American Dream vs Mizo Dream: ENGNGE MIZO-TEN THLEN TUM RAM KAN NEIH ? ( ZPM-in mipui beisei min thlenpui zo bik dawn em ni le? )

Ka WhatsApp message dawnah chuan Lunglei Muncipal Council (LMC) leh Zemabawk Village Council inthlanah rorel lai MNF chet chhiat thu leh Political Party ding thar "Zoram People's Movement" (ZPM) an tih mai candidates an tlin vek thu leh, ZPM chu Mizoram State Assembly/MLA Election lo awm turah pawh mipui rilruah beisei thar siamin, sorkarna an siam thei mai awm mang e? tih pahin an party aṭanga MLA candidate tura ngaih ṭhalai, kum la naupang zawk leh tun lai khawvel vir vel dan leh khawvel tukverha dak pha chin a ngaih – Lalnghinglova Hmar, TBC Lalvenchhunga, Vanlalsailova, Jeje Lalpekhlua leh Baryl Vanlalsangi te thlalak 5 a lo tel bawk a. Rilruah US France, Ireland leh Italy politics lo inher danglamte chu lo lut ve nghalin, ngaihtuahna a vak kual nasa hle.

Eng vangin nge Lungleia LMC Election-ah chuan a hringtu leh MNF sorkar lai chu arte lu kàwn ṭhak khawpa an chet chhiat a, Chief Minister bial an tih Zemabawk V/C Election-ah te chuan an ruling lai lehnghala mipuiten hnawl fithla hlauhva party naupangte "Zoram People's Movement" (ZPM) candidates an thlan tlin tak daih? Party hlun lian pahnih MNF leh Congress an nil ṭhak mai chu thil mak lutuk a nih hran loh chu... Mizoram mipuiten, 'Kalphung thar, mi tin huapzo sorkar' leh chhenfakawm hmuh leh neih an duh vang a ni ang e, tiin ka ngaihtuah zui neuh neuh va.

Mizoramah US, France leh Italy ram ang deuhvin party ngelnghetsa (establishment) duhkhawp lohna leh ram rorelna boruak thar hip a, hmu duhtu leh nei duhtu an lo pung ve zel dawn ta a ni mai awm mang e ka ti.

US POLITICS-ah kum 2016 khan mak tak maiin, politician ni ngai reng reng lo, khawvel nula hmelṭha leh pian nalh buaipuitu leh real estate lama sumdawng hausa (billionaire) Donald J. Trump chu American mipuite leh khawvel rin loh takin 45th US President atan thlan tlin nawlh a ni a, political scientists leh analysts hote mak tih a tling.

Donald J. Trump chuan anmahni Grand Old Party (GOP), Republican party huangah tu nge official-in US Presidential Election-ah an thehchhuah ang, tiin an party chhungah 'Primary Election' an nei a. Chutah chuan pi leh pu aṭanga Republican party lo ni ṭhinte leh anmahni pawh an party aṭanga State pakhata lal ber Governor leh Senator atana thlan tlin lo ni tawh te leh ni lai mek te, US politics-ah sulhnu pawimawh tak tak leh rahbi pawimawh lo chhera siamtute an ni deuh nual. An party mipuite zingah inchapcharna (debate) vawi eng emaw zat neiin Donald J. Trump-a ber chuan, "Republican party-ah kei ka ni" inti ṭhiaute chu a hneh ta vek mai a ni! Chu'ngte chu Sen. Ted Cruz, Sen. Marco Rubio, Gov. John Kasich, Dr. Ben Carson, Gov. Jeb Bush, Sen. Rand Paul, Gov. Mike Hukabee, Gov. Chris Christie, Gov. Jim Gilmore, Sen. Rick Santorio, Gov. George Pataki, Sen. Lindsey Graham, Gov. Bobby Gindal, Gov. Scott Walker, Gov. Rick Perry te an ni. An party awmna Grand Old Party (GOP) aṭanga candidate nih ngei tumin, mipui hmaah an thiltum (policy) leh, America ram leh khawvel hruai an tum dan te sawia TV-ah inchapcharna an neih ṭhinte chu uluk takin ka lo enin ka ngaihthla ve ṭhin a, a ngaihnawmin an hmuhnawm thei hle.

A tawpah chung politics-a chhum hmin lo ni tawh leh zung kaih nghet (establishment)-a ngaihhote chu Donald Trump chuan hneh fai vekin, Republican National Convention (RNC) a official candidate ni tura nemnghehnaah Trump chu vote 1441 hmuin, amah hnaih bertu Sen. Ted Cruz of Texas chuan 551 hmuin, a dawttu Sen. Rubio of Florida-in 174, Gov. John Kasich of Ohio chuan 162, Dr. Ben Carson chuan 4, Sen. Rand Paul of Kentucky chuan 1, Carly Fionia (Hewlett Parkard CEO hlui)-ten vote 1 an hmu thei chauh a ni.

Donald J. Trump chuan GOP official candidate a chan hnuah, amah khingtu Democratic Party aṭangin US Secy. of State (Foreign Minister) hlui, New York Senator lar ṭhin leh US President Bill Clinton-a nupui Hillary Rodham Clinton nen TV-ah inchapchar (debate)-na nei chho lehin, election-ah Trump chuan Hillary Clinton chu Electoral College vote 304-227 in a hneh ta. Mipui (popular) vote-ah erawh Trump chuan vote 62,984,828 hmuin Hillary chuan 65,853,514 a hmu a, Trump aiin popular vote 2,864,974 a hmu tam zawk a ni (ref: Cook Political Report).

Kum 2020 election-ah erawh chuan US Vice President term hnih lo chelh tawh leh Senator kum 34 vel lo ni tawh Joseph R. Biden, Democrat chuan Donald Trump chu Electoral College vote 306-232 a hnehin, Popular vote-ah Joe Biden chuan 81,283,098 (51.3%) hmuin, Trump chuan 74, 222,958 (46.8%) a hmu a ni. Kum 2020-ah US President thlanah mi 159,633,396 zetin vote an thlak a, vote tla zawng zawng chu 66.7% chauh ni mah se, US history-ah President thlannaa vote thlak tam ber ṭum a ni (ref: Pew Research Center)

FRANCE POLITICS-ah pawh kum 2017 khan thil mak a lo thleng ve tho mai ! Tuna French President term-na 2 chelh mektu Emmanuel Macron chu mak tak maiin, French mipuite chuan party ngelnghetsa candidate te aiin hneh takin an thlang tling ta zawk a ni.

Emmanuel Macron (39) chu Dec. 21, 1977-a piang niin, kum 2017-ah kum 2016 chauhva a party din thar 'La Republique En Marche!' hmangin Nepolean-I tih loha French President naupang ber tura thlan tlin a ni a, thla 2 hnu lawkah National Assembly/Parliament thlannaah "En Marche!" party chu hneh takin sorkar siam turin thlan tlin zui a ni. En Marche tih chu, 'Hma lam panin i kal zel ang aw!' (Go Forward!) tihna niin, liberal leh centrist party anga ngaih a ni. Emmanuel Macron-an tun hma aṭanga party hlun leh sorkar lo siam tawh ṭhin Socialist party, Gaulthist leh Conservative party te a rawn lehthal vek chuan khawvel mak tih a tling.

Macron chuan April 6, 2016-ah La Republique–En Marche! party chu a din a, kum 1 hnu lawkah France ram political system a rawn sâwi danglam chiang hle.

President Francois Hollande hun laiin, Emmanuel Macron hian Dy Chief of Staff & Economic Adviser hna a chelh a, kum 2014-ah Finance Minister a ni zuai a, chutih laia economic reform a siam "Loi Macron" (Macron Law) chu a lar viau. President Hollande hruai Socialist party a chhuahsan hnu lawka a party thar din chu, French mipui politics boruak thar hip duhtute chuan an duh hle a, mipuite chuan 'En Marche!' (I kal zel ang aw!) tih party thar chu an bawh ta hum hum a ni ber mai.

Hetih lai hian French Nationalist, "Far-Right nationalist" tih hiala koh, Muslim duh lo leh French mipui ngaihhlut zawng uar taka chawisan duhtu Marine Le Pen-i kaihhruai 'National Front/National Rally' an tih maite chu an vungin, Jean-Luc Melechon–Socialist party hotu chu a lar hle bawk. Anni pathum aṭangin French mipuite chuan kalphung thar nei thei tur bera ngaih Emmanuel Macron chu May 7, 2017 khan France President atan vote tla 2/3 hmuin thlan tlin a ni. Marine Le Pen (Far-Right), Jean-Luc Melenchon (Far-Left) leh Emmanuel Macron (pro-EU, centrist) te hi tu ber nge tling ang? tih turin an boruak a intluk viau ṭhin. Socialist party Jean-Luc Melenchon phei chu Communist hoten an thlawp a ni.

June 2017-a National Assembly/Parliament seat 577-ah Macron a hruai 'En Marche!' chuan seat 308 an la a, a thawhpui party te nen 577-350 an la thei a ni. Hemi ṭum hian vote a tla ṭha lo a, 42.6% chauh a tla. French mipuite beisei leh duhthusam sorkar chu an siam thei bik lo va, Macron-a sorkar chu 'Yellow Vests' protest-in a zuiin a tibuai nasa hle.

Kum 2022 President thlanna April 10-ah erawh chuan President First Round Election-ah Emmanuel Macron chuan vote–28%, Marine Le Pen–23%, Jean-Luc Melechon–22% an hmu a, vote tla 50% hmu an awm loh vangin Second Round-ah Macron chuan 58% hmuin, Le Pen-i chu a hneh leh ta a ni.

US leh France rama party insawhnghet tawh leh politician hlun, danglam (change) vak tum tawh lem lo awmkhawm (establishment)-a tel lutuk lo zinga Donald Trump leh Emmanuel Macron hmel rawn lang thut ang deuhvin, Mizoramah 'Politicians hmel thar' leh 'Ram rorelna kalphung thar' a lo thleng ve thut dawn em ni ang? tihte min ngaihtuahtir vung vung ṭhin a ni!

Politics-ah veikhawr hu mai President Donald Trump a rawn lan rualin, House member atan Democratic party leh Republican party ngelnghet tak kalphung duhkhawp zo lo leh 'Kalphung thar' duhtu an lo lang ve nual bawk a! Chu'ngho chu anmahni Democrats zingah pawh ngai thei lo leh duh lotu an awm. Chu'ng mite chu 'Democrat Progressive Caucus' tih emaw, 'The Squad' tia koh ṭhin an ni. Politics thila tawnhriat ngah lem lo tak, tunlai thiamna leh hmasawnna leh mihring rilru sukthlek mila ram rorelna kalpui duhtute an ni: Alexander- Ocasio Cortez (AOC) of New York, Ilhan Omar of Minnesota, Ayanna Pressley of Massasuchesets, Rashida Tlaib of Michigan te niin, 'Democrat Far-leftwing' tih an ni. President Trump leh Speaker Nancy Pelosi lu pawh an tihai hle ṭhin. Heng mite AOC-i hi Bar/Club vela Waitress ni ṭhin, Ilhan Omar-i lah Somalian–American, Rashida Tlaib-i lah Palestinian-American. Democratic party ten US House an thunun theih nana an chakna hnar leh seat an lak tam phahna an nih vangin Democrats ho tan erawh an hluin, an ṭangkai hle. Trump Admin hmalakna kawng ṭhenkhatah pawh an kit hnawk ve thei viau.

Tuna America rama 'Biden Admin' sorkarah House chu Republican (GOP) ten thunun mah se, Republican party zingah House member, kum naupang, zuanzang leh ṭuan ṭha Matt Gaetz of Florida, Marjorie-Taylor Greene of Arizona te chuan Biden Admin lakah leh House boruak an siam 'Happening' thei hle! US House member tam zawk kum chawhrual chu 57.6% a nih laiin, "Squad" an tih mai te hi an kum chawhrualin 38.3% ang vel a ni.

MIZOTE PAWHIN "PROGRESSIVE POLITICIANS" KAN MAMAWH VE TAWH E!

Mizoramaah pawh political party hrang hrangin kum naupang lam, ṭuan ṭha leh zangkhai, la tuai deuh candidate atan an sengluh leh vawrh thiam a ṭulin a pawimawh. Police Dept thuam that leh tihchangtlun (modernization) nan ralthuam leh hmanraw ṭha an lei thar ṭhin ang deuhvin, Mizoramin politician modernization kan mamawh ve tawh a ni. 'Vatawk rangkachak tui tur emaw tih, Vatawk dang ang bawk' an tih politicians ang chi an lo awm ṭeuh ringawt a nih chuan hun lo kal zel turah ram leh hnamin a tuar phah thei dawn a ni.

America ramah tun hmaa an party inkaihhruaina leh politician hlui duhkhawp lohna a lo awm tawh ṭhin a. Chutianga hma thar lak duhtu 'progressive national leader' zingah chuan Republican party aṭangin Theodore Roosevelts, Robert M. Folletta, Charles Evans Hughes te chu a larzual niin, Democrat zingah President Woodrow Wilson, William Jennings Bryan leh Al Smith te an ni. 'Political reform movement' kalpui an duh ṭhin. Kum zabi 20-naah 'Progressism' tih an hman uar laiin kum 21-naah erawh 'Social justice system revolution' an ti thung. Kum 2010 chho aṭangin Senator Bernie Sanders, Democrat chuan United States chu kum zabi 21-na milin tihhmasawn leh tihchangtlun tur, tiin amah ngei pawh chu, 'Socialist Democrat' a inti deuh kher ṭhin a ni.

'Hmasawnna' (Progressive) duhtute chuan an auhlaah science leh technology leh economic thila hmasawn a, khawvel hriselna intluktlanna (universal healthcare system), hlawh inang/thuhmun, ei leh bara intluktlanna, chhiah tihtlem, mimal zalenna dah san leh ei zawngtute dah zalen (private freedom of enterprise), intihhluma hremna (capital punishment) tihbo, sik leh sa thunun (climate change/global warming) hmalak, pem (immigrant) thunun loh leh retheite dinhmun (poor welfare) chawisan, etc tih vel a ni. Heng ang thil duhin an awmna political party aṭangin 'Progressive Caucus/Allaince' tiin sorkar hmalaknaah a huhova thil nawr an uar hle. India ramah pawh MP rual naupang zual deuh, ṭangrualho zingah 'Young Turks' tih te pawh a lar viau ṭhin a nih kha.

Election zawha Mizorama sorkar thar lo awm/piang turah pawh 'The Squad' emaw, 'Young Turks' tih ve mai tur khawpa tun lai ṭhangthar te rilrem zawng leh science & technology thiamna mila economic development kalpui duhtu, mimal zalenna leh intluktlanna (freedom, equal rights justice system) ngai pawimawh em emtu, social reforms duhtu pawl MLA rual kan nei ve mial thei ang em?

AMERICAN DREAM vs MIZO DREAM

Bengsikin eng ber hi nge 'American Dream' an tih anga 'Mizo Dream' ni ve ang aw? tiin ka ngaihtuah fo ṭhin. Duh chiang lo, duh loh chiang bawk si lo, mahni nun aia mi nun duhtuisak viautute hian eng nge Mizoram tan leh Zofate tan kan lo beisei ṭhin leh kan lo lungkham (dream) ve ṭhin le?

Nitty Gritty Dirt Band ten Country song, 'An American Dream' tih, Rodney Crowell-a phuah an sak chu an release kum 1979 aṭangin a lar hle a, "'The American Dream' tih, Hank William Jr., hla phuah pawh 1982 hnuah a larin, Billboard Hot Country Songs zingah a tel pha a ni. Heng hlate ngun taka ngaihthlak chuan American hote duhaisam, ram tiam leh beisei dan te chu a hriatthiam theih riak ruak a ni.

US Declaration of Independence-ah chuan 'American Dream' chu tihian an lo ziak daih tawh a, "Mi zawng zawng intluk tlang turin a Siamtu chuan a siam a ni" (All men are created equal) tiin, an beisei leh lungkham ber chu 'Nunna, zalenna leh hlimna, intluktlanna' tih a ni. American Historian James Truslow Adams chuan kum 1931 khan 'American Dream' tih lehkhabu (Epic of America) a lo ziak chu chhiar leh ngaihhlut a hlawh hle. Chutah chuan, 'Ram ṭha zawk, mi tinrengte hausa zawk leh an tum ang taka an awma an khawsakna chu,' tiin America chanchin a lo ziak a ni.

Vawiin thlengin US chu 'Mi tinrengte intluktlanna leh zalenna ram, mihring an nih ang taka an dam khawchhuahna leh remchanna (opportunity) an hmuha an neihna' tiin an sawi ṭhin. Chuvangin khawvel ram hrang hrang aṭangin America rama khawsak leh inbenbel chu an chakin an duh a, an tum hram hram ṭhin a ni.

Keini Mizote pawhin hun lo kal zel turah duhaisam leh lungkham (Mizo Dream) kan nei ve ngei tur a ni ang. Chutih rualin kan politician/ram leh khawtlang leh kohhran hruaituten eng nge min hruai thlen an tum ber nia kan hriat? Vawiinah hian ngun tak leh chik takin, uluk taka ngaihtuah ila. Ka mimal nun leh ram leh hnam tan 'Mizo Dream' chu hei ngei hi a lo ni, tiin eng nge kan sawi ve tak ang le?

- CT LALRINAWMA