LMC boruak leh Aizawl politics
Lunglei Municipal Council inthlan chu an zo ta a, Ward 11 a awma heng zinga 11 ah hian ZPM an chak fai vek a ni. Lunglei khawpui huam chhungah hian MLA chu MNF MLA an ni fai vek thung a, chuti chunga ZPM an chak faia an solid ṭhak mai hian mak tih a hlawh a, Lunglei mipuiin ZPM an duh ta takzet a nih loh pawhin MNF an hnawl takzet tihna a ni.
MNF chak loh chhan hrang hrang awm thei zingah hian RTPCR khawl chungchang inhnialna te kha sawi lan zin pawl a ni. Lunglei khawpui kawngpui chhia kha an sawi lan sarh a ni bawk. Lunglei mipuiin kum 2018 a duh taka an thlante pawl candidate chu duh lo takin an han hnawl ta chu a nia, hei hi chu Lunglei chhunga thil thleng a ni.
Tun hnaiah Aizawlah Local Council Bye Election hmun pathumah a awm a, Zemabawk ah chuan ZPM an chak fai leh vek a ni. Durtlang Leitan lamah pawh ZPM tho an chak a, an chakna margin hi a dang dun hle a ni. MNF lam chu ITI Veng inthlan lamah an lo chak ve thung a, Congress chu an chak lo mai ni loin pathumna hniam tak dinhmun angah khan an awm ta a ni.
Khawpui pahnih inthlan aṭanga kan hmuh chu mipui hi an ZPM sawt ta a ni tih kan hre thei awm e. Tin, chu mai chu a ni lo, ZPM pawh mipuiin sorkar zo mai turah an ring ta a tih theih bawk awm e. A chhan dang ṭha tak pakhat awm leh thei bawk chu MNF ah hian mipuiin am beisei an hmù lo a ni.
Bial vil ṭhat aṭang chuan en dâwn se Chief Minister Pu Zoramthanga bial Zemabawk Local Council-ah khan MNF kha tling tur an ni ngei ngei a ni. Zemabawk area ah ringawt hian assembly constituency tam tak aiin Development Work kalpui a tam zawk a ni. Zemabawk mipui hian Development hi chu an duh a, MNF candidate an duh tel lo tlat mai hi Aizawl hian hawi lam a nei dâwn niin a lang ta tlat mai a ni. Chutichuan Aizawl hawi lam tur chu boruak a danglam thut loh chuan ZPM a ni tihna a nih chu.
Mizoramah hian MNF hi MNF Vote vangin an sorkar phak lo. Congress pawh Congress vote vangin an sorkar phak bawk lo. Anni pahnih in sorkar chhawk chhan chu mipuiin a thlakna tur kan la hmuh loh vang a ni tel bawk a, tling tura kan rin zawk zel kha pakhat kan nin hnuah kan vote tling ṭhin a ni. Kum 2013-a MLA 32 nei thei Congress kha Congress vote vanga tling ni se kum 2018-ah MLA 5 lek an ni thei lo, Congress vote puitu neutral mipuiin MNF an vote tâk vang a ni. Chutiang chiah chuan kum 2018 a MLA inthlana MNF candidate vote tlingtu neutral chuan LMC leh Zemabawk inthlanah khan MNF an vote nawn duh tawh lo a, ZPM an han vote tak tak mai chu an tling hneh hle, an solid nawn awn awn a ni.
Congress hruaitu an lo phel nen, MNF lam hi Speaker ber pawhin BJP lam a sawi mawi tawh nen ZPM chu tui let hnu ata a vawi khat nan an sorkar ve nge nge dâwn niin a lang ta a. Lunglei Politics leh Aizawl Politics vir vêl en hian khawpui lian 2 ah hian 'SOLID' tih hi a ri nawn leh lo ang tih sawi theih a ni lo. ZPM hian chapo loh chiah an mamawh a, in ngai tlawm rawh se. Chapo hi Pathian duh loh zawng a ni.
- Lalremruata