THLANCHHUAHTE LEH A THLANGTU MIPUI HLUTNA

Democracy ram kan nih angin kan aiawha ram leh khawtlang kaihruaitu tur kan thlang chhuak ṭhin a. MLA a ni emaw, Municipal Councillor a ni emaw, Village Council/Local Council emaw pawh ni sela, mipuiin kan aiawha rorel tura kan thlan chhuah an nih miau avangin an pawimawhin an hlu takzet a. Sorkar leh mimal, pawl hrang hrang tan kal kan mai mai theih an ni lo. An phenah anmahni thlang chhuaktu 'mipui' an awm tlat!

Chuvangin, Mu­ni­cipal a ni emaw, Village/ Local level a ni emaw, rorel tura mipui thlan chhuahte hi eng sorkar mahin an palzut mai mai tur a ni lo a, ngaihnep tur an ni hek lo. Local Government an nih anga an chanvo tur chu an chang ngei tur a ni zawk (Central sorkarin party dang daih sorkarna state hnenah pawh a pek tur a pe zel tho ang hian). Chutiang ni lo a, state-a rorel lai party an nih loh avanga sorkarin kal kan emaw, palzut emaw an tum a nih chuan an phena awm, anmahni thlang chhuaktu mipui an zah lo hle tihna a ni a, sorkar ṭha a ni lo chiang hle tihna a ni. 

Development lama hreka kan invau ṭhin te, Minister leh sorkar ko eih thei tur leh thei lo tur ti zawng kan invau thlem ṭhin ngatte phei hi chu a democratic lo a, mipuiin duhthlanna thiang tak kan neih nekchep tumna dik tak a ni. 

Kan hruaitu hma­sa, politician hma­sate chuan hetiang kalphung hi an lo zawh tawh ṭhin a ni maithei, ṭawngkam mawi lo tak tak pawh an lo chhak chhuak tawh a ni thei e. 

Keini, ṭhangthar dikna duh, chang­kang zawk leh hawi harh zawkte (gene­ra­tion tharah) hi chuan hetiang hi kan kalsan a hun tawh a ni. 'Mipui hian vauna tel lovin kan duhthlanna thiang tak hi kan hmang thei ngei tur a ni.' 

Kan duhthlan theihna ngai pawi­mawh loa min vautute reng reng ngawi rengin Vote hmangin kan chhanglet ngei tur a ni bawk. 

I duhzawng mi thlang turin zalenna famkim i nei e!