MPSC EXAM FEE TIHSAN LEH A BEHBAWM

Tunhnaiah sawrkar hna nghet lakna tur adver­tisement a chhuak chuai chuai a, a lawmawm hle mai. Chutihrualin officer chin hna latu Mizoram Public Service Commission (MPSC) chuan keini Scheduled Tribe-te tana Exam Fee Rs 150/- ni ṭhin chu Rs 200/- ah a tisang ta dawrh mai a, hna zawng mek ṭhalai tam tak tan chuan phurrit a tling nghal der mai.

Tuna Exam Fee tihsan hi a la hun lo nia ka hriat chhante - Tunhmaa OMR Application Form hmanga Exam Form Filled Up ni ṭhin kha tunah chuan Online Mode veka kalpui a ni tawh a, Admit Card pawh mahni computer leh phone hmangin online aṭang vekin kan download ta bawk. Hei hian Application Form, Receipt leh Admit Card atana paper an hman ṭhin senso zawng zawng a tibo ta vek a ni. Tin, kal dan phung inang deuh rengah hna latu dang MSSSB-in Rs 150/- a la hman theih laia MPSC-in exam fee a tisang bik hi hriatthiam a har lehzual. Anmahni office inrelbawl nan leh officer-ten an duh duh a an hman atana tisang an ang riau a ni.

He Exam Fee tihsan hian hna zawng mek ṭhalai harsa zualte a nghawng na hle. Hripui len hnuah hnathawh tur a vang sawtin pawisa thawhchhuah a harsa lehzual ta bawk a. MPSC leh MSSSB a hnaruak engemaw zat han dil chuan Exam/Application Fee atan Rs 1000/- to Rs 2000/- hi a kal thuai mai a ni. Chuvangin Exam Fee Rs 150/- hi tuna ṭhalai hna zawng mek nawlpuite tlin tawk niin a lang.

Hetihlai hian ṭhalai leh zirlaite hmakhaw ngai inti, a bikin Political Party te leh Zirlai Pawlte an han ngawi tlat thei mai hian zirlaite hmakhua an ngaih tak tak lohzia a tilang chiang viau awm e.

Congress sawrkar lai khan MPSC hian Exam Fee hi Rs 150/- aṭang hian Rs 200/- nge Rs 250/- (ka chiang ta lo) ah a lo tisang tawh a. Amaherawhchu, dodalna a nasat avangin Rs 150/- hi an hmang leh ta kha a nia. Tunah dodaltu an awm lo hi a mak angreng viau a ni.

Tin, MPSC-in hna lak a kalpui dan hi a langtlang tawk lo. Preliminary Exam tih loh hna dang exam, MCQ awm chi-ah pawh Answer Key an tichhuak ngai lo kha a nia. Tichhuak tura ngen pawhin an chhanna chu ‘keini chu MPSC kan ni tlat, kan tichhuak ngai lo’ tih a ni a, chhanna pawmawm (reasonable answer) tak a ni lem lo. Mahse, tunhnaia Co-operative Audit Officer Exam-ah Answer Key kan tichhuak dawn lo ti chung siin, MPSC Superintendent Seal chuanna, Provisional Answer Key Photocopy chu social media-ah a darh nasa ta mai a. Hemi chungchang zawh fiah tuma phone hmanga MPSC office biak tumte pawhin chhanna an dawng lova, tum dang ang lo takin phone call an la duh reng reng lo a ni.

Tichuan a hnu deuhah Provisional Answer Key chu official-in an website-ah an upload ta nge nge a, a lawmawm hnuhnawh viau tho mai. Preliminary Exam ni lo hna dang exam-ah pawh Answer Key hi tichhuak chhunzawm zel se a duhawm hle a ni. MSSSB in Answer Key tihchhuah a harsat loh tehreng nen.

MPSC aṭanga mahni Answer sheet photocopy dilchhuah nan Application Fee atan tunhmaa Rs 50/- chawi ṭhin khan Rs 200/- lai chawi a ngai tawh tih thawm a awm bawk. Hei hi a mak ang reng hle mai. MSSSB leh Department dangah chuan RTI hmangin kan dil chhuak thei vek kha a nia. RTI Application Fee Rs 10/- bakah kan thil dil kha min pek hunah a paper phek tam dan a zirin Xerox man emaw kha kan chawi chauh ṭhin a ni. Heng Answer Sheet dil chhuahte hi MPSC bikah hian RTI Act, 2005 hian a huam ve lo nge ni a, RTI Act a implement dan hi a dik tawk lo tihte hi Mizoram Information Commission lam hian lo enfiah thei se a duhawm hle mai.

- Lalramnunmawia