PARTY MANIFESTO

A KAMKÊUNA

Pãwl, Kohhran, vantlang, Sorkar thlengin ram kaihhruai dan, hring nun khawsak dan, sukthlek dan leh inawp dan chungchanga ngaihdan ziah chhuahna (manifesto) an nei ṭhin. Mizorama Political party hmasa ber chu Mizo Union 6 April 1946–12 January 1974 kha a ni. Mizo Union manifesto kha Mizo hnam, mahnia ro inrel hrana zalen taka democracy principle anga khawsak a ni a, kha khan Assam State hnuaia District Council pakhat Mizo District Council hrana kan awm theih tãkna kha a rawn hring chhuak ta niin a lang. Mizo Union lo pian hnuah pawh political party hrang hrang a piang nual tawh a, a ṭhen erawh damkhaw chhuak zui lem lovin an ṭilṭiak zui nual tawh bawk.

TUTE NGE AN NIH?

Mizoramah National party lian leh Regional party eng emaw zat an awm tawh a, chu'ngte chu lo thlir teh ang. National party lian pahnihte: Indian National Congress (INC), Bharatiya Janata Party (BJP). Tualṭo party pathum: Mizo National Front (MNF); Zoram People's Movement (ZPM); People’s Conference Party (PCP); Tualṭo party tenau: Mizoram Fourth Front; Zoram Thar (New Mizoram); Mizoram Chhantu Pawl (MCP) or Save Mizoram Front; Operation Mizoram (OPM); Ephraim Union (EU); Ephraim Israel National Convention (EINC); Hmar People's Convention (HPC); Hmar People's Convention (Democracy) (HPC-D); Lai People's Party (LPP); Paite Tribes Council (PTC)

Political party chuai (defunt) tawhte: Mizo Union; United Mizo Freedom Organisation (UMFO) Eastern Indian Tribal Union (EITU); Mizo National Union (MNU); Mizo National Front (Democratic) (MNF(D)); Mizo National Front (Nationalist) (MNF[N]); (Zoram Nationalist Party); Citizens Common Front (CCF); Mizo Janata Dal (MJD); Mizo People's Conference (Progressive) (MPC[P]); Maraland Democratic Front (MDF) ; Reang Democratic Party (RDP); Zoram Nationalist Party (ZNP) ; Zoram Decentralisation Front (ZDF); Zoram Reformation Front (ZRF) Zoram Exodus Movement (ZEM); Mizoram People's Party (MPP); People's Representation for Identity and Status of Mizoram (PRISM). Tun hnaiah Aam Aadmi Party (AAP) a lo ding thar ve leh mek bawk. Political party kan ngah tawh tehlul nen hmasawn erawh kan harsat hle a, mirethei erawh kan pung tual tual a nih hi!

MANIFESTO AWMZIA

Manifesto hi Italy thumal aṭanga lak a ni a; anni pawh hian Latin thumal ‘Manifestum’ tih aṭanga an lak chhawn a ni a; Mizo ṭawng chuan fiahfai, chiang emaw langsar tihna a ni. Sapṭawnga manifesto thumal an hman hmasak ber hi kum 1620 vel kha nia chhut a ni. Manifesto sawi nan Mizo ṭawng phei chuan thumal hlawm khat fel fai fak kan nei lem lo va, a nihna ang ang hian Mizoṭawng ang hrimin kan hmanpui ve ta mai ni berin a lang. A zau zawnga sawi chuan manifesto chu sawngka, pawl thupui; vantlang hmaa thupuan; sawichhuahna; hriattirna (notice), thupui tum (policy); puanzarna (promulgation); vantlang hriattirna; thurin puanna (statement of belief) tihte nen a inang a, a huam zau hle. Hman lai thlirin Karl Marx & Friedrich Engels's Communist Manifesto (1848) leh Zirlaiho Democratic Society manifesto 'Port Huron Statement (1962)'-te kha a lãr zual leh chhinchhiah tlãkte chu an ni. Party manisto-ah reng reng tu party mahin 'insawichhiat ṭhin tur' tih an dah ngai a rinawm loh. Mahse, kan Zoram Political Party-te hi chuan "insawichhiattawn tur" tih hi manifesto-ah an dah ṭheuh emaw tih mai turin Social media chi hrang hrang hmangin ṭawngkam feikibarin an inkhawhtawn zuai zuai reng mai niin a lang. Chuvangin, kan politician-ho hian manifesto awmzia hi hre chiang thar leh se a va'n tihzia dawn tehlul em!

A TLÃNGKAWMNA

Party manifesto awmzia chu kan hre chiang ta. Khi'ng zorama political party 37-te pawh khian manifesto mumal tak, ṭha tak tak an nei vek a, a bu (print media) leh non-print media, visual-media, Non-visual media thlengin an puang chhuak a, mahse, a tihhlawhtlin lam erawh an harsat hlawm hle a, heti lamah hian hriatna an tlachham tlang hle niin a lang. Tunah pawh inthlanpui a hnai a, an manifesto theihnghilh ṭhakin mimal an insawichhetawn leh ṭan ta chiam chiam mai! A bikin Chakma chungchangah pawh a tira chakma tei thei lova insawi ṭheuh siin inthlan dawn chuan chakma candidate an nei leh ta fur mai, tu mah inpuh chhe tur an awm chuang lo.

MPCC, MNF, PC-te hian CADC-ah Sorkarna an kengkawh vek tawh a; ZPM lah Chakma vote tel lova sorkar theia insawi ṭhin nia an sawi ṭhin a ni a, mahse, tunah CADC inthlanah candidate 13 lai an nei a, chuvangin, tute mah insawisel tur an awm lo. "Keini kan dik, kan thiam; anni an dik lo, an chuti khati," tia insawichhetawn chiam chiam lovin in manifesto ṭheuh kha uar taka sawiin, chu chu a taka tihhlawhtlin ngei tum ṭheuh mai ula, mahni tih theih loh tur sawiin intiamkam vak vak ṭhin lo ula, mipuiin kan ring zawk ang che u a, mi ṭha tur leh ram hruaitu tlãk tur kan belchiang thei anga ram hruaitu ṭha kan thlang chhuak thei chauh ang.

Chuvangin, political platform-a inlar ṭhin ram hmangaihtu nia inngai ṭhin leh inngai mekte u, tun aṭang chuan in party manifesto ṭheuh kha huaisen tak leh uar takin sawi ṭheuh tawh zawk teh u. In invaupuma leh insaipukna ṭawngkam bawlhhlawh pui puite khan mipui beng dar a nghawr keh sawm tak ngial dawn e.

- Dr. C. Lalrampana