ZOFATE JERUSALEM MIZORAM

Mizote hi kan thlahtu leh kan ṭobul tak hi chhui fiah hleih theih a nih lohna chin a awm a. Chhinlung chhuak kan ni tih hi tun thlenga kan sawi dan fo a ni. Kan naupan laite pawhin chhinlung aṭanga kan lo chhuah dan te kan zir ṭhin. Hun a lo kal zel a, Israel thlah kan ni a, hriatna leh chhuina te a lo awm a, an han chhui tak tak chuan ni awm tak pawha inngaih theih turin an chhui a, a finfiahna nen lam an han tarlan chuan kan ni awm mang e tih mai tur a ni. Kan hmel leh pianhmangah chuan China lam pang, khawchhak lam kan pawl a, a ṭhenin Mongolian thlah kan ni tih te, China lam thlah kan ni tih te leh sawi dan dang dang a awm a, he lam hi chu tun ṭumah hian kan chhui tum a ni lem lo. Israel thlah ni a inngai tam tak chuan Israel-ah min pemsan tawh a, a pem ve lem lo, Israel thlah a inngai tho kan awm bawk. Chiang faka chu mite thlah kan ni ti a, a mipui nawlpuiin kan pawm erawh awm chiah lo niin a lang. A pawimawh ber chu mizo kan ni a, Mizoah hian hnam peng hrang hrang kan awm tih erawh a chiang hle.

Zofate insuihkhawm pawi­mawhzia leh ṭulzia lo tlangaupui tawk pawh mi tam tak kan awm a. Ka pu Capt. LZ Sailova ngei pawh khan Zofate insuihkhawm lam kha tuipuiin, hla te hial a lo phuah a ni. Zofate pawh kan lo changkang chho zel a, khawvel ram hrang hranga awm pawh a sing tel kan lo awm tawh. Europe, America leh Asia, Middle East thlengin kan in zarpharh a, intihlim tham pawh kan lo awm ve ta nual mai. Hmanlai kan Mizo zawlnei kan tihten Mizoram hmabak leh kan awm dan turte an lo puang a. Tunlaiah pawh mi tam tak chuan kan tlangaupui nasa in, lo thleng dik te pawh a awm ta nual ni tein a lang. Hengte avang hian mi ṭhenkhat phei chuan Kohhran hial chhuahsan a, kohhran thar din a, pemkhawm ta ruih ruih pawh sawi tur an awm ṭhin a nih kha. Tunlaiah pawh hian Zoramthar, a hnam ang zawnga tuipui kan tam hle a; Pastor chhawna te, Zawlnei Saikhuma te thu lo sawite pawh huai tak tak a tlangaupui pawh kan awm ta nawk a ni.

Zoramthar lo thleng tur a ni emaw, zawlneite thusawi lo thleng dik tur a ni emaw pawh nise; kohhran lo chhuahsan a, lo inlakbing kher erawh a ṭulna a awm ber lo. Zofate tana kan inpui, Jerusalem chu Mizoram hi a ni ka ti ve tlat. Tunah pawh hian mak taka hruai khawm kan ni mek a, inhmangaiha insuihkhawm a hun tawhzia hi Pathianin min hriattir niin ka ngai.

Tunah Burma aṭang te, Bangladesh leh Manipur aṭangin mak takin min huikhawm a, hei bak khawvel hmun dang aṭang pawh hian min hruaikhawm lovang tih tunge sawi thei? Hmanlai aṭang tawhin mak takin harhna thlarauvin min tuam ṭhin a, a khat tawkin kan ramah hian harhna a thleng emaw tih mai tur a ni. Khawvel hmun dangah hian keini ram anga a khat tawka Pathian thlarauva harhnain a nuai hi an awm ve awm kan hre lo. Kohhran hrang hrangin zing tin ṭawngṭai inkhawm kan nei a, kohhran rawngbawlna lah kohhran tinin kan theih ang tawkin kan kalpui a, zan awl awm mang lo khawpin Pathian tan kan inhmang a ni.

Sualna a pung a tam ta kan tih rual hian Pathian mi leh ṭawngṭai thlahthlam ngai lo mi hi an va tam em! Kohhran tinin camping, retreat, crusade kan nei reng a, Pathian biakna lah a rawngbawlna hi thlah lovin kan kalpui reng a ni. Tawngṭaina tlang (prayer mountain) ah te hian nitin ṭhalai leh nu leh pa Pathian autu an kal reng a, chaw ngheiin kar khat te, a aia reite inserh hrangin Lalpa an au ṭhin a ni. Kohhran leh pawl ho an kal reng bawk. Heng Pathian autu leh duhtu, kan ram tana ṭawngṭai ṭhin mi te avang hian Pathian hian Zofate hi min theihnghilh lo a ni.

Pathian ringtu kan nih avanga tuarna leh endawngnate pawh kan state ṭhenawmah te kan tawk reng chungin, ṭhahnem ngai taka thawktu sang tam tak kan nei a ni. Tunlaiah hetiang taka kan State ṭhenawma buiana leh harsatna lo thleng ta hi Pathian hian Zofate hi insuihkhawma ama tan nung tur leh inthuruala Pathian tana rawngbawl turin min duh niin ka hre ta ber mai.

Kan ram riangte hi zofate inpui leh kan haw khawmna tur a nih miau avangin kan lo inbuatsaih sauh sauh pawh a ṭul hle mai. Tun bak pawh hi ala awm dawn chauh maithei a, Zo hnahthlak hrang hrangte tana kan inpui chu Mizoram hi a ni tlat a, chuvangin kan unau harsatna tawka lo tlan khawmte lo kuangkuah a, lo ṭanpui hi inpuia lo awmte hian kan mawhphurhna a ni. Chutih rualin ṭhenkhat sual khawihna remchanga lo hmang tawk pawh an awm ngei ang, heng mite avang hian hnual mai lo ila; a sual ai hian a ṭha an tam fe zawk tih hi i hre reng teh ang u.

Pathian hian Zofate hi insuihkhawma ṭangrual turin min hruaikhawm mek a ni. Thil mak ve angreng tak chu- zo hnahthlak kan tihte hi Kristian kan ni deuh zel mai hi a ni. Zo hnahthlak chiang tak zingah milem bia, sakhaw dang hriat tur an awm a nih pawhin an tlem khawp ang. Mizoteah hian Pathian hian tum eng emaw a nei a ni phawt ang; chuvangin Pathian lawmtlak ni tura kan intih thianghlim a, dik tak leh rinawm taka rorelna kalpui a, kan state ṭhenawm leh khawvel ram dangte aṭang pawha entawn­tlak ni tur khawpa tan kan lak hi a hun ta khawp mai.

Zofate hian ṭangrualin Pathian au ila, engkim titheitu Pathian chuan min tithlawn lo ang. Amah hnaih a, theihpa tawpa a tana thawktu te hi Lalpa hian min en san dawn lo. Zofate kan ṭanrual a, pheikhai vawra zaa lungrual taka ke kan pen chuan hnam chak tak leh thiltithei ni turin Pathian hian min din ngei dawn a ni.

- Reuben Lalnunthara

Hnamte