MAK MAI MAI THIN CHU

Mak mai mai thin chu, Mizoram PWD kawng siam leh BRO/ BRTF/company-te kawng siam inmâm hleih thin lutuk hi! Engtia awm thei nge he lei chînah!?

Mi sawi danin, Aizawl khaw­pui chhunga kawng­puite hi PWD-in an siam thin a, a mám tâwk lo fo a, bawl leh ṭiṭoh a tam thin. Chhim lam panin han tlan ila, Aizawl khaw chhungah blacktop khawk miah si loah hian kan sawt ṭek ṭek a, company hoin kawng chinah chuan kawng chhe lai tih lohah chuan sawt awm vak loin kan tlan zer zer a.

Muallungthu aṭanga Khumtung kawngah han péng ila, kan sawt leh beuh beuh bawk ṭhin - PWD-in an siam chin a nih vang ni tak maw? Bawngkawn-Durtlang kawng hi BRTF-in an siam a, a mám zar thei zel thung bawk.

PWD kawng siam hi an siam zawh hlimah a phihrît thin em em bawk a, two wheeler tan chetsual a hlauhawm em em thin a, chetsual phah leh hliam zui ta an awm fo bawk. Hmun thenkhatah phei chuan kea kal tan pawh tawlhthlûk hlauhawm khawp hiala phihrîtte zu nia!

Mizote hi thinrim ṭeuh chungin kan la phun lungawi mai mai rih a. Hetiang a nih zel chuan, hun a kal ang a, kawng siamnaa eng eng emaw nâwi - alkatra/lung/ lei/ balu ṭhîl vanga chesual zing­ah court-a khin nachang hria an la awm chhoh ngei ka ring. Chuvangin, Mizoram PWD-te hi kawng an siam­ah hian fimkhur teh se.

Mizoramah company leh BRTF ten mâm ṭha taka kawngpui an siam theih laia Mizo­ram PWD-in kawng an siamte a biboh bik tlat hi thil mak tak chu a ni - technical thil hrethiam pha ve lo tan chuan.

An thiam ve loh vang a nih pawh a rinawm chiah lo, an thiam ve em em ang. Sum a lo ngai tam zawk hlek a ni thei a, chutiang chu a nih pawhin thil ṭha kan duh chuan sum dah belh hlek chu a theih tho dawn lo'm ni?

Kan PWD mi­thiam tak takte hi han insang mar lehzual deuh se, kawngpui mâm ṭha tak min siamsak ve se kan va ti tak em!

- Kezo