VC inthlan hi a sawn theih em?

Hri hlauhawm leng velin kan Biak In ber pawh a kalh tlat chung pawha VC inthlan lo buatsaih ṭalh tumtu an awm hi a mak a ni. College exam hun pawh an sawn rawk rawk lai hian mipui tam tak pun khawmna tura inthlan buatsaih hi a kawng hmang lova, sorkar thuchhuah vekin social distancing vawng lo chu pawisa a chawi tir lai thova VC inthlana punkhawm hut hut buatsaih tumna hi eng rilru aṭanga lo piang nge ni ngai ang le?

Chhan an sawi pakhat chu politics thil a ni. Inthlanah reng reng hian vote a tlak ṭhat loh chuan ruling lam tan hian chance a ṭha ṭhin a, inthlana vote a tlak ṭhat chuan ruling lam paih duhtu in vote an thlak ṭha tihna a ni. 

Vote percentage tla ṭha hi chu ruling tan chuan thil hlauhawm tak a ni a, chu chu ruling party hian a hlau a ni ngei ang hri len hlauhawm lai takin inthlan an buatsaih lui dawn tih a ni a. Hei hi thlirna dik awm ang taka lang a ni a, mahse a dik vak lohna chhan chu inthlan buatsaihtu hi sorkar an ni lova, State Election Commission (SEC) an ni. State sorkar hi inthlan buatsaihtu an ni lova, MNF hi puh chhiat lutuk tur a ni lo. 

Inthlan chung­changah hian political party hi inlungrual ta vek ang se, "Hri leng avang hian inthlan hun hi sawn hlat leh tur," ti ta se a sawn hlat leh theih ang em aw? MNF Senior Vice President Pu Tawnpuia khan SEC thu thu a nih kha a sawi a, sorkar chuan SEC-ah ngenna/ rawtna a thlen thei ti khan a sawi a, kha kha MNF hi chuan va thlen se chu inthlan hi an sawn a rinawm. 

Pu Tawna sawi ang hian MNF hian rawtna hi an thlen thei a nih chuan Mizorama Covid-19 positive tam dan en hian inthlan hi sawn hla tur hian MNF hian State Election Commission lamah hian thlen se chu a tira kan rawn sawi lan "Vote tla percentage a hniam chuan ruling tan chance a ṭha," tih khi a rawn thei chhe dawnin MNF fakna hi neutral thinlung lamah a tlana dawn a ni. 

Mizorama inthlan­na awm tawh reng reng hi tun hnaiah chuan political party inbeihna kan han ti a, a nihna tak takah chuan political party in neutral hip tuma intih siakna a ni zawk awm a sin mawle. Congress party chauhin a tlin theih loh tih chu 2018 khan kan hmu. MNF party chauvin a tlin theih lohzia chu 2008 leh 2013 ah khan kan hmu bawk. Unit pawh nei lovin ZPM-in MLA bial pariat an lak theih chhan pawh kha ZPM len tak hluai vang ni lovin neutral-in an puih ṭhat vang a ni. 

MNF hian hri leng chung pawha inthlan sawn hla tura SEC lamah an thlen loh chuan neutral vote hi an hloh nasa viau ang. Mipui hian inthlan hi an nghakhlel lo; mipui hian inthlan hi an hreh zawkin a lang. Inthlan miin an hreh laia inthlan luih tum hi eng thil nge maw ni ngai le? VC term hi a la pawh sei theih an ti si a, lo pawt sei leh lawk ta mai se, tihte hi kan rawt ve a ni. 

VC inthlan hi a sawn hlat theih lo em ni?