MAHNI PÂWL TÂN CHAUHA CAMPAIGN ṬHIN CHU ENG PÂWLA MI PAWH NI SE, VOTE LOH NGAM A ṬHA!

"Rûam lam pantu tui chu a luan zêl phawt chuan, a tlin khawm theih lohna tlâng sâng tak pawh a chim pil thei hial ṭhin."

Dikna duhtu inti hian ama hlâwkna zêlah chauh em ni dikna chu a duh tûr ni ta ang? Bazar-ah vawksa kan leiin, kan lei duh zât bûk a tlin loh chuan kan thinrim em em a; social media lamah a chhe thei ang berin a zuartu kan demna thu uar fahranin, an thlalak nên lam, kan pho chhûak duh a. Chutihlâiin, kan lei duh zât kan sawi hnua a zuartuin a KG lung khaina lam aia a sa kan lei lam khaina zâwk a uai fualtir hnuang kha chuan kan lawm em em a; manhla ti em emin kan khai haw lah lah fo nia. A nihna takah chuan, dikna duh inti si khân sa bûk tling lo khai haw chu kan huat viau lâiin, a bûk zât tûr aia a tam chiah kha chuan mahni kan hlawk tih inhre rânin, dawr chhunzawm zêl kan tum leh hlauh si em? Dikna duhtu kan nih tak zet chuan a bûk dik tak khai haw mai kha kan hlimpui ber tûr a ni dâwn lo em ni? (Sâ a ni a, a dik chata bûk theih a ni kher lo thei a, a vêl hnaih thei ang bera bûk erawh chu a tih theih chiang a ni). 

Kan rama hausa-rethei kâr zau ta lutuk te, eirûk-hlemhlêt nasa ta êm êm te, chhungkaw bil leh hmêl hriat neih ṭhat zârzo ṭhin te avanga a neite'n an neih belh thûr thûr lai a, a nei lote'n an neih loh tial tialna hi tiziaawm tûr chuan... VC inthlan aṭangin bul i han ṭan thar dâwn teh ang. 

Kumin 2020 VC inthlan lo awm tûrah hian, Village Council inthlan ti na na na a, khawtlâng huapzo lo a pâwl pakhat hamṭhatna tûr beiseia campaign kan awm leh nawk nia. A va hahthlak zo zai tak em! 

Tute'n emaw mahni pâwl mi leh sate chauh ngaihsaka khawtlâng kan lo hruai tawh ṭhin vâng a ni phawt mai a; khawtlâng inlungrual leh hma sawn uâk uâk neih chu a har tual tual a nih rêng hi! Pathian malsawmna tia kan chhâl ngei pawh chu inthlan 'result' azirin kan indawn chhâwk ṭhin a ang ta lek lek si a! 

He'ng ang mihring, khawtlâng hruaitu atâna ding chhuak ngam ve lem siin, ngaihtuahna zîm lutuk an pu ṭhin hi chu, kohhran anga pâwl inen hranna ram, Mizoram-ah, ngat phei hi chuan khawtlâng hmasawnna kawng dîpa dâl tlat tute kan ni a; hruaitu ni tûra kan inthlan tlin hma hauhvin ram ṭhan-mawh-bâwk pakhat, 'inthlei bîkna' bawkin bul kan ṭan ṭha leh tawh tih hi hmuh hmaih rual a ni lo. Thlei bîk neiho bawkin kan 'vote' leh ang chu(h)! 

Khawtlâng hruaitu ṭha ni tûr chuan, mahni pâwl awmna bâkah, vêng mipui thleng phâk, pâwl tin huapzo ngaihtuahna sêng pha nih hi a lo berah pawh a ṭul tak meuh meuh a, kan vei em em khawtlâng siamṭhat kan duh tak tak a nih ngai chuan, hetiang zâwnga rilru zau tak kan put ngam hi a ṭul tawh hle a ni. 

Khawtlâng huapzo hma sawnna rahbi thar kaipuitu ni tûr leh hrisel taka khawtlang ṭanrualna thlentu ni thei tûr chuan, hna sem leh 'action' lakna kawnga rethei leh hausa thliar ve ngai lo; pâwl tih bîk leh thlei bîk nei ngai hek lo kan nih a ṭul a, chutiang mi chu eng pâwla mi pawh ni-raw-sek-sek, 'vote' ngam a ṭha ang. Chu'ng chuan ram pum siamṭha leh tûrin bul kan ṭan ṭha leh thei mial mahna! 

Khawtlâng hruaitu atân hian, pâwl awmna nei ve tho chu ni bawk mah se'ng, khawtlâng hmasawnna tûr lam zêl mitthla hmasa a, pâwl tih bîk huamchhûng kal pel ngam tûr mihring kan vawrh chhuah zêl hian kan khawtlâng hian a ṭhatpui ber fo ang.