IFMIS LEH SAWRKAR HNATHAWK HLAWH CHUNGCHANG

Ni 24.4.2023 Vanglaini front page-a Finance Department hotuten IFMIS chungchang an rawn sawi, Department lama a khawihtute an rawn mawhpuh daih hi, anmahni insawifiah tumna mai a ni.

He thil hi Finance Deptt. hotuten an hre fuh lo deuh a, tin, thiam chan an tum a ni. An thil sawia dik chu, kum 2 kal ta vel khan hmang turin kan ti tawh a tih khi a ni. A dik chiah a, IFMIS atan khan kum 2 hmalam khan hma an lo la tawh a, Department tam takin employee kan enter nasa viau a. A system-ah fel lo a tam em vangin hman lohin a awm leh reng a ni.

Data Field awmsa fill up ang mai mai a ni lo a, chutiang ni sela chuan harsatna kan tawk lovang. Mahse, Accounts matter a nia, mawl taka data field up ang kha a nih loh avangin training mumal nei miah lovin min hman tir an tum a. Hetiang thil hi chu vawi khat mai ni lo, vawi 2 vawi 3 training ngai thil a ni.

Tin, tun ṭum bika hlawh la lo an awm chhan nia an sawi, Department lamin IFMIS an khawih thiam loh vang leh inthlahdah vang, an tih hi chu thu dik famkim lo a ni. IFMIS hi a fel lo em em mai a. Dept tam zawkah hian Computer khawih thiam an awm vek tawh a, chuvangin IFMIS hi thiam loh tur vak a awm lo. Dept a a khawihtute hian, 90% chuan an thiam vek tawh ang. Mahse, eng vangin nge hlawh an lak theih loh? IFMIS lam system fel loh em em vang a ni.

IFMIS ah increment pek mai tur te, transfer mai tur te, Pay fix mai turah te harsatna a tam em em a, chu IFMIS fel loh chu Dept a a khawihtute an rawn mawhpuh ta mai a ni, thil dik a ni lo. IFMIS portal la famkim lo, error tam lutuk vang zawka hlawh la thei lo an ni tlangpui.

Tunah hian Group A ho pay siam fel a ngaih avanga hlawh la thei lo Dept an awm ṭeuh. Hemi kawnga mawhphurtute chu CCA (Chief Controller of Accounts) an ni. An ni hian mi hlawh tur an ti tangkhan nasa a, hmelhriat va neih loh phei chuan biak har tak an ni. Online system a ni a, anmahni va pan ngai miah lo tur a nih laiin, thingtlang aṭang ten an rawn pan a. An approve tura a system a rawn lang, lo approve zeuh mai kha an tih tur a nih laiin an approve mai thei lo a, va biak a, va tlawn titih an ngai (Hei hi anmahni tihmualpho hrim hrim duh vang a ni lo a, thil nihdan a ni).

Group A ho hlawh CCA lamin an chinfel duh loh? mai avangin a hnuailam hlawh tangkhang a tam mai, hei hi Department a IFMIS khawihtute thiam loh a ni lo.

'CCA lam hian an tih tur ti ve se la' tih ṭawngkamte hi a tam khawp mai.

Tin, IFMIS hi a fel lo em em mai a. Luh theih loh chang a ngah em em a. Luh theih an tih hunlai pawha Username dik reng, password dik reng chunga Username hmu miah lo, dik lo anga a tarlan tlat ṭumte hi a tam zawk a ni. Hetianga Online Postal/System fel lo lutuk, la inpeih lo lutuk hi Dept te hmantir an tum a, a system fel loh avangin Dept lama a khawihtute an mawhpuh mek a ni. Finance lam hotute khan min lo hriatsak ula ka duh chu, Dept lama a khawihtute hian an thiam vek tawh, an thiam loh vang a ni lo. Thiam loh chin nei mah se, mi dang thiamte nen an inpuitawn a, an thiam zel. Mahse, an han ti tak tak dawn a, "A luh theih loh,", "CCA lamin an la approve lo,", "Workflow-ah a bo," tih ang rengte a ni reng.

Ṭhenkhat DDO code awm lo, nikum June vela Official Letter nena thehlut thlap, an bawhzui pawha an khawih duh reng reng loh, kumin April thlaa an siamsak chauhte an awm nia! Tunah hian Salary thehlut tawh, IFMIS thawktute lamin Head of Account an la map-sak theih loh te an la awm, hlawh la pek loh te an la awm, chu chu IFMIS lam thil daih a ni. Hei mai a la ni lo, a page loading ringawt pawh nileng lenga nghah ngaite zuk nia! Lehlama update, lehlama approve theih miah loh system te hi IFMIS buai, IFMIS fel lo a ni. An harsatna hrang hrang tlema zawng, khawi mah aw!

1. "Kan pu hi CCA ah a la pending tlat a, hlawh kan siam thei lo". Khawih chu kan thiam vek, mahse, CCA lamin kan Pu hi CCA an approve thei lo, an pending tlat.

2. Employee dang chu kan peih vek tawh, kan pu ber hi CCA lamah approve turin a awm a, an la approve thei lo, chutah chiah chuan kan la tang.

3. Engkim kan peih vek tawh, kan thiam vek a, mahse, Salary head hi kan portal lamah min la map-sak ve lo; IFMIS lamin.

4. Staff ka transfer a, mahse HoD leh DDO lamah approve turin a rawn lang thei miah lo (Hei hi Workflow ah a bo kan tih kha). IFMIS lama complain tawh, la chinfelsak loh.

5. Group A pakhat lek transfer pawh CCA lamin kar 2 chhung pawn an approve thei lo. Office kalchilh, phone-a biak pawn awmzia awm lo.

6. Group A increment CCA lamin la pek loh. Department dang aṭanga transfer, a va awmna tura te ah lang leh miah si lo te. DDO lamin increment an pek, approve tura lang thei miah lo te, Head lang kim miah lo te.

Department tam zawk harsatna hi a chunga ka sawiah khian a la kim lo nasa lutuk, IFMIS hian harsatna a thlen nasa lutuk a, tarlan sen a ni lo. Hetiang deuh vek hi a ni. Chuvangin, Dept lama a khawihtute hi chuan an thiam tawh lutuk a, CCA leh IFMIS lam hi an la in-ready lo a ni. Finance Dept hian harsatna hre miah lovin Dept te hmantir a tum a. Dept tam tak chuan an hmang thei e, hei hi a chhan chu, transfer te, CCA lama workflow kal ngai lote an ni tlangpui. Ṭhenkhat ṭhahnemngai tak takten in lama tihchhunzawm a, Inrinni vela khawih atan an ti a. Mahse, kar tawp chhung zawng Server a down quit ṭhak. IFMIS server hi an shutdown fo lehnghal a. Power Back up an nei ṭha lo nge ni. Hetiang thilah hi chuan 24x7 power backup ṭha tak an neih phawt a ngai. Tunah hian an shutdown fo a, hemi avang hian luh theih loh chang a tam lutuk.

Chuvangin, he thila Finance Department lam hotuten Dept lama IFMIS khawihtute an mawhpuh mai hi chu an hriat loh vang a ni. IFMIS system la inpeih fel loh vang leh IFMIS-a thawkte inthlahdah leh an tihtur an tih loh vang a ni ber.

Secretariat Office zawng zawngah pawh IFMIS an la hmang lo!tih thawmte a la ri leh ta deuh deuh. A nih chuan Finance Dept lam, Secretariat-a awmte hian IFMIS hmang lovin, a hmaa mi anga hlawh an lak theih nan exemption an lo inpe a, hlawh an lo la reng a ni thei mai awm asin! A va Fair lo ve!

- Elzeta