MNF beiseina siamtu CADC

MNF chu Ruling Party ni chungin Lunglei Municipal Council inthlanah an mualpho chiang hle a. Zemabawk Local Council inthlan Chief Minister Bial ni bawkah chiang em em maiin an tla leh a, MNF tán zamna tur hlir a ni.

Hetih mêk lai karah hian Chakma Autonomous District Council hun chu a rawn inher chhuak ta hlawl mai a, dan pangngaia inthlan hun ni mah suh se a Governor in a tihtawp avanga inthlan ṭhat ngai chu MNF tán rin loh lama malsawmna dár a lo ri ta zawk a ni.

Lunglei inthlan a zawh kha chuan an Minister an thiampui pa deuh deuh te pawh an Takam chem bo hawi vel mai mai tawh a ni. Minister Senior an chawlh ṭhap hnuah Inthlan Specialist deuha an dah rual chu Last Minute dawnah an rawn phei tir a, result chu artelukawn a ni.

MNF chak loh hrim hrimna ai chuan ZPM rawn solid hi Ruling Party tana ngaimawh lai tur zawk chu a ni. SEDP leh thiam chikim nen Lunglei ah an nil a, MNF tán khúa a thim.

Zemabawk inthlan a awm zui a MNF tán chuan Chief Minister Bial a nih avangin Ruling ṭhatna a ni. Lunglei mang chhia ti reha beiseina ni eng thar rawn chhuah tir thei a ni a, Ruling leh CM Bial chu tling chiang tura beisei an ni a. Mahse a maka makin MNF chu an han nil leh ṭhak chu a mâk teh a ni.

MNF an artelu­kawn lai mêk hian a ZPM chu an han solid ṭhak a, MNF tán lu thak lo pui hiah mai loh chu theih a awm ta lo. 2023 kim tawpa tlak hun nghah mai chu an tih theih tawk a ni ta a ni.

Nimahsela Mizo­ram chhim lamah arsi a rawn eng ta thut mai a, Chakma Autonomous District Council an inthlang a, MNF nge nge an rawn chak ta a. An inthlan hlimah sorkarna chang zo mah suh se BJP lama thlan tlinte chu MNF hian an lalut thei ta a, sorkarna an siam thei dâwn ta a ni. MNF tán chuan lungngaihna ruam aṭangin lungawina tlang thawvengah thlifim a rawn tleh ta a ni.

Chakma inthlan mai mai tia sawi nep chi a mi lo. A chhan chu inthlan hi chuan mipui a deh dan a dang a, Chakma lamin MNF an la rintawk avangin Lunglei leh Zemabawka Mizo mipuiin MNF an rin lohna avanga boruak hniam chu Chakma mipui hian beiseina thar an rawn chhuah tir thei ta a ni. MNF tán beiseina sang tak an rawn thlen leh thei ta a ni.

- C. Lallianzuala