'MLA moral en' tih chungchang kha
"MLA ah Moral lam i en ang u" tih thupui hmanga John Lalthansanga Hmar thu ziak kha a tum a ṭhat viau rual hian a awmzia kha a fuh tawk lova hriatna ka lo nei ve tlat. America rama Bill Clinton leh Monica Lewinsky chungchang leh Mizoram rawn sawi zawm tum kha chu a fuh lova hriatna ka lo nei a ni.
Heti hian han sawi dawn ta mai ila. Bill Clinton kha America President a ni a, ngaihzawng Monica Lewinsky a neih avang khan America President a nihna kawngah khan a thawh chhiat phah hriat a ni lova, a hna kha a bialnu nei khan a tibuai ta hle tih pawh hriat a ni lova, mahsela America mipui thlan chhuah roreltute zawk khan an duh fir em avangin President atan chuan nupui nei chunga ngaihzawng nei an duh lova, tichuan Impeachment kha an kalpui ta zawk a ni.
Hetah hian Clinton hi a duh lotu chu an MP ti ve mai ang, an Senator rual kha an ni. Senator rual khan an President ni chunga khatia a lo khawsa vel kha President tihah a mawi lo an ti a ni.
Mizoram hi han ngaihtuah ta ula kan MLA rual zawk hian an MLA pui emaw an Minister pui emaw Chief Minister emaw hetiang hian an tih ngam kan ring em? A teuh lo mai, A teuh lo mai tih ṭhangthar hla ang hi a ni. MLA leh MLA hi an inchhan ṭhem ṭhum a, an sual an inthup sak tawn vel ni ber hian kan lo hmu a. Pu Lalduhoma an hek thla tih loh kha chu an inchhan tlangpui a, kha pawh kha hotute thupek vanga tih mai mai niin a vawtu khan ek an cheh ta ṭen ṭun a, Lunglei LMC inthlan thlengin an cheh zui zel a nih hi.
MLA inthlanah hian moral lam en tura kan infuih hian kan MLA ni sate hi han X Ray ta ila Impeachment kalpui mai tur hi pahnih khat mai ni lo, pathum pali hi an awm mai lo maw?
Ruling Party lamah hian ri ret ret chu pahnih pathum a awm thei a, Fake Account lar zet khan a rawn phawrh chiam tawh a, ZPM pawh hi en chian dawl an ni dawn em le?
Congress hi tunah hian MLA an nei tlem hrima an MLA hluite kha an fihlim chiah em aw? Moral pawimawh na kan sawi hi chuan kan mawng kan inhlim sak kual mai mai dawn a, mipui hian heng thil hi MLA ṭha leh ṭha lo tehna atan an hmang lo a ni zawk lo maw? tih hi zawhna awm thei a ni.
Ziaktu hmasa ṭhahnemngaihna hi hre thiam mah ila kan ram en hi chuan Impeachment lam hi kalpui tur a tam hle zawk a ni lo maw? tih hi ka rilrua zawhna lo awm chu a ni.
- Lalrammawia