Kawng chhâwng siam tum kha....

Nikum khan Vanglaini chanchinbuah Aizawl khawpuiah kawng chhawng siamna tur inremna an ziah thu ka lo chhiar fuh tlatin ka hria a. Mahse a rei leh deuh tawh avangin a kimchang kha ka hre thei reng ta lo a, mahse CM hoa inremna ziah a nih avang khan ka ngaih a ṭha nghal a, mahse vawiin thlengin a ban pakhat pawh hmuh tur a la awm ta si lo a, ka ringhlel leh ta deuh tlat mai.

MNF sorkar term pawh a tawp dawn ta hial, Aizawl khawpui Bawngkawn leh Vaivakawna flyover siam tuma ruahmanna awmah khan Mizoram sorkar leh Telecommunications Consultants India Ltd. ten thawhhona thuthlung an ziak tih kan lo hmu a, tuna kan Chief Minister hoa ziah kha a ni nghe nghe a.

Kuminah MLA election kan neih leh dawn ta der a, kum a vei leh dawn tawh chu a ni a, mahse MNF sorkar hun tawp lam kan hman mekah huan an thawm riva hriat tur engmah a awm zui si lo hi eng nge a chhan ni ta tih sorkar hian sawi fiah se ka duh a ni.

Nikum mai khan ropui tak khan inremna an ziak tih an puang dum dum a, CM hian kawng chhawng (flyover) kan siam dawn tih a sawi fo bawk a. Tunah nghah chhuah tur tak tak awm loin thil dangah kan pakai leh ta vel mai mai a, hmana kan hlawhchhampui tawh Mau/Rua kan tuipui leh ta vel mai mai a. Kawng chhawng lam thu thar a awm zui ta miah lo mai.

An sawi vung lai khan kawng chhawng siam nan Mizoram tan pawisa sen pawh ngai lo tur khawpa ruahmanna ṭha kan nei kha a ni a, eng nge kan thlen chin hi le? Hun an nei tlem tawh si a, mipui kan bangbo hle a ni.

Aizawl khawpuiah lirthei tawt leh traffic jam nasa lutuk hi a ninawm zozai a, traffic jam free khawpui siam tumtu MNF sorkar hian an thil tum hi bul ṭan loa an tlaksan vaih chuan a pawi hle dawn a, tling nawn se kawng chhawng hi an siam tak tak ang tih pawh a rin ngam ta loh tho tho.

Traffic jam hian hun leh tha bakah sum tam tak min khawhraltir a, kan nunphung a tibuai hle bawk a ni. Nakkumah MLA election a ni leh mai dawn a, sorkar leh duh vanga mipui hnenah thudik lo tiam mai mai a nih phei chuan MNF party mi lo nih ve pawh hi a zahthlak viau dawn a ni.

Tunah hian MNF ka ni mek a, mahse ka active ve hman lem lo a. MNF ka nih chhan pawh ka pute aṭanga ni tluang chho zel kan nih vang a ni a; mahse an thutiamah an din loh fo chuan party hrim hrim hi chhuahsan ka duh e. Sorkar tawh Party ho hian min tibeidawng tlat.

- Hmangaiha Laizo