Aizawla mi ngei

'Mizoram hi Aizawl a ni lo va, Aizawl hi Mizoram a ni lo' tih thu hi Aizawl pawn aṭangin a ri zing hle a, Aizawl hian Aizawl pawn hi kan ngaihtuah ṭha duh lo. He Aizawlism hian min ei chhe mek a, politics ah pawh kalphung hranpa nei ngat Aizawl hian Mizoram hi an awp a nih pawhin Mizoram mipui thinlung chu an awp chuang lo tih an inhriat a ngai.

Khawpui tih takah kalphung nghet pawh nei lova inthlak zung zung mai a ni a, mi uar apiang uar zel mai, fashion pawh inthlak chak em em a ni. Aizawl hian mize hrang a nei a, ngaihdan hrang pawh a nei kan ti thei. Aizawl leh Lunglei mizia hi a dang daih a ni. Lunglei chu an seh nghet zawk a, an mizia pawh a nghet zawk kan ti thei ang. Aizawl chu inthlak kual zung zung mai, nghet lo a ni, Aizawl an inti Aizawl em em mai hi Mizoram tana thil hnawksak a ni tih hi sawi ve a ṭha.

Lunglei chuan thil chin ṭhan a neih pawhin a ching ngar ngar ṭhin a ni. Politics lamah pawh Lunglei te, Saitual te, Champhai te leh khawpui dangah pawh mi pangngai hi an la tling nawn an la tling nawn thei ṭhin a, an rilru a nghet tihna a ni a, Aizawl hi chu term hnih aia rei tling zawn MLA pawh an nei ngai lo. Fashion lam ang bawk hian politics lam pawh an nihna inthlak reng mai, politics-ah pawh hruaitu hlui ning zung zung a, a thar melh zung zung an ni. Chu Aizawl chu intikhawpui tak hian a awm a, mi dang hi a nau chei a, khaw dang tana ngainat awm loh tak hian a awm ṭhin a ni.

Kan hla pakhat, "Aizawla mi ngei" tih te hi Aizawl pawn tana hla ngeiawm tak a ni. Aizawl intih Aizawlna hian Mizo leh Mizo hi a ṭhen hrang a, a ṭha lo a ni. Lunglei leh a piah lam zawng an hmu hrang tlatte pawh hi a ṭha lo. Thingtlang mi tam tak Aizawlah an luh tawha mi pawimawh tak tak an nih hnu pawha Aizawl Mihlun Thlah lo intihte pawh hi mi dang rilru hliamtu a ni thei a ni. Aizawl MLA te hi a mal mal hian en ila, Aizawla piang pawh hi an awm bar lo vang, Aizawl mihlun zawk hian Aizawl hi an enkawl tawh lo zawk a lo nih zawk hi. Chuti a nih mek karah chuan engtin nge Aizawl hian mi dang hi an la hnuaichhiah ngam ni le? Khaw kalphung pawh nei lo, khaw awm dan pawh nei lo, pemkhawm khua a ni ve tho tih an inhriat a ṭha ve hle a ni.

Sorkar pawh hian Aizawl pawnah hian hmasawnna hi an pek chhuah a ngai a ni. Aizawl leh Aizawl chauh inchawm len tawn hi Mizoram hian a tuar a ni. Aizawla mi ngei kan tih kan tih hian Mizoram pum ṭhan a ṭhu kan ti thei a ni, Aizawl chauh hi Mizoram a ni si lo a ni. Hetiang thu hi ziah a ngaih tak chhan nia lo lang chhuak chu; Aizawl lamah sorkar hian hmasawnna awm thei hi a dah zel si a, Aizawl pawn ngaihthah vang hian Mizo mipui hi an rethei harsa a ni. Aizawl pawn hi Mizoram hian a huam tel a ni, Pu te u.

- C. Lalchhuanawma