Ruihhlo ven dan thar kan mamawh

Covid 19 vangin hun harsa tak kan paltlang ṭan mek a, mitin harsat hrang hrangin min tlakbuak a. Chutiang kan harsatna tawh zingah chuan sum leh pai lama harsatna leh ei bar zawnna kawngah hian harsatna kan tawk nasa bik a. Hei hi Mizoramah chauh ni loin ram dangah pawh a ni ve tho a, chuvangin tun hmaa mi tam zawkin an tih duh loh sum hmuh theihna tur nia lang thil ṭha lem lo pawh tunah chuan an ti duh zel tawh mai niin a lang.

Hmanni mai pawh khan Excise & Narcotics Minister chuan thuchah a sawi a, ruihhlo dona kawngah Zoram mipuite kan ṭanrual a ngaih takzet thu a sawi a, social media lama darh vak ruih­hlo hlauhawm Fen­tanyl te pawh Mizo­ramah a lut tawh nia sawi a nih kha.

Ruihhlo hi tun hma pawhin a awm reng tho a, zu phei chu kan khap rem thei lo tih chu a chuang reng mai. Amaherawhchu tun hnai kum 2/ 1 chhung lek hian ruihhlo chi hrang hrang a hluar thar hle mai a, tun hma zawng ai pawhin Mizoramah a bikin ruihhlo a hluar a, ruihhlo awlsam tak leh man tlawm zawka hmuh theih a nih phawt chuan ruihhlo ti pawh an pung thar hle dawn tih a rin theih.

A bikin ruihhlo hi Mizo ṭhalai zingah a hluar thar hle mai a, kan nundan phung leh chi inthlah dan thlenga tibuai vek thei a nih avangin ruihhlo do kawngah hian rilru thar kan sen a ngai a. Tun aia ṭha zawka ruihhlo kan do theih dan tur leh kan tih rem theih dan tur kawng hi kan dap thiam vat loh chuan nasa zawkin ruihhlo hi kan chhiat pui dawn tih a lang reng mai.

Dan rual lohin Mizoramah ruihhlo hlauhawm Heroine no. 4 pawh a lo lut reng a, nitin mai hian hmuh tur a awm a, police lam pawhin ni kar thlak ang dawn hialin an man bawk a ni. Tun hma zawng aiin a tam ta zawk tih a chiang viau a ni.

Vai ram leh kan ram thenawm Myan­mar lam aṭanga Mizorama ruihhlo lo lut tur hi vengtu awm lo ang maiin zalen takin a lo lut thei a. Tun hnaiah ramriah vengtu an awm mumal loh avangin ruihhlo a pung hluai pawh niin alang a, hei hi engtia tih tawp chi nge ni ang tih hi kan sorkar chak tak pawh hian bawhzui vat se. Mizorama lo lut tawh, an phurh darh tur leh ruihhlo ngaite hnena an zawrh chhawn leh tawh man hi awm reng mah se a man chhuah tak loh eng emaw zat chu a awm ngei dawn tih a lang reng mai.

Ruihhlo do dan thar duang chhuak turin kan sorkar hian hma thar han la teh se.

- Pekhlua Pu