Party 4 x-ray

Kum a lo vei zel a, inthlan a lo hnai ta a, party mi leh sate chu mawng vawm ba ang sekin an tei kual ta ruai mai. Khawi hmun titi na pawh ni se politics chu themtleng te zawk ang maiin a ri ve reng tawh lo thei lova, chu politics boruaka kan liluh leh ṭan mek lai hian party 4 te innghahna hi ka hmuh danin ka han ziak ang a, mahni hmuh dan na na na chu zep hauh lovin kan ziak dawn a ni.

1. MNF: MNF hi Ruling Party an ni a, ṭum dang ang chu ni se term khat hmang zo hlim hi chu tling leh tura beiseiawm an ni. Tun ṭum chu a boruak a dang khawp mai a. Lunglei lama Municipal Council inthlanah chuan mipuiin MNF an lo ning hle tih a takin a lang chhuak a ni. MNF chuan Lungleia an tlak chhan chu Lunglei issue vang a ni an ti tlat a, mahse mipuiin MNF an nin hrim hrim tawh vang tih nemnghet turin Chief Minister bial Zemabawka Local Council inthlanah MNF chu an han nil leh tlat mai a, ZPM an solid ve ve a ni.

MNF tan innghahna awm chhun tur chu 'pawisa' a ni tih a chiang tawh a, Chief Minister-in Hnam Runah a sawi lang a, kan la hriat ngai loh SASCI sum chu an hmang dawn tih a sawi a, SEDP an sem bawk anga an tlin tur thu a sawi. Heng sumte hi MNF sum a ni awzawng lova, SASCI sum hi chu loan a ni a, a rulh chhung a rei deuh dawn a, mipui pawisa pukin mipui vote lei an tum tho tho a ni. SEDP pawh mipui pawisa sorkar ta a nia chu chu mipui vote leina atan hman an tum a, hei hi Chief Minister ngeiin chiang takin a sawi a ni.

Suma innghah hi tun hma kha chuan a ṭangkai a, Lunglei leh Zemabawkah chuan suma innghah a ṭangkai lo. Cheng nuai 3 zawrh chu an sawi ngam tawh lo tawp ang.

2. Congress: Mizorama rorel rei ber Congress hi party mal thlura mihring ngah ber an ni. He Party ropui tak hi a kum a lo upa ve ta a, mihring kum upa ang bawkin a lo chak lo tial tial a, party hotupa ber Pu Lalthanhawla a chawlh tuk aṭangin chhungrilah inrintawklohna an nei a. Treasurer leh an MLA senior Pu Zodintluanga a han bang lehzel nen Mizoram political history-ah chuan an hniam lai ber an hmang mek a ni.

Congress innghahna chu tunah chuan Central aṭanga puihna a ni thei tawh si lova, anmahni an inawi nung zo tawh bawk dawn si lova, state pawn lam result lama innghah a ni ta ber mai. Karnataka lama BJP hneha Cong­ress an han tling mai chu Mizorama Congress worker zawng zawng tih theih hian Whatsapp leh Facebook ah an update chuai chuai a. An poltician pakhat hming pawh an hriat loh hmangin Mizorama Congress boruak hniam tak chu rawn chawi kan an tum a, Mizorama vawi khat pawh la zin lo Karnataka Congress MLA te result lama an innghah tawh chuan an chaurau ve tawh a, Pu Lalsawta hi rinawmin pa dik ni mah se pa muang leh pa chak tak a ni lo tih a lang tel si a.

A chhunga inbeihna awm nen an innghahna chu "Congress kan tho leh mek, Karnataka ah kan chak" tih hi a ni ta.

3. BJP: BJP hi India rama roreltu an ni a, hei hi chuan Mizoramah sorkar an la tum lo a, an sawi ber chu "Sorkar ah kan tel ve hrim hrim dawn" tih a ni a. Hei hi chu tun hmaa MPC leh ZNP pawhin an lo au hla tawh ṭhin a ni a, mi party behchhana sorkar a tel hrim hrim tumna hi chu a hlawhtling mawh. An innghahna Central sum hian MLA 2 aia tam tlinna khawp a pe dawn lova, Chakma District inthlan result kan en chuan Chawngte ah pawh tla thei reng an ni.

4. ZPM: Party phur leh thothang ṭha em em ZPM hi kum 2018 inthlan khan mipui rin phak bakin vote an hmu sang a, tunah hi chuan mipui rin hlawh tawh chungin inthlan an hmachhawn dawn. ZPM hi an la lian lova, an innghahna tur chu 'Neutral Voters' an ni kan ti lo thei lo. Neutral hi an ZPM deuh duak tawh an tih hi a tak tak a nih chuan Mizoramah State kan nih hnua a vawi khatna atan Congress leh MNF tel ve lohna sorkar a ding ve thei dawn ta tak tak a ang tawlh tawlh a, ZPM lam pawhin chu chu hriain MLA nih chak an pung thur thur a ni.

ZPM hian party mi leh sa innghahna tham an la nei lova Congress leh MNF aiin an party a la tet bakah ruhrel a la nei lian lova, Kalphung Thar an zawrh vang lam aiin mipuiin Congress kan hnawl avang leh MNF kum nga kan hne ngawih ngawih tawh avang hian ZPM hian neutral-ah kan innghat an ti pawh hi thil mak niin a lang lo.

Neutral hi innghahna tlak an lo nih tak tak chuan sorkar thar a piang thei dawn niin a lang a, beisei a phak loh chuan kum 2028 ah paih leh dawp an ni ang.

- Lalthankima