Lunglei boruak chu Lungleiah a tàwp

Lunglei Municipal Council inthlan boruak avanga Mizorama politics thli tleh hum huma inngai an awm a nih chuan chu party chu an inngaihtuah harh leh chu a ngai a ni. Lunglei inthlang khan kum tawp MLA inthlan hi a nghawng dawn lo tih hi ka kutphah tlukin ka chiang a ni; kei val hi.

Hei hian ka thiam ang tawkin ka chhut ve neuh neuh a, Serchhip ah khan MNF kha ke vân váwrin an tla mualpho a, Ruling Party ni chung si khan an chak loh dan em em kha zahthlak tak a ni si a. Mahse chu MNF tho chu Tuirial Bial Bye Election hun a lo thlen chuan an tho leh thei a, MNF chu Tuirial Bial ah chuan an chak leh ta tho tho a ni.

Chuti chuan han sawi chho ta zel ila, Tuirial Biala an inthlan hnu chuan Lungleiah an inthlang leh a, chutah chuan chiang takin ZPM an chak a, mahse chu ZPM chakna chu Lunglei tualchhung inthlan a nih hi kan hre reng duh miah lo va, MNF boruak sawi hniam tum lui hrim hrimin Lungleia result chu Mizoram result angin kan sawi lui hmiah hmiah a, Mizoram chu ZPM ta em em angin kan sawi ta a, mahse a nihna takah chuan Mizoram hi a la ZPM lem lo tih hi ka hmu chiang em em a ni, ka zin veivahna lamah hian.

ZPM chu kum 2018 ai khan an lo lian ta deuh a nih pawhin thingtlang kilkhawr leh Lunglei aṭanga chhim lam te hi chu a la khawih phak ve lem lo tih chu Chakma inthlan khan a rawn tichiang a ni lo vem ni? ZPM hi an lo lian thar ta a nih pawhin a hma daiha lo liansa MNF leh Congress tiat tur chuan kum 10 tal chu a vei a la ngai ang. Tunah hian Lunglei leh Aizawl hi ZPM hian an lo la deuh vek a nih pawhin Lunglei khawpui leh Aizawl khawpui ni lo, bial dang hi a awm tih mipui hian an hre reng a ni. Lunglei boruak kha chu Lunglei leh Aizawl chhungah hian a tawp ka ring a, Lunglei leh Aizawl seat chu ZPM hian lo la ta pawh ni se, thingtlang hi chuan MNF leh Congress bawk an la ngaizawng dawn tih hi a chiang em em a ni.

- Lalthanmawia (Mawitea)