HMANLAI KAWNG CHHIA LEH TUNLAI KAWNGCHHIA

Kawng chhia hi Congress sorkar tawp dawn lama oppo­sition ten sorkar an beihna point hrang hrang zinga pakhat kha a ni a. A bik takin vawiina sorkarna chelh mektu MNF party te hian poster te tarin an sawi nasa a. MNF sorkar a lo pian pawh khan kawngpui an ngai pawimawh viau dawnin mipuiin kan hria a, kawng chhawng te pawh kan lo hre ta hial a. Mipuiin kawng siam ṭha thuai thuai turin beiseina sang tak kan nei a ni. 

MNF sorkar hmaa kawng chhiat chhan leh tun dinhmuna kawng chhiat dan hi eng vang nge? tih ngaihtuah chungin MNF te hian kawng chhia hi politics ah an chhiatpui pha dawn em tih chu mipuiin an la relfel turah ngai i la.

MLA inthlan 2018 hma kum 3 chhung, 2015, 2016 leh 2017 te kha Mizoramah ruahtui namen lovin a tam a. Kum 2017 phei kha chuan Febuary a ṭangin ruahtui a tla a, lo hal thei lo tam tak an awm a nih kha. Khami kum khan Sairang tlawng lui phei chu kum 50 chhunga a len ber ṭum a niin Sairang VC ten tuilian chim chinah ni 13 July 2017 khan tui len ber kum  hriatrengna lung an phun hial nghe nghe. 

Hetiang hi a nih vangin PWD te an che thei lo va, chuti chung chuan PWD enkawl kawng te chu ruahtui tlak loh karah thuam ṭhat zel an ni a. Hnathawhna tur khawl thar chi hrang hrang JCB, Road roller tam tak leiin PWD division hrang hrangah dah an ni a. Khaw ṭhat chhung reilote ah âm takin kawng chhezual lai te chei ṭhin a ni a. Hnathawhna tur khaw ṭha a tam lo em a ni. Kawng ṭha lo lai te chu Mizoram PWD enkawl loh, National Highway te leh kawng siam lai, on going works te  an ni tlangpui. (eg. Aizawl to Mamit road) 

Ni 13 August 2020 khan  Mission Veng Aizawl MNF Local Council candidate puanna-ah Minister zahawm tak Pu Ruatkima chuan, 'kawng chhia zawng dawn ila a vang viau ang. Tuna kawng chhia te hi National Highway deuh vek a ni' tih a sawi niin news ah te kan lo hmu a. Congress sorkarlaia kawng chhia pawh kha hetiang tho hi a ni. Kawng siamlai, eg. Aizawl to Kanhmun (via Mamit) road etc chhe em em, social media-a an thehdarh te pawh laih zauh hna thawk mek a ni a.  Pu Ruatkima sawi dan nen hian kawng chhiat chhanah danglamna a awm lem lo. 

Congress sorkarah khan kawng cheiṭhatna tur sum tam tak an dah a. Kum 2017 leh 2018 kuma an sum dah te chu hmang hlei thei lo khawpin ruahtui malsawmna zoramin kan dawng a. An sorkar a tlak khan sum tam tak an tlak san a ni. 

Science and Technology Department, Govt of Mizoram te chhinchhiah danin kum 3 chhung, kum 2015, 2016 leh 2017 khan a zawn zatin ruahtui 2000 mm chuang a tla kum tin ziah a nih chu! Kum 2015 ah 2412.3mm, 2016 ah 2161.8mm a tla a; 2017 phei chu state puitling kan nih hnu kum 1987 aṭanga vawiin thlengin ruahtui tlak tam ber kum a ni a, ruahtui 2686.7 mm  a tla hial a ni. Congress sorkar kha a vanduai hle. 

Chutihlaiin MNF sorkar hian kawngpui siamna tur sum tam tak a chhawm mai bakah kawng siam ṭha tur hian vanneihna a nei. 

December 2018 an sorkar aṭang khan ruahtui a la tla tlem em em a. Nikum 2019 July thla tawp lam thleng phei kha chuan leilet neitute pawh buh phun thei lovin an mangang hman hial a nih kha. Congress sorkar tawp lam kum 3 chhunga working days zat lai hun an nei tawh a ni. 

Hei mai bakah hian MNF sorkar lo piang kha a vannei takzet a, kawng siamna bik chauh atan Congress sorkar  kalsan cheng nuai hlir Rs 16200  nei sa in a sorkar tlat a ni. 

Kumin 2020 pawh hi Covid19 avangin zin veivak an tlemin motor tlan an tlem a, khua a ṭha rei em em bawk. Kawngpui siam nan chuan duhthusama hun ṭha an nei; mahse kawng a chhe em em si. 

Hetianga kum 2 dawn chhunga hnathawhna hun khaw ṭha leh sum an nei chung hian kawng cheiṭhatah MNF sorkar hi a hmanhmawh lo hle a ni ang, NH Sairang - Khamrang - Kawnpui kawng block pawh vawiin thlengin motor a la tlu thal het hut mai a. Kawng chhiat luat tuk avangin Mizoram rawn lut tur motor lian driver vai ho an titau hial a ni. 

Hetiang a ni chung hian MNF sorkar chuan reilote chhunga kawngpui siam ṭhat a nih tak vek avanga lawmthu sawina resolution Assembly House-ah nikum, 2019 June ni 21 khan an pass a nia!

Kawng chhiat vanga Congress sorkar kha tla ta anga ngai hi an awm lek lek fo a. Thu dik a nih chuan MNF phei hi chu an va tla nasa dawn rua em! 

Chuvangin, Congress sorkar laia kawngpui leh MNF sorkar laia kawng chhiat chhan hi tehkhin hleih theih a ni lo va. Tunah hi chuan sum a awm a, khua a ṭhal rei a, hnathawhna hun a tam em em a, chhuanlam tur a awm tawh lo a ni. 

Hmana kawng chhia  leh tuna kawng chhia hi patla khatah buk chi a ni lo e.