Tawm tura mi hrilhtuten Min ko chhuak leh si!

"Chumi Polling Booth-a vote thak zawng inkhung hran tur"

Ka hlauh ruk em em chu, "Primary School 2 a vote thlak zawng zawng inkhung hran tur a ni a, dar 2:00 hnu lama vote thlak phei chu swab sample lak a la ngai ang," tia an au hi a ni. Hei hi thil thleng thei lo tura anga ngaih loh tur a nih chhan chu Zangena Petrol Pump hnathawk aṭanga Covid-19 kai chhawng leh Chaltlang Lily Venga kai chhawng kal zel dan hian a ti chiang. 

Mi ṭhenkhat thu leh hla lak dan hi chu a politics deuh ngun tawh mai a, "Inthlanah hian vote a tlak tlem chuan MNF tan chance a ṭha tihna a ni a, MNF hian inthlan hun chawpchilh deuhvin State Election Commission hi an puan tir thut a, hripui a len hlauhawm lai takin inthlan luih an duh," ti khawpin Politics sawina Facebook group lamah an han ziak a. Heti tak hian MNF hi an rilru a chhiat chu ka ring bik lova, Mizoram roreltute hian hetiang khawp rilru dik lo hi an pu duh lovang. 

SEC thlirna lam pawh hi hriat thiam pui ve tho tur a ni. SEC tan chuan inthlan tur a nih tho tho chuan, kan hmalam hun a hriat loh avang hian inthlan fel vek hi a ṭha a ni. Tunah hian "A pawh sei theih alawm," tih hi ṭan chhan tur a ni lova, dan ang chuan VC term a tawp tawh avangin in thlan neih tawh tur a ni. Hetih lai mek hian boruak kan thlir chuan thil hi 'dan lo angin a kal' tawh si a, chu vangin inthlan pawh a theih loh a, inkhawm pawh a theih loh a ni. SEC lam pawh hi tawng pawng dem leh sawisel tur an ni lovang, a nawr luitu sorkar pawh an awm lo turah ngaih tur. sorkar hian SEC hi thurawn chu a pe thei a, "Inthlan kan duh tawh, kan party advantage turin hripui len lai tak hian inthlan buatsaih rawh u," tiin sorkar thuneitute hian SEC hi an hrilh a rinawm loh reng reng a ni. He thila SEC leh MNF chhe taka puh hi chu a dawn thui loh thlak bakah politics rilru ṭha lo a ni tawh zawk a ni. 

Hei bakah hian politics kan sawi dawn chuan VC lamin an term zawh hnu tawh thlenga VC hna an la chelh reng hi politics takin a dik thei tawh lo a ni zawk. Tunah hian VC tam zawk hi Congress an la nih a rinawm a, Congress hi State ah sorkarna an chang tawh lova, ṭum dang angah chuan VC inthlan lo awm leh turah hi chuan Congress aiin MNF hi an chet ṭhat tawh zawk pawh rinna lian tak a awm. 

Hei vang hian term hmang zo tawh VC te term pawh sei tum zel hi politics angle aṭanga thlir chuan MNF lam tan chuan a dik thei lova, hri len leh len loh pawh sawi lova inthlan vat vat buatsaih tir hi an ṭanna tur dik tak a ni. Hemi kawngah hian MNF hi dema misual anga chhuah tur a ni lo a ni. 

Hetiang kan sawi chhoh zel dawn chuan politics-ah chuan ni thei leh thleng thei hi a tam tawh avangin mi pawi sawi a hlauhawm a, VC inthlan kan neih leh neih loh hi politics angle aṭanga thlir tawh lovin Health lam tarmit nen thlir tawh ila, chuti chung chung chuan politics hi hmang zui tawh lo thung ila a dik zawk tawh lo maw? 

Tunah hian Mizoram mipui himna tur zawnga thlirin kan hmaa VC inthlan buatsaih tumna awm hi i han thlir dawn ve teh ang hmiang.

Chief Secretary signature pek hnan thlap sorkar thu­chhuah Lockdown/Unlock chungchang hi kan chhiar chian chuan mipuite hi chhuak lo turin min duh hle a ni tih kan hmu thei a ni. Aizawl DC phei chuan Aizawl District chhungah August thla pum hi mi panga aia tam awm khawm phal loh kha a puang bawk niin a lang a, kan chhuah vah loh hi an la duh a ni. Sorkar thuchhuah danah chuan mipui hi pawna chhuak lo turin min duh a, kum 65 chung lam te phei chu loh theih loh a nih loh chuan la inkhung hram hram turin an ngen a, naupang pawh pawn chhuak lo turin an duh a ni. 

Sorkar hian kan puipunna satliah ni lo kan Pathian biak inkhawm pawh min la phal sak lova, inkhawm lo turin a la ti hmiah mai. Sorkarin zirna a ngaih pawimawhzia chu School Education Department lenzia leh sum a sen tam danah hian a hriat theih a, Higher & Technical Education lam pawh a la awm bawka hengte hian hna thawk thei loin kan zirna in meuh pawh a la chawl ṭhuap a ni. 

Zirtirtu hlawh sang tak takte hi hnathawk lovin sorkarin a thlawn ang deuhin hlawh a pe hiau hiau a ni. A chhan chu pawn chhuah a la him loh avangin zirlaite chu ina in khung turin a la ti a, inah tawm turin a tihna a ni. Kan dinhmun la hlauhawmzia ti chiangtu bera ngaih theih chu Mizoram University hnuaia exam tur chu an exam dawn tawhah chawpchilh takin an ṭhulh tir hmak hmak a ni. Mitthi kan vui pawhin chhungkhat hnai tak tak pawh kal ve theih lovin 50 chin chiah kal an phal a, chhungkaw hung deuhah chuan chhung khat hnai tak tak kal thei lo an awm tam dawn a ni. 

Hengte hi ngun takin han zir ila. Politics lam tel miah lovin hriselna zawn aṭanga thlir hian VC inthlan hi a la hun lo deuh lo maw? SEC hian political party aṭangin sawn hla tura ngenna a dawng a, MNF hian sawn hlat an duh ve lova, a bak zawng ngenna hi politics thil avanga an advantage zawnna a nih chuan a hnawl pawh hi a mak lo a ni. Mahse chuti lo lam chuan, kan ram him zelna tur leh he hripui hi mipui vantlangah a darh huk lohna turin VC inthlan neih hrih loh hi a ṭhat zawk a rinawm tlat a ni. 

Tunah hi chuan sorkar thu ve ve a inkalh a, "Inah tawm rawh u," an ti zo chiah a, "Vote thlak hi khua leh tui ṭha mawhphurhna a ni," an ti leh daih bawk si a. Ina tawm tura min titute pawh hian pawna chhuak turin kum 65 chung lam te thlengin an au leh lawi si a ni. Tuna thil hlauhawm ber chu, "Chumi Polling Station a vote thlak zawng zawng inkhung hran tur," tih vel puan hi a ni. 

Inthlannaah hian hri lo darh palh ta se, enkawlna senso hi SEC hian a tum sak thei vek ang em aw? A chhe ber dawnin thihna hial lo thleng palh ta se insurance te an pe thei ang em aw? Poliktics thilah inthlan sawn hla tura nawrna a na sa a, hei chu SEC tan tih ngam a ni lo, a chhan chu MNF berin inthlan sawn hlat an nawr ve duh lo a ni. 

Health lam aṭang hian thlir tak tak se, sorkar thuchhuah dang Disaster Management lam aṭanga chhuakte ṭan chhan zawk hian inthlan hi sawn hlat mai a ṭha zawk lo maw?