LO DEM MAI SUH

Dt.27.8.2020.lo thleng mai tur kan khawtlang (khua veng) V.C./L.C. inthlanna kan neihna turah hian ram chhunga mipuite rilru leh ngaihtuahna thui tak thlir chunga vote kan thlak a ngaiin a pawimawh hle a ni. A kum chhung thuah pawh kum 5 chhung a nih avangte pawhin, khua/veng (khawtlang) hmasawnna kengtu turte an nih dawn avangin bengsika ngaihtuahna kan sen a ngai hle dawn a ni. Kan ram chu inthlang ram kan nih angin roreltu turte mipuite'n kan thlang chhuak ṭhin a, kan thlan chhuahate'n nge tisual a thlangtu mipuite thlan chhuah dan system dik loh zawk vang ni ang? Aeng apawh chu lo ni se party system-a candidate kan thlan chhuah dante leh an laka mipuite'n beisei kan neih dante hi thlak (change) a ngai nite pawhin a lang.

Chutihrualin, khawtlang hmasawnna tur atana rawngbawlna a nih angin kan ṭhalai thiamna sang zawk nei Nu tling Pa tling mi dik leh rinawm mipuitling khawtlang tana hmasawnna (vision) thui tak nei, rilru thianghlim zawkte kan tun dinhmunah hian beiseina leh duhna a sang hlein kan khua veng (khawtlang) hian a mamawh hle che u a ni. Party politics siam ṭhat a nih theihna tur atan chuan veng khua (khawtlang) aṭanga siam ṭhat hi kan tihtur ni awm tak pawhin a lang. Chuvangin tun V.C./L.C. inthlan kan hmachhawnnaah hian party aṭangtein leh independent aṭangte pawhin kan tehnaa tling lo kan tihte leh thiamnaah pawh zir sang lote, finnaah pawh fing lo kan tih zawkte pawh an rawn lang nual ang.

Mahse, lo dema lo hmusit mai loin an dinhmunte thlir thiampui a, khawtlang rawngbawlna atan mualpho pawh huama ke an pen ngamnate ngaihtuahpui chungin keini ṭhalai rual thiamna sang zawk neite tana chona sang zawk min siamsaktu atan lo ni se kan duh ber a ni. Chuvangin kan Ram leh Hnam (khua leh veng) achhiat aṭhata mawhphurtu chu nang leh kei hi kan ni. Rawngbawlna tura i mawhphurhna i vote hlu tak kha lo thlak ngei ang che.