I FATE MAMAWH PE RAWH

Thiam thil bîk neih a ngâi hran lo; i fate mamawh hria la, pe ngêi teh. An mamawh i pêk ber chuan chhûngkua in hlim ang a, in hrisêl ang a, i thlahten lei hi an rochun ngei ang. Hripui lêng kârah hian i fate mamawh hi lo pe ngêi ang che. 

Ngaih pawimawh

I fate en liam mai mai teh suh. Thlithlâi la, i rilru pe la, ngaihven la, ngaihsak la, ngâi pawimawh reng mai rawh. In chhûng khurah te, mi dangte lakah te pawh. Thu sawi duh an nei ve, sawitîr la, ngâithla rawh. Duh thlantîr ve la, an ngaihdân zâwtin ngâithla la. An bulah tâl tam la, mawhphurhna pe ve ṭhin teh. 

Humhim

I fate chuan i bulah an him tih inhre ngêi sela, an thlâ ngam zân rawh se. I hmangaih tih an hriat phawt chuan him nih inhriatna an nei ang. Hnâwl leh phatsan nia an inhmuh vaih chuan i chânah inngâi hmiah mai rawh. Chhûngkuaa chêtho tam a ṭul a, chhûngkaw nunphûng leh inkaihhruaina fel tak zui a ṭul a, chhûngkaw inkaihhruaina pawh fel tak neih ngei a ṭul fo. Mumal lo taka chhûngkua awm mai mai chu naupangin an ngeih lo. Fate chu pawm, kuah, chhawnchhaih fo an nih chuan him nih inhriatna an nei ṭhin. 

Pawm thlap

Puitling tawh tân pawh hnâwl nih inhriatna tluka nâ a awm lo ang! I faten i pawm thlap tih an hriat chuan an nun a hrisêl ang. An mizia a inpersan a ni thei, i pawmpui tih hre ngei rawh se. An ṭhiante sawisel mai loin pawmpui teh. I tân mi pawimawh leh mi hlu tak a ni tih hriattir ngêi la, a nihna leh zia milin seilian ngêi rawh se. Sawisel leh hauh reng an mamawh lo, pawm thlap mai rawh. 

Hmangaihna

Midang aṭanga hmangaih­na dawn leh hmangaih lêt ve tluka hlimna a vâng hle. Bible pawhin, "Inhmangaih tawnna ngawt lo chu tuma engmah ba suh u; mahni mihringpui hmangaihtu chuan dân chu a zawh famkim tawh si a" (Rom 13:8) a ti a, a dik takzet mai. I fate mamawh, hmangaihna chu pe la, an dawng mâwl tawp dâwn lo, an hmangaih lêt ve ngêi ang che. Hmangaihna hi pêk hmasak phawt hnûa dawn lêt chi a nih i hre reng dawn nia. 

Fak leh chawimawi

I fate khân i fak leh i chawimawi an mamawh hle tih i hria em? Hre loin i lo sawisel reng zâwk em ni? Mahni fate fak leh chawi­mawi hreh tlat, "Miten min nuihzat ang!" ti mai mai kan tam lutuk hi a dik lo. Mite ngaihdân vil ai chuan i fate mamawh chu pe zâwk mai la, in ṭhatpui ang. Naupangte hian, midang daih fak aiin an innghahna ngêi, an nu leh pate ngêi fak leh chawimawi an mamawh a, an ṭhatpui daih zâwk tih hre reng ang che. A tlin tâwk leh thiam tâwk apiang chu, "I va fel ve aw," "I thiam lutuk!," "Ka lâwm e!" tih hrilh taima hle ang che. An mamawh a ni satliah lo, an ngeih takzet tih theihnghilh ngâi suh ang che.

Thununna

Thunun ngâi lo mihringah a awm theih loh; i fate pawhin thunun an mamawh ṭhin. Thununna awmzia chu, "Naupang nungchang ṭha leh pawmtlâk apiang tipung tura fuih phur leh nungchang pawm tlâk lo apiang siam dik tura ṭanpuina a ni" tiin sawi ila, a fiah mai âwm e. Thununna dik takah chuan naupangin him lo leh hnâwl angin a inhre ve ngâi lo. Thununna lekkawhtu nu leh pa pawh an zah ngêi ṭhin. 

Hrâwk, vau, ânkhum, diriam, inhlauhtîr, tihṭhaih, thinrim chunga vuak leh nghaisak ang chi hi thununna a tling lo; thinchhiat lantirtu mai a ni a, fate tihchhiat lehzualna a ni zâwk. 

Nungchang dik lo siam dik turin hmangaihna nêna vuak leh thunun a ṭul hun pawh a awm thei (Thuf 13:24). A ṭha berah chuan, "In fate tithinur suh ula, Lalpa thununnah leh zilhnaah chuan enkawl zâwk rawh u" (Eph 6:4) tih hi zui ila a fuh ber ang.