Kan zo hnahthlak puite hian, harsatna an tawhte hi, Mizo nihnaah harh chhuah nan hmang se...

Kan ram buai vanglai khan India Sipai laka kan tawrhnaah khan kan ram hruaitute khan min chhan ngam lova. 1974 khan Brig T Sailo lo chhuak khan, Sipai laka chhanchhuak tûrin Human Right Commitee a din a. Mipuite tawrna kha a hmuna enin a fang kual a, Central lamah hmalain sipai laka kan tawrhna lakah khan chhanchhuahin kan awm ṭan ta a.

Khatia T Sailo hmalakna khan awmzia a neih tak viau avang khan, mipui ngena avangin Human Right Commitee khan Dt. 16-17. April 1975 khan People Conference, Aizawl Theatre Hall-ah a ko ta a. Chuta mipui kalkhawm chuan Party din a rel tlu ta a, hruaitu tûrte thlangin:

President - Brig T Sailo.

Vice Pre. - Sakhawliana.

Treasuer - Zalianchhunga.

an thlang a. Chu mipui kalkhawm chuan October thlaah Assembly neih a, Party hmingte sak turin thu an dah a, an ṭin san ta a.

October thla a lo nih chuan, Genneral Assembly an nei ta a. Party hmingah ngaidan hrang hrang an rawn sawi a, Mizo People Conference tih te, Mizo Democratic Front tih te an rawn rawt hlawm a. Brig T Sailo lo ding chhuakin, Mizo hnahthlak (kan tlangmi puite hi) hmun hrang hranga ṭhen - Burma, Bangladesh, Manipur, Cachar tlangramah te leh Arakanah te kan awm a. Mizo hnahthlakte hi kan tlem bik lova, tlem chuan kan zahawm lova, a ropui theih loh. Chuvangin, Mizote hi nakinah chuan ram bung khata chen ho hi kan la tum dawn a ni. (Greater Mizoram) a sawi chhuak a. Tunah hian, kan tlangmipuite hian Mizo tih hming hi min pawmpui hleithei lova. Chuvangin, kan thiltum (policy) hi Mizo hnam insuihkhawm ram khata chen a nih avangin Mizo tih hming tel lovin, People Conference (P.C) tih a rawn rawt a, Assembly chuan a pawm ta a ni. (Brig T Sailo hian thil hi a lo chhui thui khawp mai)

Hetih lai hian, Mizo tih hming tel lova hmin thei lo, Av Pakunga leh Sanglianchhungi ten, Mizo Democratic Front, (MDF) an din ta ṭalh a ni.

T Sailo khan CM a nih hnuin, Manipur, Chura­chan­pura a zin ṭumin, Mozo hnahthlak tlang mi te hi, kan tlem bik lova. Ram bung khata ka inhlawm khawm a, ram khata kan insuih khawm hi a la ṭhat tûr thu a han sawi a. Chumi ṭum chuan, Brig T Sailo thusawi chu duh lovin Kuki ho khan a lim an hal a hial a ni.

T Sailo hian hnam ropui kan nih theih nan, Mizo hnahthlak zawng zawng hi in thuruala hnam zahawm kan nih theih nan ram khata chen hi a policy a ni a, Zo Reunification Organisation (ZORO) a din ta a. Greater Mizoram Map te pawh an siam kha, Aizawlah ZORO khawmpui te pawh a buaitsaih a nih kha. Keini ram chhunga chengte ngei pawn kan hrethiam lova, nuizatah kan hman mai mai kha.

Tunah hian Mizoram chheh­vel kan zo hnahthlak puite, Myanmar, Arakan, Bangladesh leh Manipur a chengte.... Mizo nih duh lova, Mizo ṭawng pawh hmang duh lote hian hnamdang nen buaina an nei ta a, mangangin an awm mek a ni. Mizoram lo chu tlan himna leh tlukluhna dang an nei lo tih hriain, Mizo lo chu hmangaitu dang leh buaipuitu dang an nei lo tih an hria a ni. Tuna an harsatna tawh hi harh chhuah nan hmang mawlh teh se. Lo tuamhlawm hi Mizote hian kan hnial lo...

- H. Sangliana