Zemabawk Model

English hmangin a thupui han siam ila, Zemabawk Model tih hian ZPM Zemabawk Local Council inthlan tihna kha a ni mai ang chu. Miin thil an lo tihhlawhtlin tawh entawnna tura sawi hi hetiang hian hming an vuah ṭhin, Zemabawk inthlan kha entawn ang u, tiin Mizorama 2023 kum tawp inthlan hi i hmachhawn ang u.

Zemabawkah khan ZPM an tling mai a ni lo, hnehsawh takin an tling. Kan ziah tur hi a Political Party lam a ni aw zawng dâwn lo, kan ziah tur chu mipui tha chakna People's Power an tih hi a ni. Zemabawk Local Council inthlan kha ZPM chakna a ni lova mipui chakna zawk a ni.

ZPM khan an chak zata chak tur khan amahin mipui a nei miah lova, mahse mipui zawk kha ZPM lamah an ṭang ta a, mipui thâ chu a lo chak ngiang a, MNF Ruling Power leh SEDP intiamna pawhin a hneh tlat lo.

SEDP hi nuai 3 aṭanga Rs 25,000 leka a tlak hniam tak vangin Zemabawk mipui khan MNF an vote duh lo a ni lo, a chhan hi factor hrang hrang a awm. Pakhatna chu MNF sorkar hian tih tum lian tak tak an sawia an ti hlawhtling si lova mipuiin intiamna hlawhchham an duh loh vangah a ngaih theih a ni.

Assam Rifles insawn chhuah Drama kha Lunglei Municipal Council inthlan dâwn khan an han chang a, Zemabawk lam chuan lung fing takin an lo thlira an chhuak lo tih an hre chiang a ni. Zemabawk lam hi Assam Rifles insawnna tur an ni.

Hmasawnna Development aṭanga teh dâwn chuan Zemabawk hian MNF hi hnawl thei an ni lo. Bial mala pawisa luh tam ber lawr lakna bialah an awm a, veng lian ber an ni bawk. Zemabawk area chhung ringawta pawisa lut hi Constituency ṭhenkhat aiin a tam zawk a rinawm a, mahse MNF an hnawl chhan chu Zemabawk hian duh tawh loh an nei a ni.

Chu an duh tawh loh chuan SEDP te, pawisa te, contract te, Development te, sorkar hna intiamna hrang hrang nen rawn ko mahse mipui nawlpuiin an leh hawi hmak tawh a, koh kir rual an ni lova, Local Council inthlan ṭhatah Chief Minister bialah kum 5 term hman zawh hmain MNF an nil a ni.

Zemabawk hi entirna a ni a, mipui tih lungawi tawh loh chu tun hnaia Facebook leh WhatsApp lama Face Account hmanga ṭan laka ZPM beih vak vak hian siam ṭhat theih a ni tawh lo. Mipui hian thutlukna an siam tawh Zemabawk lam ang hian thil a thleng thei a, chuvangin ZPM an rinawm leh ṭhat vang aiin mipui thinlungin a hnawl tawh tán Politics ah chuan insiam ṭhat theih a ni tawh ngai lo.

Zemabawk Model hi Aizawl leh zawl loah pawh kan hmù nawn ngei dâwn a ni.

- Lalramnghaka