GPay Politics hi MPF in a veng thei dawn em?

Lunglei Municipal Council leh tun hnaia Aizawla Local Council inthlanna Zemabawk lamah khan ṭawngkam lar tak chu 'GPay' tih a ni. Kum upa zawk tak hriatthiam a harsat takin thiam ang tawkin sawifiah ta ila - GPay tih hi chu Google Pay tihna a ni a, phone kaltlanga awlsam taka pawisa inthawn theihna a ni. Kum 10 chuang zet chu khawvel hmun hrang hrangah an lo hmang tawh a ni.

Mizoram People Forum hian inthlanna dik leh thianghlim an tlangau pui hi GPay hmang hian awlsam taka bawhchhiat theih a ni ta tlat mai a ni.

Mizoramah pawh mipui nawlpui hian mobile phone kan nei phak tawhin mahni pualin Bank Account kan nei deuh vek tawh bawk a. Chuti chuan kan pawisa inpek tawnna atana kan hman tlanglawn tak chu a pawisa fai cash hmanga inpe lovin cashless an tih pawisa tel lovin GPay hmangin kan inthawn kual ta ṭhin a. Chu chu kan Bank Accout lama pawisa awm sa kha a lo in thawn kual ta mai a, chu chu GPay chu a ni.

GPay hmang hian pawisa a inthawn theih avangin Lunglei inthlan khan GPay hmanga pawisa inthawn hi a nasa hle a, a finfiahnate pawh an nei a, pawisa leng vel hi a awm nual a ni. Zemabawk ah pawh khan GPay hi a lar leh tho a, pawisa inthawn kual hi a awm bawk a ni.

Party mala GPay hmang uar an puh pawh an awm a, he lam hi kan sawi tur ni lovin engtin nge GPay leh Online Payment dang hmanga inthlan denchhena sum sem hi kan tih reh thei ang? tih hi sawi kan tum tur chu a ni.

MPF te hian pawi­sa sem hi phal lo sawm sarih mahse GPay hi chu an dang zo dawn chuang lova, tun apangin MLA ni sa ṭhenkhat leh MLA nih tumte chuan GPay hi an hmang ṭangkai tawh a ni. In thlan tur tinzawn rana pawisa hlawma mitthi ral, pawisa tam thama damlo kan, innei tur lawmpuina tih hming pua GPay hmanga pawisa tam tham pek, lungphun te thlenga inpuih hi a awm ṭan der tawh.

He Online Pay­ment hmanga sum sem kual hi a hming­ah ralna, lawmpuina, ṭanpuina pawh phuah engang mahse hei hi sum semna, vote lei tumna a nih avangin MPF te duh loh kha a thleng ṭan der tawh a ni.

MPF te hi an la ding zel dawn a nih chuan GPay Politics hi an sawiho chu a ngai khawp mai a ni.

- Malsawmdawngliana