LEMCHAN VE THUNG

Kan khawvel hi mihring leh thil nung eng pawh dam khawchhuah theihna tura pawimawhin a khat a. Bawhchhiatna aṭanga kan hmuh chu, “I hmaia thlan tui luang zawih zawihin chaw i ei tawh ang,” tih a ni. He thu hi mi tam tak chuan Pathian anchhiaah kan ngai awm e.

Ka sawi tum chu lem­chan hi eizawnna hlawk tak a ni, tih leh a phena thil inphum pawimawh a ni.

Mihring pung zelah mamawh chi thar pawh a piang ve zel a ni. Mamawh chi thar lo piang zel chuan lemchan pawh eizawnna hlawk takah a chantir a ni.

Tunah chuan infiamna hi eizawnna ṭha a ni bawk. Football khel thiamte hlawh hi chawlhkar khata an hlawh ringawt pawh keini ang rual tan ram leh inte kan lei dawn a nih ngawt loh phei chuan hman zawh huphurhawm khawpa tam zu nia!

Lemchan pawh chuti tho chu! Film khata an tihfuh tawh chuan chu film khat chan nana an hlawh chu vaibelchhe tel a ni thei. Chuvangin, miin sakhuana avanga a hnawl a nih ngawt loh chuan Filmstar nih chu hnar phal rual a ni lo vang. Mahse, Filmstar chu a duh apiang tan nih theih ngawt a ni lo, talent ṭha tak neih a ngai. Hmelṭha bik tak emaw, a film chan tura theihna bik mi naran neih loh nei tan hun remchang a tam bik.

Lemchan hi keini Mizote chem kalna zawng tak pawh niin a lang. Mizo hrim hrim hi kan la tlem a, kan film siam vete lei duhtu an tam thei rih lo va, a hlawk tur angin a hlawk thei lo. Copy chhawnga hlawkpui nana lo hmang duhtu, dan bawhchhiat pawisa lo an la awm ve zel bawk nen. Chuti chung chung chuan Film Release tur pawh a khat tawkin a awm ve deuh reng tawh a nih hi!

India ram mirethei tamna leh thluaka sum lut an tih ang tamna rama eizawnna hlawk ber chu ram hmangaih lem­chan hi a ni awm e. Ram hmangaihtute hi ram tan an hlu a, anmahni avangin ram a him a, ram rethei takte pawh an lo ding chhuak tawh ṭhin.

Singapore ram te reuh te, Sapṭawnga 'hinter land' an tih ang pawh nei lo, ram rethei bakberh kha ram hmangaihtu, ram tana inpe zo, Lee Kuan Yew an neih avangin khawvela ram awhawm berte zingah an inhlangkai a. Kha mi ropui kha Singapore mipuite khian an theihnghilh phal tawh ngai lo vang.

Mizoram pawhin ram hmangaihtu kan lo nei ve nual tawh. India independence hnua kan hruaitu hmasa Pu H.K. Bawihchhuaka leh Pu Ch.Chhunga te kha an fing viau lo a nih pawhin ram tana an inpeknate kha chu Mizo hnam a dam chhung chuan kan theihnghilh tawh lo vang.

Pu H.K. Bawihchhuaka, District Council-a hotu ber, Chief Executive Member (CEM) khan tunlaia mi ṭhenkhat ang hian duh se chu Aizawlah hian hmun ṭha tak tak inpein in ropui tak tak pawh a sa thei ang. Mahse CEM Bungalow a chhuahsan khan in vawm luhna tur in a lo nei hauh lo mai a, inhmun chhe te a neihah Mizo Union volunteer-ten an saksak ringawt a nih kha.

Kan CM hmasa ber Pu Ch. Chhunga khan a pa in hmun a rochun tuna a nupui fanaute chenna leh Dawrpuia a pa Damdawi dawr bak a neih belh lo, pek an tum pawhin a la duh lo. A fapa pasarih leh a fanu palite tan sawrkar hna leh contract hna a pe duh lo tluanchhuak a, mi dang tan a kian vek.

Heng mi ropui pahnihte hi Zoram mipuiin an theihnghilh phal tawh ngai lo ang. Kan sawi thui chuan tute emaw kan hek tihna a ni thei. Ram hmangaih lemchan hi tawi tein i han luhchilh hlek teh ang.

Lem chang tur chuan talent neih ṭhat a ngai a. A hunah chuan lungchhe tak anga tap mai thei, nuih a hun chuan za taka nui thei, mi awih zawng taka thusawi thiam nih a ngai. Sumte pawh neih ve ṭeuh a ngai. Khaw khat/ veng khata pa thusa ve deuh, chhiat ber lai pawha min phatsan mai mai lo tur, min sawimawi thiam tak tur suma hlin beh tlat mi pahnih khat tal MLA bial khata khaw tina neih a ngai.

In tahluhna tur political party kha inthlan lo awm leh hmasa ber tura sawrkarna la ngei tura rin zinga mi a nih a ngai. Chu party-a a hruaitu ber inah khan tlangnel viau tur a ni. Kha party-a phusa deuh chin kha chu tumah biak chhiat loh tur a ni a, Sum pawh a sing tel thawh mai tur. A theih hram chuan nupui chu campaign thiam tak ni tura train bawk tur a ni ang. Inthlanah MLA nih a, sum tamna department chana Minister nih chu thil hlawk ber ni mahse, nih phak chiah loh pawhin lungawi tho tur. Contract vaibelchhe tel man thawh fo theih chuan term tawpah chuan Crorepati chu i ni tho vang. Chu chu lemchan hlawkna em em chu a ni.

Pathian thu sawi tlawr thiam viau erawh bansan hauh loh tur a ni. Lemchang mai i ni tih chu mi fing leh thil chik mi tlem te chauhin an hria ang.

- Lalbiaktluanga,

College Veng, Aizawl