Hektu MLA te kha an la dam em?

Kum 2000 AD khan MNF MLA mi 12 zet chuan anmahni thu liau liauin (an insawi dan chuan) Pu Lalduhoma, MLA chu, 'Independent MLA ni si a ZPM lutuk e,' tiin Speaker Pu Lalrinliana Sailo hnenah an hek a. Pu Rinliana chuan dan ngaih pawimawh vangin mipuiin an duh taka an thlan Pu Duhoma chu MLA aṭangin a bân zui ta a ni.

Pu Duhoma chu an bân ta a, Byeelection a awm zuia hneh takin a chaka Pu Vanlalzawma, MNF Vice President chu a tla ta dawp a ni. Pu Duhoma hektu rual hi an zavai hian mi chhuanawm tak tak an ni hlawm a. Kohhran Upa pawh an awm nual a. doctor chi hnih PhD leh MBBS chin pawh an awm a, an hek ber Pu Duhoma kha ZPM flag hmanga campaign ni si kha, 'A ZPM lutuk' ti duh khawpa dan dah pawimawh an ni.

Heng MLA 12 :-

1) Dr. Z. R. Thiamsanga

2) Dr. L. Thangmawia

3) Dr. Vanlaltanpuia

4) Prof. F. Lalnunmawia

5) Dr. K. Pachhunga

6) Ramthanmawia

7) Er. H. Lalzirliana

8) H. Biakzauva

9) Lalrinsanga Ralte

10)Zothantluanga

11) C. Lalmuanpuia

12) Lawmawma Tochhawng

te hi zawhna ka han zawt duh mai mai che u a. Tun lai hian Independent MLA Dr Vanlalthlana, Pu Vanlalhlana, Pu Sawivunga, Pu VL Zaithanzama, Pu Pu Chhuanthanga te hi ZPM tan an che chhuak nasa khawp mai a. Lunglei Municipal Council inthlanah khan ZPM tán an va campaign a, Independent MLA ni si an va chet ZPM avang khan hek leh hram ula kan duh a ni.

Dan ngai pawi­mawh em em kan Assembly Speaker pawhin hek hun nghak kher lovin TV, Facebook, Youtube ah an hmuh theih ang hian an che ZPM hle mai sia disqualify leh law law se a ṭha ang.

Pu Duhoma chauh hek ngam MLA 12 an nih chuan MLA tling tlak an ni tawh lo, mahni MLA pui chutah pawh mahni aia Senior Pu Duhoma hek duh khawpa rilru pu kan MNF MLA 12 te hian Independent MLA dangte hi in hek leh ngam a nih loh chuan MLA ah chuan in candidate lo ngam tawh ula ka ti.

Mipui pawhin hektu 12 hi kan la chhinchhiah ve reng che u a nia.

- Lalremruata