Politician hausa rapthlak!

Tun lai chu ka tih tur hre lo hi politician hrang hrangten Election hmaa an thil neih an puan chhuah hi ka lo thlir ka lo thlir a, Mizoram Politician hi hausa tawntaw an lo tam tawh hle tih hi ka hmu a, Politics hi hausa rapthlak siamna khawl leh Mizorama sumdawnna hlawk ber a nih theih dan hi ka hmu chhuak a ni.

Kan hmelhriat chian em em mi pahnih aṭangin thil thleng tak tak ka rawn sawi dawn a, pakhat chu Congress niin pakhat chu MNF a ni a, pakhat zawk hi chu hausa ve thawkhat sa a ni a, chuti chung chuan kum 10 vel Congress an sorkar hnua a thil neih belh ka chhiar theih thuak thuak chin chu - JBC leh Hitachi 1 ve ve, Scorpio 1, Sangha dil lian (hei hi chu a neh hun ka hre lo) heng bakah hian an chenna in chu chhawng 2-in an zawm a, veng pawnah pawh building lian kudama miin an luah hawh a nei niin an sawi ka hre bawk a ni.

Ka hriat leh pakhat zawk hi chuan compentation a la fuh an ti mai a, a hausakzia hi a hre chiangten an hrilhfàk a, a hausak dan chu sawma pakhat a pek pawh veng chhung titi zuk han tling phak a. A hausak dan hi a fair leh fair loh kan hre thiam lo na chungin; Compensation a lak hian amah mai ni lovin, 'ṭhianṭha' inrawlh an awm nual an ti bawk a ni. Kawngin a paltlang tur ram a lo nei fuh chat chat ṭhin a, a hre chiangsa kawhhmuhtu awm lo tan chuan thil theih loh a ni a, tichuan an sawi dan chuan a hre chiangte hian a hming tum si lovin lawmthu sawina ang hian sum an lalut ve ṭun ṭun bawk a ni.

Politician kan han sawi hian Minister, Chief Minister leh MLA te hi kan han kawk ṭhin a, an hnuaia mite hi a sum zawng chuan a hausa hlei hlei an ni a, inthlan dawnah pawisa an 'invest' a, chu an chiahpuam chu an Party an lal chiahin a hlawkna an tel ṭhin a, ṭhenkhat hi chuan an hmingin hna an thawk a, a neitu chu MLA leh Minister an ni a, Compensation pawh an hmingin an la a, a neitu chu an Pute an ni bawk a. Hei hi Politician tam tak hian an Election Affidavit ah hian an declare tel lo zawk a, a zavai hian declare se chu Mizorama hausa sa hi Politician an ni ang an ti a ni. Kan ram hian siam ṭhat a mamawh khawp mai. Manipur iangin hel pawl an chhuah mai a hlauhawm phak tawh a ni.

- Mangheta K.