KAN HMABAK ENG HI....

Sialhawk-ah Sawhthing tender chhan a ni a, a ngam huai berin kg khat Rs. 119/- in an chhang tawh. Kan Sawhthingte hi a ṭha ber chi an la ti lehnghal.

THLAITHAR HRALHNA

DALTU DAN SAKEI

Hmanah khan Pu Lalnunmawia Pachuau chuan, hetiang hian a rawn auchhuahpui tawh a "Kan thlai hralh leh lei chungchangah hian a thar chhuaktute hian thuneihna kan lo nei reng reng lo mai a, kan thlai thar hralhna kawngah kan sorkar berin khuahkhirhna dan khauh tak a lo siam reng tih hi mi nawlpui chuan kan hre lo mai thei.

Kum 1994 Congress Ministry hun lai khan The Mizoram Agriculture Produces (Restriction of Movement) Order, 1994 kha an lo passed rup mai a. Chutah chuan Mizoram thlai thar lâr tak panga (5); Sawhthing, hmarcha, la, chhawhchhi, etc., te an khuahkhirh zingah a tel a ni. He dan hnuaiah hian kan thlai tharte lei turin sorkarah permit dil a ngai tlat mai. Hetiang dan hi India ram khawi hmunah mah a awm lo a, Mizoramah chiah a awm tlat mai.

Congress Ministry hun chhung hian Sawhthing hi Hmeithai Asso­ciation te pawhin, The Tribal Coope­rative Marketing Development Federation of India (TRIFED) nen agreement siamin a hralhna an hriat vangin rate ṭha zawkin an lak ngam thu an chhuah ulh ulh a. Tichuan truck trip tam tak an lak hnuah Hunthar aṭangin ṭawngṭaina nen an thlah liam hnu lawkah sorkar ropui chuan Police te nena ṭangrualin an hnûk kir leh a, case an siamsak ta hial a nih kha.

Chumi hnuah permit dîl ngai a nih hriain permit chu an han dil a, mahse kan mirethei hmangaihtu Congress sorkar ropui tak khan permit pe duh lovin an dang chêp zui ta tlat a nih kha. Ngawi rengin Sundar Ali chuan kan ram thlai thar market chu a control ta reng a ni. Chumi hnuah Synod mangang chuan khawmpuiah thlai thar lei chungchang a passed ta rup a, tichuan Congress sorkar chu a tla chhunzawm ta a ni.

Chu mi hnuah kum 1998-ah MNF an lo sorkar ve ta a. Anni hian ‘sawhthing chu kan sawrkar ve leh in kawtkaiah Kg 1 Rs 10 in kan la ang' tiin mipui min lo hnèm chho a. Tichuan, beiseina sáng tak nen MNF chu kan han thlang tling a. Amaherawhchu, kum 1999-ah MNF sorkar chuan kan sawi tak Dan sakei chu lo siam ṭha (amended) in, The Mizoram Agriculture Produces (Prohibition of Movement) Amendment Order, 1999 tiin thlai 138 an lo khuahkhirh belh ta hlauh zawk a! Thlai tènau ber pudina thlengin an lo khuahkhirh belh bur mai.

Hetih lai hian Synod mangang chuan hruaitute tirin Sawhthing hralhna market chu an zu zawng ta a, a hralhna tur an hriat vek hnuah Mizorama Kg 1 Rs 6 vela an hralh lai chuan Kg 1 Rs 26 laia an ngam thu te an lo puang ta a, mahse MNF sokar pawh chuan permit a pe phal ta chuang lo a. Chumi hnuah fam ta Pu Lalchhanhima Sailo chuan High Court-ah zualkovin permit a dil ta a, High Court chuan kar 1 chhung permit pe turin sorkar chu order a pe ta a, tichuan helaia Kg 1 Rs 6 vela an lak laiin Rs 17 chuan a la thei thung.

Mahse he mi hnu lawk hian a permit chu Mizoram sorkar chuan minister direction angin an cancel leh ta a, ngawi rengin Sundar Ali chuan kan market a lo control chhun­zawm thei ta a ni..." a ti. Heng thute hi thu dik a nih ngai chuan, sorkar kan lo hrawn tawhte leh hrawn mekte hian, an hlawkna um ringawtin mipui min lo awp bet reng a ni awm e.

Nimahsela heng dante hi tih bo a la ni ang, mipui kan â tawh lo. Kan thlai tharte kan hlawkpui hun a la thleng ang. Mipuiten hmabak eng kan thlir mek.

TOURIST
LAM PAWH HI

Tun hnaiah USA aṭangin Sap pitarin min rawn tlawh nawlh mai a, kar khat zet min chamchilh hnua Mizoram a hmuh dan kan zawh chuan, nuam a tihzia ha hipin a sawi a, "Hetiang taka ram nuam si, engtizia nge tourist an va tlem em em ve? a ti daih mai.

A ni reng asin, kan ram hi a boruak te, a ram leilung leh thing leh mau ringawt pawh hi, thlir vawng vawng tham, ram danga an hmuh ve mai mai loh a tam lutuk. A hranpaa chei vak vak pawh a ngai lo, a kal velna kawng zau leh chul mam that ni reng sela, kan ram mawina en tur hian an lo la kal sup sup mai ang.

ZOKHUA SAW

Hnam dang mikhual nei apianga en ve se kan duh chu, Zokhua Falkawna mi saw a ni. Hmanah UP aṭanga vai thian rual lo kal ka vahkualpui tumin, he Zokhua ah hian kalpui ka tum a, Video shooting an nei mek, luh kan phal lo an lo ti tlat mai. Tun ṭumah pawh kan milkhual chu kan kalpui leh a, Video shooting avang bawkin luh an lo phal lo leh vel a, ka nupuiin thinrim aw chhuahin, engatinge hmun hla tak aṭangin kan lo pan ve vang vang a, hetia luh a rem lohte chuan internet-ah te rawn sawi ta che u, a ti bawrh bawrh mai a. Shooting nei mekte khan, "Hei kan chawlh lai a nih hi, han lut ru" an lo ti hlauh a, kan lut thei chauh a ni.

Hetiang hmun kan neih te hi tlawh theih loh hun a awm a nih chuan, mipui hriattir hmasak a tha khawp ang. A thuhrimah a luh mante saw, a enkawltu Chawki­dar te sawn an lo dawng ve tawp mai a, receipt pawh min pe chhuak lo, kan che ho angreng khawp mai.

Engpawhnise, Zofate hian hmabak eng kan nei, a nih dan tur ang takin thil a la kal lo mai mai a ni. Kan hmabak eng tak hi a kawng sialtu kan mamawh a ni ber mai.

- Lalrinliana Colney