Speaker-in nuai 100 eirua a puh hi a serious

Mimawl mai mai Facebook lama rak ve mai mai ni lo, Mizoram Assembly Speaker Pu Lalrinliana Sailo chuan Deputy Chief Minister Pu Tawnluia chanpual department-ah cheng nuai 100 chuang a bo thlau a, an ziak bo tih USA lama a zinaah a sawi a, MNF sorkar nasa takin a sawi chhe bawk a ni. Cheng nuai 100 bo chungchangah hian FIR thehluh ngei ngeina tham a ni he thu hi chu.

Pu Rinliana hian BJP zawm a tum thu a sawi thawi a, a ngaithlatu kha an nui na chung khan a mah kha chu a fiamthu lova, BJP zawm Politics hi thil thar ni lovin a hma aṭangin titi a awm tawh tih Politics chik mite chuan an lo sawi daih tawh a ni. Keini lamin kan hriat ve na chu Pu Rinliana ngeiin USA lama a sawi chhuah hi a ni a, mahse amah hian a lo tum tawh an ti. Congress MLA a nih chhung khan chhuak duh si lo khan Congress kha a attack chiama a tawpah a chhuak ta nge nge a, Congress aṭanga chhuah hun (timing) kha a thlang dik chata Congress pa kha MNF ticket a chang zui a, a la tling thei hial a ni.

Pu Rinliana'n Pu Tawnluia Department a sawi chhuah cheng nuai 100 ziah bo hi a tam tham lulai chu a ni. Nuai 100 hi an ziak bo tak tak a nih chuan hai chhuah leh theih a ni tur a ni, nuai 100 chu a tam lutuk. Nuai 100 hi an ziak bo ni lova Assembly Speaker hian dawt a sawi a nih chuan a nihna zahawm tak hi a chawlh san a ngai hial ang.

Pu Rina hi Tuivawl bialtu hlun a ni a, MNF sorkar hnua Tuivawl bialtu Pu Tawnluia a beihna tih theih a lo chhuak hi politics chik mite chuan a mak lo tih kan Whatsapp group lam titi ah chuan a lo lang leh a, mi fate hi chuan thil hi an la va chhut ril ṭhin ve le.

MNF aṭanga chhuak tur anga insawiin an sorkar kal dan a lungawi thlak loh thu te a sawi a, Chief Minister leh Pu Robert Romawia a sawi thawi thuak thuak bawk a ni. Eirukna a hluar thu a sawi piap piap khan an sorkar mawng a hlim tihna a ni a, ban a tum dan hi in ban tir a tum zawk niin a lang. Chuti a nih si chuan an ban hnu hian kalna tur a nei tawh lova, ama sawi thawi ang ngei hian BJP a zawm dawn a ni thei em?

Cheng nuai 100 bo chhui a ṭul rual hian Pu Rinliana'n ban cho taka heng thu a sawi hi tuna a bial Chalfilh hi Hmar area a ni tih hre thar ta ila. BJP hian Mara area la tawhin MADC lamah an sorkar a, Chakma District Council election lo awm turah hian chak an inring leh bawk a ni. Chuti chu MADC, CADC an lak hnuah tun hma Hmar anga in lak hran tuma dinhmun ṭha beisei Hmar area lamah Pu Rinliana hian BJP bu khuar a tum tihna a ni em le? Nuai 100 hi buaipui zui ila, Pu Rinliana BJP sawi phena Minority Politics inphum ru hi i hre tel bawk ang u le.

Tun hnaia U.S.A lama a zinnaah Pu Lalrinliana Sailo, Assembly Speaker chuan a awmna MNF party chu, 'ṭawngkam thiamna hmang ringawtin ram kaihhruai kan tum em ni?' tiin, MNF sawrkarin mipuite a ngaih pawimawh lohzia nasa takin a sawi lang a. 'Kan kal dan hi a lungawi thlak loh' tiin beidawng takin a au chhuak a; SEDP zirtirtu-ah pawh party mi leh sa deuh vek lak an nih thu a sawi bawk.

USA-a a thusawiah hian Pu Lalrinliana Sailo chuan, a thiamna tak tak hman chhuah a la nih loh thu sawiin, party danga awm hial a duh thu a sawi a. MNF sawrkârah hian MLA ṭha zawkte thiamna tak tak hman chhuah theih lova an ka leh an kut phuar beh sak an ni em ni? tih hi MNF party kan zawt a, MNF ministry-ah minister senior zawkte pawhin zawhna tak chhang ngam lova an lungphur thleng tlang hêl mai mai ṭhin zia speaker hian chiang takin a sawi chhuak a. MNF sawrkâra Assembly Speaker meuh insum thei lova hetianga a rawn au chhuak ta hi ZPM ṭhalai chuan an lo ngai thu tak hle a. Deputy Chief Minister chanpual department-ah cheng nuai 100 chuang ziah bo a nih thu speaker-in a sawi te, sum eirukna nasa tak tak speaker-in a sawi chhuahte hi thu dik tak a nih leh nih loh sawifiah thuai turin MNF party kan phut a, sawifiah lova a ngawih liam pui mai a nih chuan, Pu Lalrinliana Sailo-in MNF sawrkar chungchanga a thusawi hi thu dik takah ZPM ṭhalai leh Zoram mipuite chuan an ngai nghet tlat dawn a ni, an ti ve bawk a ni.

- Lalramliana