Khehpuam versus Tehpuam
Ṭawng ka lama Khehpuam an tihte hi finfiahna ka la hre ve lova, mahse an awm ngei tih chu kan ram thlir hian a chiang. Sumdâwng kan hriat ngai loh tun hnaia lian em em an tam dan hian a nemnghet tlat a ni.
Tehpuam tih hi chu Social Media ṭawngkam a niin ka hria. Ka hriat thiam dan hi a dik chuan Compensation lakna tur ram a awm dâwn tih hriat ruk vanga rem lo lei khawm a, a neitute hnena pawisa tlem tlem pek khawm, chumi hnua Compensation tam em em mai lâk, a tira a ram neitu ni miah lo a tawpa a hlawkna teltu lian tak tak awm hi a ni.
Tehpuam lo rik chhuahna hi hmana Serchhip Dawngzawl rama BSF hmun tur an buaipui lai kha a ni tawhin ka hria a, kha tah khan hausa tak tak an awm thar. Chutiang chiah chuan World Bank Road ṭhenkhat bakah NHIDCL lâk tur kawngpui tlawh turah hian Tehpuam hi a tam hle an ti a ni. A taka compensation la ngei, a hmaa ram nei der si lo hi an lo tam khawpa Kolasib Revenue Office lamah hian nui ru tet tet an tam an ti. Tehpuam hi chu a pawisa draw tu hi a neitu an ni lo tlangpui a, a tawpa hlawk chu rin loh deuh deuh te, rinhlelh rukte an ni.
Hlawk thut thut khawvel hian nasa takin nghawng a nei a, a pawi hle a ni. Hetiang hi ram hmangaihna ni ve tho, ram hmangaih dan dik lo zawk tangka sum ngainat sual tinreng bul lam zawk kha a ni.
Officer pension pakhat chuan ualau takin Railway Compensation a lak thu leh a lâk theih chhan chu an ṭhianten an hrilh avangin a kalna tur tak ram an lei tih a sawi ngam. Amah anga compensation la mahse inthup tlat an tam a, hetiang hi Pu Hawla Compensation hnam tih kha a nih hmel a ni.
Compensation lâk vak ṭhat loh zia chu khaw khatah kawngpui chhak leh thlanga awm hi compensation la leh la lo chu nuai 100 telin an in hausak hleih thut a, khawtlâng a buai phah an ti a ni.
Kawngpui paltlang rama awm khúa hi hausa leh rethei nuai 100 kar dan an ni vawi leh khatah. Khehpuam kan buaipui lai hian Tehpuam pawh hi an lo buaipui nasa a ni.
Dik taka compensation lâk hi sual a ni lo, dik lo taka lâk hi Pathian duhzawng a ni lo a ni.
- Lalremruata