an sawi fuh loh chang leh an chet chhiat deuh pawhin an mualphopui hleithei lo a... social media zarah an che ṭha ber zel mai…ZPM support hi a trendy khawp mai tunlai chu.

A tawp nan Aizawl leh Lunglei a chak filawr nih hi kum tawpa sorkar tum tan chuan a pawimawh khawp ang le… heng khawpui pahnih huhang (hegemony) hian ram pum a al chhuak ṭhin si a... han ṭang dun tak tak teh u. Aizawl municipal awptu MNF vs Lunglei municipal awptu ZPM... Pi leh pu chena kan ram Zoram vul zel rawh se.

- Lalthlamuana Ralte