SAWI LOH DANA AWM POLITICIAN

March 22, 2017 daih tawh khan tuna rorel lai MNF hian ropui takin an SEDP an tlangzarh a, chumi ṭuma thusawitu MNF President Pu Zoramthanga chuan SEDP hnuaiah sing bi den dena sum sem a ni dawn lo tih sawiin, "Chhung tinte’n bul ṭantirh aṭanga eizawnna nghet an neih thleng chhawmdawlna leh ṭanpuina pek an ni dawn. Chhung tinte’n eizawnna nghet an neih theihna tur chuan a tlem berah cheng nuai thum tal an mamawh tih kan hria," a ti a.

SEDP hnuaiah mi tinin thawh chhuah an neih theih nan ruahmanna siam a ni dawn tih sawiin, Pu Zoramthanga chuan, "GSDP tihsan dâwrh kan tum dawn. Mizo contractor tan a tam thei ang ber hna siam a nih theih nan Mizoram Construction Corporation din a ni ang a, hei mai bakah hian, lehkhathiam hna hmu lote tan unemployment allowance thla tin pek a ni ang," a ti a; lo neitute chu crop insurance leh price support siamsak an nih tur thu a sawi.

SEDP kalpui turin sum tam tak a ngai dawn tih sawiin Pu Zoramthanga chuan, "Engtin nge sum kan neih ang, tih hi zawhna awm thei a ni. He policy kalpui nan hian budget-ah sum kan dah dawn a, vaibelchhe 1000 chuang pawh kan dah mai ang. Budget-a kan pawisa dah chu a chi atan mai chauh a ni dawn a, sum pui tak tak chu sorkar laipuiah sum tam tak, a thiam tana sawi chhuah tur a awm," a ti a ni. Source: https://www.vanglaini.org/tualchhung/68898 (March 23, 2017)

SEDP chungchanga Dr. R. Lalthangliana thusawi, a video clip pawh la awm thlapah chuan, “Kum 3 chhung deuh thaw hei a hmingin SEDP-ah kan President zahawm takin Chairman atan min dah a. Khami committee-ah khan member 16 bawr vel kan awm a; uluk takin vawi 23 zet full sitting  darkar 5/ darkar 6 te kan ṭhu a. Khawvel tukverh kan dak a; India ram tukverh kan dak bawk a, pawisa lo kal theihna tur zawng zawng uluk takin kan ngaihtuah lawk vek; hei hi tunhmain a la awm ngai miah lo. Chuvang chuan 2019 March thla Assembly Session kan neih hmasak berah hian SEDP atan hian kan Annual Plan Budget hrim hrimah hian, kan President-in a sawi tawh ang khan vaibelchhe 1000 aia tlem lo a awm nghal dawn tih kha lo hre phawt mai rawh u,” tiin uar takin a sawi a nih kha.

Beisei nei taka Mizoram mipuite’n Pu Thangtea leh Pu Zorama thusawi kan lo thlir laia kum 2 dawn an sorkar hnu pawha kan hmuh tak loh te chu: Mizoram Construction Corporation din tumna a awm lo, din dawn pawh nise Mizoramin hma kan sawn phahna tur a awm chuang lo; lehkhathiam hna hmulo te tan unemployment allowance pek tuma hmalakna a awm lo; lo neitute tan crop insurance leh price support siam tumna an la nei lo; an sorkar hnua Mizoram Budget pharh hmasak ber 2019 March thlaah SEDP atana cheng vaibelchhe 1000 dah tlin tur pawisa an nei lo. Kum 2019-2020 atan SEDP-ah vaibelchhe 750 an dah phawt a, a kum leh 2020-2021 Budget-ah phei chuan a hma kum aia tlem vaibelchhe 513 an dah a, nuai 3 kan sem ang an tih hi sorkarna an chan hnuah langsar takin an aupui ngam tawh lo a nih hi. 

Thingtlâng pain SEDP aṭanga nuai 3 dawn a lo beisei laiin Aizawl pa chuan inthlan avanga an dil pawh ni lo, an garage (lirthei park-na) sak nan a thlawn liau liauin nuai 20/30/40 an dawng fel der tawh thung. Tuna kan hrawn mek MNF sorkar hotute zet zawng an sawi loh danin an awm nasa a nih ber hi !!