Kuhva mit siai an sim ta
Tunlai chu news hi han en hlek ila kuhva rah tawlh ruk hi an man zut zut a, tun hma reng reng khan an man thei si lova, Assembly House a kuhva smuggling mit siai thu puang tute khan tunah chuan inthlan a hnai tawh a, an siai ngam tawh lo. An rawn meng fiah ngam ṭana kuhva pawh an man thei ta an tih chu mawle, a mak thei ngei e.
He thil hi thil tak tak a ni a, kuhva smuggling lian taka kal mup mup kha kan sorkar khan a hai der tlat a ni. A hai der chhan hriat a ni lo. A man theitute khan an man duh tlat lo. Titi mai maiah chuan District pakhata Police Constable te in lehkhaden chu mi naran tan tel ve mai mai ngamna chi a ni lo, a sang bi tak takin an inthap an ti a. Posting an kal hlima Sumo ticket cut kha an haw a hun chuan SUV nen an tleng haw zel zel a, kuhva chu awlsam takin an kal tlang zel an tihte pawh hi a mak thei ngei e.
Kuhva smuggling lo luhna hi chu Ṭiau ral lehlam aṭangin a nih avangin a chân khân hi uluk taka siam a nih chuan lo man hi thil harsa pawh a ni lo. Kuhva hi chu a bag in a awm a, langsar taka phurh ngai a ni. Mizoram sorkar hian a duh chuan a han man chat chat thei. Kha chen kha zalen takin smuggling a kal tir a, kuhva huan awm lohna Champhai District lama thar anga ziah luh hmiah hmiah a ni e, te an tih chu a mak thei ngei e.
He kuhva tawlh avang hian thawkrim lo mi hausa an pung a, chu chuan pu chuam neiin MLA election hi an hmuak a. An pu chuam an tlin chuan an lian thut thut dawn a, he thu hi zawlnei ni lo tan pawh sawi ngam a nih tawh chinah hi chuan kan ram politics kalphung hi chu her rem thut theih chu a chakawm a. Champhai ṭhalaite ngei ngei pawhin smuggling duh lohna kawng an zawh a, chutihlai chuan an District MLA 3 kha an bo vang vang a. Champhai thlavang hauh ngam lovin smuggler an hlau nge eng ber nge an hlauh tih hriat lohin hun harsaah an MLA 3 ten mipui an bihruk san a ni.
Khang mipui an bihruk sante khan kum tawpah vote an thlak dawn a, Covid hunlaia Lunglei mipui bihruk santu MLA te kha chu an inchhir tawh a, MNF in ram pumin rin loh an hlawh phah avangin kuhva mit siai sim thar thut pawh hian sorkar hi a vawrh kâng zo tawh lova, Mamit District leh Kolasib District lama eizawnna nghawngtu smuggling hmu lo dertu sorkar kan lo nei reng mai kha chu a mak thei ngei e.
- Zonunsanga