COVID-19 LEH INKHAWMPUI

1) Lalpan hnam tin remruat chu engmah lovah a chantir a: mi tin ngaihtuahte chu engmah sawtna nei lovin a siam ṭhin. Sam 33:10

2) Mihring thinlungah suang­tuahna tam tak a awm a; Lalpa remruat erawh chu a pangngai reng a ni. Thufingte 19:21 A chunga Pathian thu kan tarlante khian mihring remruatna te, ngaihtuahna te, thinlunga suangtuahna te chu engmah lo a nihzia a sawi chiang hle. Kum 2019 khan khawvel ram tina roreltu te, ram chhunga state tin roreltu te, NGO hrang hrangte leh chhungkaw tinten kum thar 2020 chhung atana remruatna/ ruahmanna an siam deuh vekin a rinawm. 

Nimahsela, kum 2020 a lo her chhuah meuh chuan Wuhan khawpui aṭanga hripui (Covid-19) lo irh chhuak chuan khawvel ram hrang hrang chu a fan kual a, a thlen chinah zahngaihna nei miah lovin nunna tam tak a suat buaih buaih mai a. Khawvel a ralkhel a, hri kai an pung a, mitthi an tam telh telh a, “Nitin mi an thleng, thla tin an tam kum tin an pung zel” tih ang maiin. 

Chu hripui chuan kum liam ta a sorkar inrelbawlna a khawih a, kohhran ruahmanna pawh nasa takin a khawih buai a ni. 

Presbyterian Kohhran rorelna/ruahmanna pawh a khawih buai a. Synod hnuaia Committee peng hrang hrang a khawih buai a, Pastor Bial Inkhawmpui ruahmanna pawh a hun takah nei thei lovin vawi hnih ngawt sawn a ni. Chutah pawh Palai nisa bakah kohhran tin aṭanga palai 2 zel chauh ruat tura tih a ni. Sorkat thupek angin Social Distancing leh Face Mask vuah chunga Committee leh Palai rorel neih a ni. Pathian biak inkhawm ruahmanna pawh neih theih a ni ta lo. Pathianni, kohhran mipuiin am hlut em em, Pathian faka hlim taka zai leh lam huna hman ṭhin leh kohhran serh leh sang pawimawh Lalpa Zanriah Sakramen pawh ṭheh theilo leh chang ho thei lova kan awm ta mai te kha han thlir kir chuan a lungchhiatthlak ngawih ngawih a, Biak In lah luah loh run ang maiin a khua a har a, thei reh takin a reh ngawih ngawih anih kha. 

Mizoram Presbyterian Kohhran hnuaia Mizo Sunday School Union (MSSU) chuan Nau­pang Sunday School Inkhawm­pui leh Pathian thu exam hi a theih hram chuan a zangkhai zawnga kalpui nise tiin a rel a. An ngaihtuah hun lai khan tun ang hian hripui leng hi nasa lo turah an ngai a nih hmel. 

Tuna kan Zoram khawvel dinhmun thlir chuan Naupang Inkhawmpui leh Pathian thu exam hi kalpui chi niin a lang lo. Hma lam a eng zawnga thlir hi infuihna ṭha tak nimahsela, tuna hripuiin Zoram dung leh vang a fan chhuah mek lai leh sorkar meuh pawhin AMC Area-a Lockdown a puan lai leh, Aizawl Veng hrang hrang leh Thingtlang lam thleng a Total Lockdown puan chhawk fo anih lai hi chuan hma lam a eng zawnga thlir chi niin a lang lo. 

Kan doctor-ho Zonet-in a kawmnaah khan December 2020-ah chuan hripui kai mi 5000 aṭanga 6000 vel ni thei turin an ngaih a nih kha. Synod Kalendar-ah chuan NPSS Inkhawmpui neih hun hi September 13.2020 (Pathianni) a ni. A hnai tawh hle. Sorkar-in mi panga aia tam punkhawm a phal lo va. Tuna dan dinglaiah phei chuan 1) Social Distancing zawm lo Rs. 200/- chawi tur. 2) Mask hmang lo Rs. 100/- chawi tur. 3) Puipunna huaihawt Rs. 5,000/- chawi tur tih a ni a. Tin, heng bakah hian School khar, Kohhran inkhawm, Social gethering khap a ni bawk si a. Chuti a nih chuan kohhran hian Sorkar thupek kan bawhchhe dawn tihna a ni! 

Kumin chhung hi chu heng Naupang Inkhawmpui leh Pathian thu exam-te hi ṭhulh mai nise, chuti lova kan kaltlangpui hram a nih a, naupang zinga hri kai kan awm palh hlauh chuan mi dem kan hlawh palh hlauh ang e! Tun dinhmunah pawh Communuty Spread a awm tawh si a! 

1. Ngai teh, inthawina aiin thuawih chu a ṭha zawk a, berâmpa thau aiin a thu pawm chu a ṭha zawk a ni. I Samuela 15:22 (b) 

2. Mi tin an chunga roreltute thu thuin awm rawh se. Pathian thu lovin tumah roreltu an awm si lo; roreltua awmte hi Pathian ruat an ni. Rom 13:1

    Kan Kohhran Thurin leh Kristian Nun Kaihhruaina 7 (I) Kristian Nun-

    Sawrkar lam

1) Roreltu leh hotute apawng ataka sawichhiat tur a ni lo. Sawrkar lu ber leh a hnuaia mite thu awiha zah tur a ni. (II Pet. 2:10; Exod. 22:28; Rom 13:1-7; I Pet. 2:17) Kan hmalam hun hi a thim zel anih phei chuan Presbytery Inkhawmpui, Synod leh Krismas thleng hian kan la buai lovang tih sawi a har hle a ni.